ՏԷՐ ԶՕՐԻ ՍՐԲՈՑ ՆԱՀԱՏԱԿԱՑ ՀԱՅԿԱԿԱՆ ԵԿԵՂԵՑԻՆ ԵՒ ՅՈՒՇԱՀԱՄԱԼԻՐԸ ՎԵՐԱՆՈՐՈԳԵԼՈՒ ՄԱՍԻՆ ՈՐՈՇՈՒՄ ԿԱՅԱՑԱԾ Է

0

Սուրիոյ խորհրդարանի հայազգի երեսփոխան, Բերիոյ Հայոց Թեմի մամուլի խօսնակ Ժիրայր Րէիսեան «Հայերն այսօր»ի հետ զրոյցի մը ընթացքին ըսաւ. «Դեկտեմբեր 2016-ին Հալէպի ազատագրումը անկիւնադարձային եղաւ սուրիահայերուն համար. ներկայիս Հալէպը շատ աւելի կայուն վիճակի մէջ կը գտնուի: Կային կենցաղային դժուար պայմաններ, որոնք այսօր արդէն տարբեր միջոցներով յաղթահարուած են, ճամբաները օրըստօրէ կը բացուին, լուծուած է ջրամատակարարման ու վառելանիւթի հարցը, քիչ տատանումներով վերականգնուած է ելեկրտականութիւնը», աւելցնելով, որ սուրիահայերը բնականոն հունով կ’ապրին, զբաղած են իրենց առօրեայ աշխատանքներով եւ բնակարանները վերանորոգելով:

Ան յայտնեց նաեւ, որ ազգային հաստատութիւնները, եկեղեցիները, ակումբներն ու դպրոցները ամենածանր օրերուն անգամ չեն դադրեցուցած ազգապահպան գործունէութիւնը: Զգալի վնասներ կրած Քարէն Եփփէ Ազգային Ճեմարանի երկու շէնքերէն մէկը այս տարեշրջանին վերանորոգուած է, յաջորդիւ շինարարական աշխատանքներ պիտի կատարուին Հալէպի հայ Ազգային Պատսպարանի, Սուրիահայ Օգնութեան Խաչի Ընկերաբժշկական կեդրոնի եւ շարք մը ազգային կառոյցներու վերականգնումին ուղղութեամբ:

«Կը կարծեմ, որ մօտ ժամանակաշրջանի մէջ որոշակի անվտանգութեան հարցեր լուծելէ ետք, բանիլ կը սկսի նաեւ Հալէպի միջազգային օդակայանը. Սուրիոյ կառավարութիւնը լուրջ աշխատանքներ կը տանի այդ առումով: Որոշ շրջաններու մէջ տակաւին կան զինեալ ահաբեկչական խումբեր եւ բնականոն թռիչքներու պարագային կրնան հրթիռակոծումներ տեղի ունենալ, հետեւաբար, անվտանգութեան նկատառումներէն ելլելով, կառավարութիւնը տակաւին պաշտօնապէս չէ սկսած օդակայանը վերագործարկել», ըսաւ Ժիրայր Րէիսեան:

Իր խօսքին մէջ սուրիահայ երեսփոխանը նաեւ ընդգծեց, որ Քեսապի ու Լաթաքիոյ հայերն ալ կ’ապրին սովորական հունով: Այն մարդիկ, որոնք Հալէպէն տեղափոխուած էին Լաթաքիա կամ Քեսապ, աստիճանաբար կը վերադառնան Հալէպ, Դամասկոսը նոյնպէս կարելի է ազատագրեալ տարածք համարել:

«Ճիշդ է, ազատագրուեցաւ նաեւ Տէր Զօրը, բայց այնտեղ հայ բնակիչ գրեթէ չմնաց, սակայն ունինք կիսաքանդ Սրբոց Նահատակաց հայկական եկեղեցին: Բերիոյ Հայոց Թեմի Առաջնորդ Շահան Արք. Սարգիսեանի՝ Մարտ ամսուն ազգային իշխանութեան ներկայացուցիչներու հետ Տէր Զօր կատարած այցելութենէն ետք եկեղեցին եւ յուշահամալիրը վերանորոգելու որոշում առնուած է», յայտնեց Րէիսեան:

Share.

Leave A Reply

This site uses Akismet to reduce spam. Learn how your comment data is processed.