ՀԱՅԱՍՏԱՆԻ ԱՐՏԱՔԻՆ ԳՈՐԾՈՑ ՆԱԽԱՐԱՐԸ ՀԵՌԱՁԱՅՆԱՅԻՆ ԶՐՈՅՑ ՈՒՆԵՑԱԾ Է ՄԻԱՑԵԱԼ ՆԱՀԱՆԳՆԵՐՈՒ ԱՐՏԱՔԻՆ ԳՈՐԾՈՑ ՆԱԽԱՐԱՐԻ ՏԵՂԱԿԱԼԻՆ ՀԵՏ

0

16 Մայիսին, ամերիկեան կողմին նախաձեռնութեամբ, Հայաստանի արտաքին գործոց նախարար Զոհրապ Մնացականեան հեռաձայնային զրոյց ունեցաւ Միացեալ Նահանգներու Եւրոպայի եւ Եւրասիոյ հարցերով արտաքին գործոց նախարարի տեղակալ Ուեսս Միթչէլի հետ: Ուեսս Միթչէլ շնորհաւորեց Զոհրապ Մնացականեանը արտաքին գործոց նախարարի պաշտօնին նշանակուելուն առիթով: Ան շեշտեց, որ Միացեալ Նահանգները պատրաստ է աշխատիլ Հայաստանի նոր կառավարութեան հետ երկու երկիրներու համար փոխադարձ հետաքրքրութիւն ներկայացնող բազմաթիւ ոլորտներու մէջ։

Շնորհակալութիւն յայտնելով շնորհաւորանքի համար` արտաքին գործոց նախարարը ընդգծեց, որ Հայաստանը մեծապէս կ’արժեւորէ երկու երկիրներու միջեւ բազմաոլորտ համագործակցութիւնը եւ պատրաստ է շարունակելու անոր զարգացումին ուղղութեամբ աշխատանքը։

Զոհրապ Մնացականեան եւ Ուեսս Միթչէլ քննարկեցին երկկողմանի օրակարգին առնչուող հարցեր։

Կողմերը անդրադարձան հայ-ամերիկեան միջկառավարական յանձնաժողովի ու Առեւտուրի եւ ներդրումներու հայ-ամերիկեան խորհուրդի գործունէութեան։

Զրուցակիցները միտքեր փոխանակեցին տարածաշրջանային ու միջազգային հրատապ հարցերու շուրջ։ Անդրադառնալով ղարաբաղեան հակամարտութեան գօտիին իրավիճակին, նախարար Մնացականեան կարեւոր նկատեց ԵԱՀԿ Մինսքի խմբակի համանախագահ երկիրներու, այդ շարքին Ամերիկայի Միացեալ Նահանգներու կարեւոր յանձնառութիւնը՝ աջակցելու ղարաբաղեան հիմնահարցի խաղաղ լուծումին:

Share.

Leave A Reply

This site uses Akismet to reduce spam. Learn how your comment data is processed.