ՀԱՆԴԻՍԱՒՈՐ ՊԱՇՏԱՄՈՒՆՔ՝ ՆՈՒԻՐՈՒԱԾ Հ.Հ. 100-ԱՄԵԱԿԻՆ

0

Հովանաւորութեամբ Սուրիոյ Հայ Աւետ. Համայնքի Համայնքապետ Վեր. Յարութիւն Սելիմեանի, Կիրակի, 27 Մայիս 2018-ի առաւօտեան ժամը 10։00-ին Հայ Աւետ. Բեթէլ եկեղեցիին մէջ տեղի ունեցաւ Հայաստանի Ա. Հանրապետութեան 100-ամեակին նուիրուած հանդիսաւոր պաշտամունք։

Պաշտամունքին ներկայ էին Հալէպի ՀՀ գլխաւոր Հիւպատոսը, Հայ Աւետ. Համայնքի պատկան մարմիններու ներկայացուցիչներ, Հայ Աւետ. դպրոցներու տնօրէններ, ուսուցչական կազմեր եւ հոծ բազմութիւն մը։

Պաշտամունքը սկսաւ Պատ. Սիմոն Տէր Սահակեանի աղօթքով, ան Աստուծոյ փառք եւ շնորհակալութիւն յայտնեց ազատ եւ անկախ հայրենիք ունենալնու համար։

Պաշտամունքին իրենց մասնակցութիւնը բերին Լենա Պաղտոյեան-Աշըգեան՝ «Երազ Իմ Երկիր» մեներգով, դաշնամուրի ընկերակցութեամբ Ռուզան Պարսումեանի, ապա  Տեսիլ Սարեան եւ Անժելլա Տաղլեան (ջութակ) եւ Ռուզան Պարսումեան (դաշնամուր) կատարեցին «Տեսնեմ Անին» կտորը։

Օրուան պատգամը արտասանեց Սուրիոյ Հայ Աւետ. Համայնքի Համայնքապետ Վեր. Յարութիւն Սելիմեան՝ հիմնուելով Աւետարանի «Գործք Առաքելոց գիրքին  17։26-30 համարներուն վրայ։

Ան ըսաւ, որ այսօր եզակի օր է Հայաստանի Առաջին Հանրապետութեան Անկախութեան, հայ ժողովուրդին կորսնցուցած արժանապատուութեան վերատիրացման։ Այս թուականը մեր պատմութեան մէջ արձանագրուեցաւ հերոսներու սխրագործութեամբ եւ նահատակներու արեամբ: Այսօր, Հայ ժողովուրդը Հայրենիքէն մինչեւ Սփիւռք կը յիշատակէ ազատ, անկախ հայրենիք, պետական զարգացող համակարգ, հաւասարակշռուած հասարակարգ ունենալու տօնը: Ան շեշտեց Աստուծոյ խօսքին դերակատարութիւնը մեր պատմութեան, ազգին եւ իրաւունքներու վերատիրացման ուղիին մէջ։ Վերապատուելին ըսաւ, որ Աստուածային նախաձեռնութիւնը բոլոր ազգերը նոյն արիւնէն կ’ընէ եւ կը հաւասարեցնէ զանոնք արդար գահին ու դատաստանին առջեւ։ Երբ հաւասար կը դիտենք զիրար, յարգանք կ՛ունենանք իրարու հանդէպ։ Մարդոց յարաբերական կեանքին մէջ կը պակսի յարգանքը՝ մեր անձին եւ այլոց արժանիքներուն հանդէպ։ Յարգանքը մարդոց կեանքին մէջ, հաւասարակշռութիւն ստեղծելու եւ զայն երաշխաւորելու միակ միջոցն է։

Ապա թելադրեց տէր կանգնիլ մեր հարիւրամեայ պետութեան, որպէսզի հասնինք Ազատ, Անկախ եւ Միացեալ Հայաստանին։

Վերապատուելին աւարտելով ըսաւ.«Թող Աստուծոյ օրհնութիւնը մեր պետութեան եւ մեր ժողովուրդին հետ ըլլայ: Բարի երթ ազատ, անկախ, Հայաստանին»։

Պատգամէն ետք Արամ Խաչատուրեան մեներգեց «Հայաստան» երգը, որմէ ետք Կիրակնօրեայ դպրոցներու փոքրիկները ներկաները խանդավառեցին «Գետաշէն» եւ «Երեւան Դարձած» երգերով։

Վեր. Համայնքապետը ողջունելով ՀՀ Հալէպի Գլխաւոր Հիւպատոս Արմէն Սարգիսեան՝ հրաւիրեց զայն այս առիթով իր խօսքը տալու։ Հիւպատոսը հակիրճ ձեւով անդրադարձաւ 1918-ի պատմականին, ապա մէջբերումներ ըրաւ Արամ Մանուկեանի խօսքէն։ Ինչպէս նաեւ դիտել տուաւ, որ ամէն տարի 28 Մայիսին Սարդարապատի յուշակոթողին մօտ կը զետեղուին 3600 թարմ ծաղիկներ՝ ի յիշատակ այն զոհերուն, որոնց արեամբ կերտուեցաւ Մայիսեան հրաշափառ յաղթանակը։ Հայաստանի Առաջին Հանրապետութիւնը հիմքը դարձաւ յաջորդ հանրապետութիւններուն։

Հիւպատոսը դիտել տուաւ, որ մայիսեան նահատակներուն պէտք է միացնել նաեւ Արցախի նահատակները, ապա իր խօսքը աւարտեց Գէորգ Էմինի «Յաւերժի Ճամբորդը» ստեղծագործութենէն մէջբերում մը կատարելով:

Պաշտամունքը վերջ գտաւ Տէրունական աղօթքով եւ Վեր. Համայնքապետի Առաքելական օրհնութեամբ։

Յետ պաշտամունքին ներկաները ուղղուեցան եկեղեցւոյ շրջափակ, ուր ՀՄԸՄ-ի փողերախումբը հայրենասիրական եւ ազգային երգերով թնդացուց ամբողջ շրջանը։

 

Թղթակից

 

Share.

Leave A Reply