ՔՐՏԱՄԷՏ ԿՈՒՍԱԿՑՈՒԹԵԱՆ ԱՆԴԱՄՆԵՐԸ ԱՅՑԵԼԵՑԻՆ ՀԱՅԱԲՆԱԿ ՎԱԳԸՖ ԳԻՒՂԸ

0

«Մարմարա».- «Կազիայնթէպհապէր» լրատու կայքը կը հաղորդէ, որ քրտամէտ Ժողովուրդներու Ժողովրդավարական Կուսակցութեան անդամներ այցելած են հայաբնակ Վագըֆ գիւղը՝ դիմաւորուելով ջերմ մթնոլորտի մը մէջ։

Խումբը կը բաղկանար կուսակցութեան շրջանի կազմակերպութեան քանի մը անդամներէ, որոնք ընտրական արշաւի սկսած են՝ այցելելով զանազան վայրեր։

Երեսփոխան Լէյլա Պիրլիք այդ միջոցին ելոյթ ունեցած է՝ ըսելով, որ գիւղը կը փաստէ, թէ տարբեր ժողովուրդներ կրնան միասնաբար ապրիլ։ Ան յիշեցուցած է, որ այդ շրջանին, երբ խտրականութիւնը շատ շեշտուած էր, Վագըֆ հայկական գիւղը առաջին հանդիսացած էր իր ժողովրդավար ապրումի մակարդակով, սակայն Պիրլիք ցաւ յայտնած է, որ այժմ խտրականութեան ոգին կը վերադառնայ եւ անոր զոհերէն մէկը նոյնինքն իր կուսակցութիւնն է։

Իր կարգին, գիւղի բնակիչներէն Ճեմ Չափար ըսած է, որ իր համագիւղացիները լաւ գիտեն, թէ ի՛նչ կը նշանակէ խտրականութեան ենթարկուիլ եւ դիմադրել՝ աւելցնելով, որ քրտամէտ կուսակցութիւնը Թուրքիան ժողովրդավար դարձնելու համար լա՛ւ առիթ մըն է, միաժամանակ՝ բախտաւորութի՛ւն մը։

Share.

Leave A Reply

This site uses Akismet to reduce spam. Learn how your comment data is processed.