ԹՈՒՐՔԻՈՅ ՄԷՋ ՆԱԽԸՆՏՐԱԿԱՆ ՔԱՐՈԶԱՐՇԱՒԻ ԸՆԹԱՑՔԻՆ ՁԵՐԲԱԿԱԼՈՒԱԾ Է ՔՐՏԱՄԷՏ ԿՈՒՍԱԿՑՈՒԹԵԱՆ 136 ԱՆԴԱՄ

0

Թրքական «Տեմոքրաթհապեր» կայքը կը հաղորդէ, որ Թուրքիոյ մէջ սկսած նախընտրական քարոզարշաւի 35 օրուան ընթացքին ձերբակալուած է քրտամէտ Ժողովուրդներու ժողովրդավարական կուսակցութեան քարոզչութիւն կատարող 136 մարդ:

28 Ապրիլէն 3 Յունիս ձերբակալուած 136 քրտամէտ կուսակցականներէն 11-ը կալանաւորուած է:

Բացի ատկէ, նախընտրական քարոզարշաւի ընթացքին 12 յարձակում գործուած է քարոզչութիւն կատարող անձերու եւ կուսակցութեան գրասենեակներու դէմ:

Յարձակումներու 10 դէպքերէն 6-ը արձանագրուած է Պոլսոյ մէջ, երկուքական յարձակում տեղի ունեցած է Իզմիրի եւ Անթալիոյ մէջ, իսկ մէկական յարձակում` Ալեքսանտրեթի եւ Էտիրնէի մէջ:

Սղերդի մէջ Ժողովուրդներու ժողովրդավարական կուսակցութեան համանախագահ Սեզայի Թեմելլիի այցելութեան ընթացքին անոր ինքնաշարժներու շքախումբին միացած բոլոր վարորդները անխտիր պետական տուգանքի ենթարկուած են:

Ընտրութիւններուն կուսակցութեան կողմէ նախագահի թեկնածու առաջադրուած Սելահատտին Տեմիրթաշ Նոյեմբեր 2016-էն ի վեր կը գտնուի բանտ: Անոր փաստաբանները դատարանին պահանջ ներկայացուցած են` նախընտրական քարոզարշաւը հաւասար պայմաններու մէջ կատարելու համար Տեմիրթաշը պայմանականօրէն ազատ արձակելու վերաբերեալ, սակայն, ապարդիւն:

Թուրքիոյ մէջ նախագահական ու խորհրդարանական արտակարգ ընտրութիւնները տեղի պիտի ունենան 24 Յունիսին:

 

Share.

Leave A Reply