ԱՐԾՈՒԻԿ ՄԻՆԱՍԵԱՆ. «ԱՅՍՕՐՈՒԱՆ ԴԷՊՔԸ ՑՈՅՑ ՏՈՒԱՒ, ՈՐ ԱՅՍ ԿԱՌԱՎԱՐՈՒԹԻՒՆԸ՝ Ի ՏԱՐԲԵՐՈՒԹԻՒՆ ՆԱԽՈՐԴՆԵՐՈՒՆ, ՉԻ ԹԱՔՑՆԵՐ ՄԱՐՏԱՀՐԱՒԷՐՆԵՐԸ»

0

«Առաջին լրատուական»ի զրուցակիցն էր տնտեսական զարգացման եւ ներդրումներու նախարար Արծուիկ Մինասեան:

–Կառավարութեան նիստերուն հրապարակային ընթացքը մեծ առաւելութիւն ունի. այսօր հետեւած եմ նիստին, եւ մեր զրոյցը կ’ուզեմ կեդրոնացնել այն դրուագին վրայ, ուր դուք կը բանավիճէիք, թէ ինչպէ՛ս պէտք է վարուիլ կուտակային հիմնադրամի հետ, եւ ինչ վտանգներ կան: Եթէ համեմատէք նոր եւ նախկին իշխանութիւններու հետ աշխատանքը, որո՞ւ հաշուոյն կը գրանցէք Դաշնակցութեան գնահատականը:

Արծուիկ Մինասեան.- Նախկինին ալ, հիմա ալ, մենք կը փորձենք կեանքի կոչել մեր մօտեցումներն ու սկզբունքները, կը փորձենք կեանքի կոչել ծրագիրներ, որոնց համար պայքարած ենք եւ համոզուած ենք անոնց ճշմարտութեամբ: Եթէ նախկին կառավարութեան շրջանին մէջ պայքարը քուլիսային էր՝ ոչ եթերային, ապա նոր կառավարութեան, նոր իշխանութեան պայմաններուն մէջ աւելի հրապարակային է, բայց պայքարի սրութիւնը չէ նուազած: Ի տարբերութիւն նախորդ շրջանի, այսօր կառավարութիւն կազմած ուժերը մեծամասնութեամբ նոյն տեսակէտը ունէին բազմաթիւ, ինչպէս նաեւ պարտադիր կուտակայինի հարցին մէջ, եւ ատիկա կը դիւրացնէ աշխատանքը: Ժամանակին բարձրաձայնած ենք եւ ժամանակին Սահմանադրական դատարանին մէջ 2 անգամ վիճարկած ենք պարտադիր կուտակայինի օրէնքը, Սահմանադրական դատարանը կայացուցած է հիմնարար որոշումներ, բացայայտած բազմաթիւ վտանգներ, բացայայտած, որ պարտադիր կուտակայինը, ըստ էութեան, այնպիսի պարագայի բնորոշ երեւոյթ է, ուր անպայման պէտք է մուտք ըլլայ պետական պիւտճէ, եւ պետութիւնը, իբրեւ պիւտճէի կառավարիչ, ինքը պէտք է որոշում կայացնէ, թէ այդ միջոցները ինչ արդիւնաւէտութեամբ ծախսէ, որպէսզի երաշխաւորէ, որ նախ պիտի չնուազին անոնք, եւ երկրորդ՝ այս միջոցները պիտի օգտագործուին տնտեսութեան զարգացման համար: Այս մօտեցումները, ընդհանուր առմամբ, այսօրուան գործող համակարգը հաւանաբար լիարժէքօրէն չ’արտացոլացներ: Որքան ալ մենք խօսինք վստահելի միջավայրի մասին, այո, կայ այդ վստահելի միջավայրը ներկայ կառավարութեան նկատմամբ, կայ կալուածամասերու կառավարիչներու արդիւնաւէտ աշխատանքը, բայց երկարաժամկէտ հատուածի մէջ սահմանադրականութիւնը կը շարունակէ մնալ օրակարգային հարց: Այսօրուան քննարկումը ամենեւին նպատակ չունի Հայաստանի ներդրումային միջավայրը վատթարացնելու, հակառակը՝ այս քննարկումներով կարելիութիւն կու տանք ընկալելու, որ Հայաստանի մէջ կարեւոր կը համարուի սահմանադրականութեան հարցը:

 

-Կառավարութիւնը այսօր ընդունեց ամենաբարենպա՞ստ որոշումը:

