ՄԱՐԶԱԿԱՆ՝  Յունիս Ա./2018

0

ՀԱՅԿԱԿԱՆ

ՔիքՊոքսինկ.  Յարութ Գրիգորեան Պարտութեան Մատնեց Ազերի Մարզիկը

Անգլիոյ Պիրմինկըմ քաղաքին մէջ տեղի ունեցաւ քիք-պոքսինկի «Glory 54» մրցաշարքը: «Glory World Series»ի կիսամիջին ծանրութեան կարգի աշխարհի ախոյեան Յարութ Գրիգորեան պաշտպանեց իր տիտղոսը` յաղթելով Ազերի ներկայացուցիչ Ալիմ Նապիեւին:Մենամարտը տեւեց հինգ ռաունտ եւ մրցավարներու միաձայն որոշումով յաղթանակը տրուեցաւ հայ մարզիկին (48-47, 49-46, 49-46, 50-45, 50-45):«Այս յաղթանակը կը նուիրեմ Հայաստանին: Բոլորին ապացուցեցի, որ իսկական ախոյեան եմ ու կը մրցիմ բոլոր անոնց հետ, որոնք կ՛ուզեն ձեռք ձգել այս տիտղոսը», ըսաւ Գրիգորեան:

Յիշենք, որ Գրիգորեան առաջին անգամ է որ կը պաշտպանէ ախոյեանական գօտին:

ՄԻՋԱԶԳԱՅԻՆ

Զետան Հրաժարեցաւ Իր Պաշտօնէն

Չորեքշաբթի օր, Սպանիոյ թագաւորական ակումբի՝ Ռիալ մատրիտի ֆրանսացի գլխաւոր մարզիչ Զենատտին Զետան իր հրաժարականը ներկայացուց: Թէեւ այս տարի Զիտան խումբին հետ նուաճեց միայն եւրոպայի «Չեմփիընզ Լիկ»ի տիտղոսը, բայց եւ այնպէս այս յաղթանակը եղաւ պատուաբեր եւ յատկանշական, որովհետեւ ան սոյն մրցանակին հերթական երրորդ տիտղոսն էր: Զետան մամլոյ ասուլիսի հրաւիրեց սպանական թերթերուն թղթակիցները, որոնց ըսաւ. «Այս խումբը պիտի շարունակէ յաղթել, հոն պէտք է ըլլան փոփոխութիւններ: Շնորհակալ եմ բոլորէն արքայական ակումբին մարզիչի պաշտօնը ինծի վստահելնուն համար: Շատ ուրախ եմ, որ խումբին հետ յաջողութիւններու հասայ եւ ձեռք բերի կարեւոր նուաճումներ»:

Աւելցնենք, որ ֆրանսացի մարզիչը իր պաշտօնը ստանձնած էր 2016-ի Յունուարին եւ արժանացած էր զանազան տիտղոսներու.- «Չեմփիընզ Լիկ» 3 անգամ, «Սպանիոյ Ախոյեանութիւն» 1 անգամ, «Սպանիոյ Գերբաժակակիր» 1 անգամ եւ «Աշխարհի Ակումբներու Ախոյեան» 2 անգամ:

Արսենալ Հետաքրքրուած է Մեհտի Պըն Աթիայով

Le10Sport կայքը յայտնեց, թէ Լոնտոնի Արսենալը պաշտպանութեան գիծը ուժեղացնելու նպատակով մտադիր է ձեռք բերել իտալական Ժուվենթուսի պաշտպան Մեհտի Պըն Աթիան: Մարոքի հաւաքականի պաշտպանը մինչեւ Իւվենթուս տեղափոխուիլը երկու տարի վարձավճարով հանդէս եկած էր Միւնխէնի «Բաւարիայի հետ: Ան իտալական խումբին հետ երկու անգամ դարձած է երկրի ախոյեան եւ  բաժակակիր: Ըստ նախնական տուեալներու, Իւվենթուս 31-ամեայ ֆութպոլիստին համար կը պահանջէ 25 միլիոն տոլարի փոխհատուցում: Արսենալը միաժամանակ կը փափաքի  ձեռք բերել Տորթմոնտի յոյն կիսապաշտպան Սոկրատիսը, որովհետեւ այդ դիրքին հանդէս եկող Պէր Մերտեզակէրը աւարտած է իր ելոյթները, իսկ Լորան Կոսելնին լուրջ վնասուածք ստացած է եւ չի կրնար խաղալ մինչեւ այս տարուան վերջը:

 

Փարիզ Սան Ժերման Առաջարկած է Ռոնալտոյի Միացումը Ֆրանսական Խումբին

Փարիզ Սան Ժէրմանի ֆութպոլային ակումբը սկսած է Ռիալ Մատրիտի յարձակողական խաղցող փորթուկալցի Քրիստիանօ Ռոնալտոյի հետ լուրջ բանակցութիւններ վարել՝ զայն միացնելու  ֆրանսական ակումբին, տարեկան 45 միլիոն եւրոյի յատկացումով: Ըստ փոխանցուած տեղեկութիւններուն,  ֆրանսիացիները պատրաստ են սպանական ակումբի ղեկավարութեան 150 միլիոն եւրօ վճարել խաղցողին համար, իսկ Ռոնալտոյի պայմանագիրով նախատեսուած փոխհատուցումը կը կազմէ 1 միլիար եւրօ:

Ռաֆֆի Սիւլահեան

Share.

Leave A Reply