ASİMDER-Ի ՆԱԽԱԳԱՀԻՆ ՄԷԿԱՅԼ ՀԵՐԻՒՐԱՆՔԸ. «ՀԱՅ ԳՈՐԾԱԿԱԼՆԵՐ ԱԶԱՏՕՐԷՆ ԿԸ ՇՐՋԻՆ ՍԵՒԾՈՎԵԱՆ ՇՐՋԱՆԻՆ ՄԷՋ»

0

Ըստ Akunq.net-ի, թրքական Habertürk-ը կը հաղորդէ, որ հայկական անհիմն պնդումներու դէմ պայքարի» միութեան նախագահ Կէօքսէլ Կիւլպէյ վերստին հանդէս եկած է հակահայկական յայտարարութեամբ: Կիւլպէյ այս անգամ մասնաւորապէս ըսած է, որ իբրեւ թէ հայ գործակալներ, զբօսաշրջիկի, լրագրողի կամ գիտնականի անուան տակ, ազատ ու հանգիստ կը շրջին Թուրքիոյ Հանրապետութեան Սեւծովեան շրջանին մէջ:

Աղբիւրին համաձայն, ASİMDER-ի նախագահը շեշտած է, որ հայկական ծագում ունեցող որոշ լրագրողներ, ուսումնասիրողներ, զբօսաշրջիկներ, հաղորդավարներ կամ քաղաքացիական հասարակական կազմակերպութեան ներկայացուցիչներ` Հայաստանի, Վրաստանի, Ռուսաստանի կամ եւրոպական երկիրներու անձնագիրներով, կու գան Թուրքիոյ Սեւծովեան շրջան (այստեղ կը գտնուի համշէնահայերով հոծ բնակավայրեր և բուն Համշէնը-Ակունքի խմբ.) եւ կը փորձեն յատկապէս Ռիզէ և Արտուին նահանգներ ապրող համշէնցիները «համոզել», որ անոնք ունին հայկական ծագում եւ կը խօսին հայերէն:

Ան ընդգծած է նաեւ, որ նման ուսումնասիրողներ, ինչպէս օրինակ ԵՊՀ դասախօս Լուսինէ Սահակեան, վաւերագրական շարժանկարներ են նկարահանեն եւ զանոնք կը ցուցադրեն ՀՀ պետական պատկերասփիւռի կայանով: Կէօքսէլ Կիւլպէյ յիշատակած է նաեւ նիւ եորքաբնակ արժանթինահայ լրագրող Աւետիս Հաճեանի անունը:

Ապա աւելցուցած, որ ASİMDER-ը զգօն և աչալուրջ է նման անձերու ու միութիւններու գործունէութեան նկատմամբ. «Անոնք (հայերը–Ակունքի խմբ.) կը ձգտին Սեւծովեան շրջանին մէջ հայկական լոպպիստական շարժում ստեղծել եւ հայկական լոպպիին կողմէ աջակցութիւն ստացող զանազան տեղական միութիւններուն (նկատի ունի Թուրքիոյ համշէնական ՀԱՏԻԿ միութիւնը–Ակունքի խմբ.) միջոցով մեր համշէնցի եղբայրները հրահրել պետութեան և կառավարութեան դէմ»:

ASİMDER-ի նախագահը անդրադարձած է նաեւ Թուրքիոյ մէջ գործող համշէնցիներու հիմնադրամին եւ ըսած, որ Իսթանպուլի մէջ հիմնուած սոյն հաստատութիւնը մասնաճիւղ ունի նաև Արտուին նահանգին մէջ, եը թրքական պետական իրաւասու մարմիններուն կոչ ուղղած ուսումնասիրութիւն կատարել այդ հիմնադրամին եւ ՀԱՏԻԿ միութեան նիւթական միջոցներուն շուրջ` թերեւս ենթադրելով, որ այդ ֆինանսական աղբիւրները կրնան հայկական ըլլալ:

Յիշենք, որ ASİMDER եւ այս կառոյցի նախագահ Կէօքսէլ Կիւլպէյ յատկապէս անցեալ տարի, յաճախ կ՚անդրադառնային Թուրքիոյ համշէնահայութեան հիմնահարցին։ Այսպէս, օրինակ, Փետրուար 2017-ին Կէօքսէլ Կիւլպէյ յայտնած էր, թէ Հայաստանի հայերը գաղտնի ծրագիրներ կը մշակեն Թուրքիոյ Սեւծովեան շրջանին մէջ։ Անոր խօսքով, հայերը ուսումնասիրութիւններ կը կատարեն համշէնցիներու բնակավայրերուն մէջ եւ կը ձգտին տեղւոյն բնակչութիւնը համոզել, որ իրենք հայկական ծագում ունին։ ASIMDER-ի նախագահին համաձայն՝ հայերը գաղտնի աշխատանքներու միջոցով կը փորձեն Թուրքիոյ Սեւծովեան շրջանէն հողային պահանջ ձեւաւորել։

Եթէ անցեալ տարուան Փետրուարին Կէօքսէլ Կիւլպէյ այդ նիւթին անդրադարձած պահուն հարցը ընդհանրացնելով «Հայաստան» կ՚ըսէր, Սռպտեմբեր 2017-ին մասնաւորելով կը յիշէր, որ այդ աշխատանքներուն ետին կանգնած է ՀՀ Սփիւռքի Նախարարութիւնը։ «Տողան» լրատուական գործակալությշեան եւ «Հիւրիէթ» օրաթերթին համաձայն, Կէօքսէլ Կիւլպէյ յայտարարած էր, որ ՀՀ Սփիւռքի Նախարարութիւնը եւ հայկական լոբբիստական կազմակերպութիւններու կողմէ հովանաւորուող որոշ կառոյցներ ու գիտնականներ, Թուրքիոյ Սեւծովեան շրջանը ապրող համշէնցիները օգտագործելով ու պնդելով, թէ այս տարածքէն ներս կիրառուող համշէներէնը հայերէնի մէկ բարբառն է, հանդէս պիտի գան նախ` մայրենի լեզուով կրթութեան, ապա` հողային պահանջով: ASİMDER-ի նախագահը ենթադրած էր նաեւ, թէ հայկական լոպպիստական կազմակերպութիւնները, որոնց կեդրոնը կը գտնուի Եւրոպայի մէջ, Թուրքիոյ Սեւծովեան շրջանի համշէնցիներուն պիտի թելադրեն «համշէնական սփիւռք» ստեղծել իրենց եւրոպաբնակ ազգականներով. «Հայկական լոպին կը ձգտի ձեւաւորել եւրոպաբնակ համշէնցիներէ բաղկացած «համշէնական սփիւռք», որ պիտի պաշտպանէ անոնց վերադարձը պապենական հողեր, կարծես թէ բռնի կերպով այդտեղէն աքսորուած են: Այդ փորձերուն հետ մէկտեղ, սոյն տարածքէն ներս գործունէութեան դաշտ որոնող ՀՀ Սփիւռքի Նախարարութիւնը իր աջակցութեամբ գործող որոշ կազմակերպութիւններու միջոցով կը ձգտի հաւաքել կողմնակիցներ, ովքեր Ռիզէ և Արտուին նահանգներուն մէջ քննարկումներ և գիտաժողովներ կը կազմակերպեն` համշէնցիներու հայ ըլլալուն եւ համշէներէնին` իրականութեան մէջ հայերէն բարբառ ըլլալուն նիւթով։

Share.

Leave A Reply