ՄԱՐԶԱԿԱՆ՝  ՄԱՅԻՍ Գ./2018

0

ՏԵՂԱԿԱՆ

ՀՄԸՄի Պասքեթի Տղոց Խումբը Սուրիոյ  Աւարտական Քառեակին Մաս Կազմեց

Սուրիոյ ախոյեանութեան FINAL 10-ի փուլի աւարտին, Հալէպի ՀՄԸՄ-ի պասքեթի տղոց խումբը ընկերակցելով Հալէպի «Իթթիհատ»ին եւ Դամասկոսի «Ուահտէ» եւ «Ճէյշ» խումբերուն, բարձրորակ մակարդակի խաղարկութեամբ յաջողեցաւ իր տեղը գրաւել FINAL – 4-ի խումբերուն մէջ:  Դամասկոսի մէջ  Սուրիոյ առաջին տասը խումբերը բաժնուեցան երկու խմբակի. Ա. Խմբակին մաս կազմեցին «Իթթիհատ», ՀՄԸՄ, «Ուահտէ», «Սահէլ» եւ «Սաուրա» խումբերը,  իսկ Բ. Խմբակին «Ճէյշ», «Ճալաա», «Քարամէ», «Հուրիէ» եւ «Նասր» խումբերը: ՀՄԸՄ-ի տղաքը մրցաշարքի բացումը կատարեցին յաղթանակով մը՝ 66 – 63  արդիւնքով պարտութեան մատնելով Թարթուսէն ժամանած «Սահէլ»ը: Յաջորդ երկու մրցումներուն,  ՀՄԸՄ-ի մրցակիցները դարձան Սուրիոյ լաւագոյն խումբերէն՝ «Ուահտէ»ն եւ «Իթթիհատ»ը, որոնց դէմ կրեց յաջորդական երկու պարտութիւն՝  57 – 84 եւ 78 – 110 արդիւնքով: Ա. փուլի աւարտին, խաղցողները լաւատեղեակ էին, որ սոյն մրցումի արդիւնքին շնորհիւ, կազմը կրնայ հասնիլ FINAL 8. եւ բոլորը ոչ մէկ ճիգ խնայելով կրցան պարտութեան մատնել իրենց մրցակից՝ «Սաուրա»ն  73 – 56 արդիւնքով: FINAL  8–ի փուլին, ՀՄԸՄ-ի մրցակիցը դարձաւ Հոմսի «Քարամէ»ն,  որուն հետ մրցեցաւ երեք անգամ եւ երկու յաղթանակ արձանագրելով կազմը հասաւ Սուրիոյ ախոյեանութեան աւարտական քառեակ: Զոյգ խումբերուն միջեւ տեղի ունեցած երեք հանդիպումները ընթացան սուր մրցակցութեամբ, եւ յաղթական կազմը յստակացաւ վերջին վայրկեաններուն: ՀՄԸՄ – «Քարամէ» խումբերուն հանդիպումները յաջորդաբար  աւարտեցան 96 – 88,   67 – 74     եւ 92 – 86 արդիւնքով:

 

ՄԻՋԱԶԳԱՅԻՆ

Նէյմար Փափաք ունի Տեղափոխուիլ Ռիալ Մատրիտ  

Ըստ ֆրանսական «Ֆութպոլ-ֆրանս»ի փոխանցած տեղեկութիւններուն,  Փարիզ Սան Ժերմանի յարձակողական պրազիլցի խաղցող  Նէյմարի հայրը խնդրած է անուանի գործակատար Փինի Չախաւիէն իր զաւակը դուրս բերել ֆրանսական ակումբէն, եւ տեղափոխել այլ ակումբ: Ըստ տեղեկութիւններուն, պրազիլցի մարզիկը այլ առիթներով իր փափաքը յայտնած է միանալու սպանական թագաւորական խումբին,  նկատի ունենալով, որ ան արքայական ակումբէն ներս կրնայ աւելի լաւ աշխատավարձ ստանալ:

 

Արսենալ Գլխաւոր Մարզիչի Նոր Թեկնածու Ճշդեց

Ըստ  express.co.uk կայքին , Լոնտոնի Արսենալը նոր մրցաշրջանին կրնայ գլխաւորել սպանացի մասնագէտ Ունայ Էմերինը:Աղբիւրը յայտնեց, որ անգլիական ակումբին եւ սպանացի Լուիս  Էնրիկէի բանակցութիւնները ձախողեցան, ակումբը ունի նաեւ այլ գլխաւոր թեկնածու մր՝ իտալացի Մասսիմիլիանօ Ալեկրին: Աւելցնենք, Ունաի Էմերին, Փարիզ Սան Ժերմանի հետ այս տարի նուաճեց Ֆրանսայի ախոյեանութեան կոչումը եւ երկու գաւաթները։ Ան յայտարարեց, որ մրցաշրջանի աւարտին պիտի լքէ ակումբը, որովհետեւ ան  չյաջողեցաւ հասնիլ իր գլխաւոր նպատակին՝ եւրոպական չեմպիոններու գաւաթի նուաճումին:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.