ՄՈՒԱԼԼԷՄ. «ՍՈՒՐԻԱՆ ԻՆՔՆԻՇԽԱՆ ԵՐԿԻՐ Է ԵՒ ՊԻՏԻ ԳՈՐԾԱԿՑԻ ԻՐ ՆԱԽԸՆՏՐԱԾ  ԿՈՂՄԵՐՈՒՆ ՀԵՏ՝ ԱՀԱԲԵԿՉՈՒԹԵԱՆ ԴԷՄ ՊԱՅՔԱՐԵԼՈՒ ՀԱՄԱՐ»

0

Կիրակի, 4 Յունիս 2018-ին, Սուրիոյ արտաքին գործոց նախարար Ուալիտ ալ Մուալլէմ մամլոյ ասուլիսի մը ընթացքին յայտնեց, որ Սուրիոյ ամբողջ տարածքը պիտի ազատագրուի ահաբեկիչներէն եւ Սուրիա ներխուժող օտար ուժերէն։

Մուալլէմ շեշտեց, որ Սուրիա ինքնիշխանութիւն վայելող երկիր է եւ պիտի գործակցի իր նախընտրած կողմերուն հետ ահաբեկչութեան դէմ պայքարելու համար՝ աւելցնելով որ Սուրիոյ մէջ իրանեան ներկայութիւնը սուրիական կառավարութեան արտօնութեամբ օրինաւոր կը համարուի, սակայն ամերիկեան ներկայութիւնը անօրէն է եւ ԱՄՆ  անմիջապէս իր ուժերը դուրս պէտք է բերէ սուրիական հողերէն։

Մուալլէմ ըսաւ. «2011-էն ի վեր Իրան նեցուկ կը կանգնի ահաբեկչութեան դէմ Սուրիոյ պայքարին: Այն ահաբեկչութեան, որ կը հովանաւորուէր Թուրքիոյ, Սէուտական Արաբիոյ եւ Քաթարի կողմէ:  Ուստի Սուրիոյ ժողովուրդին անունով երախտագիտութիւն կը յայտնենք Իրանին իր հաւատարիմ կեցուածքին համար։

Խօսելով Մունպուճի շուրջ թուրք-ամերիկեան բանակցութեան  մասին, Մուալլէմ ըսաւ. «Ոչ միայն Մունպուճի, այլեւ  Աֆրինի եւ սուրիական իւրաքանչիւր հողաշերտի վրայ թրքական ներկայութիւնը ապօրինի ու թշնամական ներխուժում կը համարենք: Հետեւաբար ո՛չ Թուրքիան, ոչ ալ ԱՄՆ-ը իրաւունք ունին բանակցելու սուրիական Մունպուճի շուրջ: Մենք պիտի ազատագրենք Սուրիոյ ողջ տարածքը օտարներէ, իսկ թուրք-ամերիկեան որեւէ համաձայնութիւն մեր հողերուն շուրջ Սուրիոյ ինքնիշխանութիւնը հարուածող թշնամական մօտեցում է:

 

 

Share.

Leave A Reply