ԱՐԾՈՒԻԿ ՄԻՆԱՍԵԱՆ ՀԱՆԴԻՊՈՒՄ ՈՒՆԵՑԱԾ Է ՀԱՄԱՇԽԱՐՀԱՅԻՆ ԴՐԱՄԱՏԱՆ ՊԱՏՈՒԻՐԱԿՈՒԹԵԱՆ ՀԵՏ

0

Հայաստանի Հանրապետութեան տնտեսական զարգացման եւ ներդրումներու նախարար Արծուիկ Մինասեան հանդիպում մը ունեցած է Համաշխարհային դրամատան Հայաստանեան գրասենեակի ղեկավար Սիլվի Պոսութղոյի գլխաւորած պատուիրակութեան հետ։ Հանդիպումի առանցքը կազմած են Համաշխարհային դրամատան եւ Հայաստանի Տնտեսական Զարգացման եւ Ներդրումներու Նախարարութեան միջեւ համագործակցութեան ու ՀՀ կառավարութեան յառաջիկային ներկայացուելիք ծրագիրին առնչուող հարցեր։

Նախարար Մինասեան հանգամանալից կերպով անդրադարձած է նախարարութեան կողմէ Համաշխարհային Դրամատան համագործակցութեամբ իրականացուող աշխատանքներուն եւ քաղաքական նոր իրողութիւններու պայմաններուն մէջ տնտեսութեան իրավիճակին։ Խօսելով նոր ձեւաւորուած կառավարութեան ու Ազգային Ժողովի արտահերթ ընտրութիւններու անհրաժեշտութեան մասին՝ նախարարը վստահեցուցած է, որ ջանք ու եռանդ պիտի չխնայուի տնտեսական բարեփոխումները ժամանակին եւ լաւագոյնս իրականացնելու համար։

Նախարարը անդրադարձած է Հայաստանի մէջ ներդրումային միջավայրի բարելաւման եւ ներդրումներ իրականացնելու նոր կարելիութիւններու ստեղծումին, ուր խաղի կանոնները բոլորին համար նոյնը կ’ըլլան: Յատկապէս նշուած է արդէն իսկ առկայ դրական ազդակներու եւ բազմաթիւ անձերու ու կազմակերպութիւններու Հայաստանի մէջ ներդրումներ իրականացնելու փափաքին մասին:

Արծուիկ Մինասեան մանրամասնօրէն անդրադարձած է նախարարութեան հետ իրականացուող Համաշխարհային Դրամատան ծրագիրներու ընթացքին: Միտքեր փոխանակուած են արտահանումի խթանման, պետութիւն-մասնաւոր հատուած գործընկերութեան, տնտեսական մրցակցութեան ու հակամենաշնորհային քաղաքականութեան, ՓՄՁ զարգացման, ինչպէս նաեւ շարք մը այլ հարցերու շուրջ։

Սիլվի Պոսութղօ, շնորհաւորելով նախարարը նշանակումին առիթով, շնորհակալութիւն յայտնած է ծրագիրներու մանրամասն ներկայացումին համար։ Համաշխարհային Դրամատան պատուիրակութեան անդամները նախարարին ներկայացուցած են «Ապագայի Հայաստանը․ միակցում, մրցակցութիւն, բարգաւաճում» երկրի համակարգուած գնահատումի զեկոյցը, որ ամբողջական տնտեսական վերլուծութիւն է իրենց կողմէ ներկայացուած եւ որպէս ուղեցոյց կրնայ հանդիսանալ Համաշխարհային Դրամատան հետ համագործակցութեան գործընթացին։

Հանդիպումի ընթացքին պայմանաւորուածութիւն ձեռք բերուած է Համաշխարահային Դրամատան յառաջիկայ ոլորտային փորձագիտական առաքելութիւններու հետ հանդիպումներու համար։ Աւարտին կողմերը անգամ մը եւս յայտնած են միասնական աշխատանքը եւ համագործակցութիւնը ընդլայնելու իրենց պատրաստակամութիւնը։

ՀՀ Տնտեսական Զարգացման եւ Ներդրումներու Նախարարութիւն

Share.

Leave A Reply

This site uses Akismet to reduce spam. Learn how your comment data is processed.