ՍՈՒՐԻԱՀԱՅ ՆԱՀԱՏԱԿՆԵՐՈՒ ԵՒ ԸՆԿ. ՌԱՖՖԻ ՊՉԱՔՃԵԱՆԻ ՀՈԳԵՀԱՆԳՍՏԵԱՆ ՊԱՇՏՕՆ

0
ԳՐԻԳՈՐ ՏՈՒՆԿԵԱՆ. «ՄԵՆՔ ՉԵՆՔ ՍԳԱՐ, ԱՅԼ ԿԸ ՄԵԾԱՐԵՆՔ ԾԱՌԱՅՈՒԹԻՒՆԸ ՄԵՐ ՆԱՀԱՏԱԿ ԸՆԿԵՐՈՋ»
 
Կիրակի, 10 Յունիս 2018-ին, Հալէպի հայ առաքելական Ս. Գրիգոր Լուսաւորիչ եկեղեցւոյ մէջ, սուրիահայ նահատակներու հոգւոյն եւ հայաշատ թաղերու ինքնապաշտպանութեան ղեկավար, ընկ. Ռաֆֆի Պչաքճեանի նահատակութեան երկրորդ տարելիցին առիթով հոգեհանգստեան պաշտօն կատարուեցաւ, ներկայութեամբ Ռաֆֆի Պչաքճեանի ընտանիքի անդամներուն, հարազատներուն, գաղափարակից ընկերներուն եւ Ազգ. Վարչութեան ներկայացուցիչներուն։
 
Յետ հոգեհանգստեան արարողութեան, նահատակ ընկ. Ռաֆֆի Պչաքճեանի ընտանիքն ու գաղափարակից ընկերները ցաւակցութիւններ ընդունեցին Նոր Գիւղի «Տիգրանեան» սրահէն ներս։
 
Տիար Գրիգոր Տունկեան խօսք առնելով ըսաւ. «Նահատակութեամբ յաւերժութեան ուղեգիր ստացած, Հալէպի հայաշատ թաղամասերու ինքնապաշտպանութեան գործի պատասխանատու ընկեր Ռաֆֆի Պչաքճեանի նահատակութեան երկրորդ տարելիցին առիթով, այսօր մեր վիշտն ու ցաւը, յաւերժական կորուստի զգացումը սանձած, կուգանք անոր նահատակութեամբ պսակուած ծառայութիւնը մեծարելու։ Մենք չենք եկած սգալու։ Մենք կը մեծարենք ծառայութիւնը մեր նահատակ ընկերոջ, որ օր մը, հաւատալով հայ ժողովուրդի ու հայրենիքի յաւերժութեան, տուած էր իր երդումը գաղափարական այն հանգանակին, որ մեր յաւերժական ժողովուրդի ու յաւերժական հայրենիքի ծառայութեան կ՚առաջնորդէր՝ թէկուզ ազնուագոյնը նուիրաբերելով։ Միթէ՞ կայ աւելի ազնիւ բան, քան սեփական կեանքը։
 
«Այսօր, կը խոնարհեցնենք մեր գլուխները՝ առ ի յարգանք իր ուխտին հաւատարիմ մեր ընկերոջ՝ Ռաֆֆի Պչաքճեանի յիշատակին, վերանորոգելով մեր ուխտը եւ իր անունին ու կերպարին մէջ տեսնելով հազարաւոր մեր այն նահատակները, որոնք քալեցին ծառայութեան նոյն ուղիէն։ Անոնք չփնտռեցին փառք ու բարօրութիւն։ Այդ բոլորը վերապահեցին հայ ժողովուրդին ու հայրենիքին։ Անոնք միայն ծառայելու իրաւունքը փնտռեցին եւ այդ ծառայութիւնը դարձաւ իրենց նահատակութեան դափնին։
«Յարգանք բոլոր այն նահատակներուն, որոնք հաւատարմութեամբ ամրագրեցին 128 տարիներու մեր երթը։ Յարգանք բոլոր անոնց, ծանօթ թէ անծանօթ, որոնք ընտրեցին ծառայութեան նոյն ուղին՝ յանուն մեր ժողովուրդի բարօրութեան»։
 
Այնուհետեւ, Տէր Յուսիկ Աւագ Քահանայ Սեդրակեան եւ Տէր Մաշտոց Քահանայ Արապաթլեան աղօթեցին վասն «հոգւոց ննջեցելոց» հայցելով յաւիտենական հանգիստ:
 
Ցուցադրուեցաւ նահատակ ընկ. Ռաֆֆի Պչաքճեանի մասին տեսերիզ մը, ուր հնչեցին նաեւ իր խօսքերը՝ ուղղուած հալէպահայ երիտասարդութեան։
 
Հուսկ, ներկաները ուղղուեցան Ազգ. Քարէն Եփփէ Ճեմարանի շրջափակին մէջ գտնուող Ռաֆֆի Պչաքճեանի նահատակութեան վայր, խունկ ու մոմ վառեցին առ ի յարգանք անոր յիշատակին։
Share.

Leave A Reply

This site uses Akismet to reduce spam. Learn how your comment data is processed.