-Այս վիճակին մէջ ամենաբարենպաստ որոշումն էր ասիկա, որովհետեւ 1 Յուլիսէն ուժի մէջ պիտի մտնէր պարտադիր բաղադրիչը:

-Այդ պարագային ինչո՞ւ կը յիշեցնէք ձեր հին սկզբունքը:

-Առաջին՝ ասիկա մեր ներկայ կառավարութեան կարեւորագոյն օրակարգային հարցերէն է, երկրորդ՝ որեւէ ձեւով պարտադիր կուտակայինի վտանգները մենք պէտք չէ նսեմացնենք, նոյնիսկ այսօր բարձր եկամտաբերութիւն ցոյց տուող կառավարման վիճակին լոյսին տակ:

 

-Այսինքն՝ կառավարութիւնը գացած է ճի՞շդ ճամբով, որուն կը փորձէիք դէմ ըլլալ:

-Ես դէմ եմ այն համակարգին, որ պարտադիր կուտակային կը կոչուի. ասիկա այդ երեւոյթի մեղմացման գործողութիւնն է: Մենք աւելի շատ կողմնակից էինք համակարգը լիարժէք վերլուծելու եւ հասկնալու…

 

-Այսօր կառավարութեան մէջ յստակ ըսուեցաւ՝ մենք կը հետեւինք սահմանադրականութեան եւ մեր երկրի անվտանգութեան առնչուող վտանգներուն, ատիկա կը նշանակէ՞, որ այս կառավարութիւնը, ինչ որ ժառանգած ըլլայ նախորդէն, ընտրած է ճիշդ ճամբան:

-Այո՛, այսօրուան մեր քննարկումը հաստատեց այդ հանգամանքը, կառավարութեան անունով վարչապետի հնչեցուցած միտքը ճիշդ այս մասին էր:

-Այսօր պահ մը մոռցած էիք, որ դուք համաձայնութեան կառավարութեան մէջ էք:

-Ո՛չ, երբեք չենք մոռցած, որովհետեւ կան մարտահրաւէրներ, որոնք մենք ձեւակերպած ենք մեր կառավարութեան առջեւ, եւ անոնց լուծումին համար համաձայնութիւններ ձեռք կը բերենք:

–Նաեւ ձեր պատասխանատուութեան մասով, անկախ անկէ՝ այս ծրագիրը ինչ ճակատագիր կ’ունենայ յառաջիկայ ամիսներուն:

-Այո՛: Եթէ կը կրենք պատասխանատուութիւն, ատիկա լիարժէք է: Խօսքը նախ եւ առաջ քաղաքական պատասխանատուութեան մասին է:

 

-Կառավարութեան ծրագիրին տրուած գնահատականները որքանո՞վ  առարկայական են:

-Կը կարծեմ՝ աւելի շատ ենթակայական եւ անհատական ցանկութիւններ էին, բայց ոչ առարկայական: Քաղաքական այն յայտարարագիրը, որ վարչապետը ներկայացուց, ըստ էութեան, յառաջիկային՝ մինչեւ արտահերթ ընտրութիւններ, մեր ընելիքներն են:

 

–Մենք այսօր 7 միլիառէ աւելի արտաքին պարտք ունինք, եւ անկէ Հայաստանի կեանքը չէ բարելաւուած, դուք երկար ատեն եղած էք իշխանութեան մէջ, ըսէք՝ ինչո՞ւ:

-Արտաքին պարտքը ոչինչ է, եթէ ունինք արդիւնաւէտ տեղաբաշխումի եւ վերադարձնելու մեքանիզմ: Մեր արտաքին պարտքի հետ կապուած հարցը այն է, որ յաճախ որոշումները առնուած են, նոյնիսկ առանց մեր մասնակցութեան, բայց մենք այդ որոշումներու տէրն ու պատասխանատուն ենք, մենք կարիք ունինք պարտքի վերլուծութեան եւ, առանձին պարագաներու, նոյնիսկ պարտքի մարման նոր ծրագիրներու ներդրումին… Արտաքին պարտքի երկրորդ բաղկացուցիչը այն է, որ մենք, այնուամենայնիւ, չենք ներդրած տնտեսական այն ձեւաչափը, որ կ’ապահովէ երկարաժամկէտ, կայուն առաջընթաց: Եւ հիմա նաեւ համաշխարհային զարգացումները տնտեսական ձեւաչափի անունը կը դնեն ներառական տնտեսական աճի ձեւաչափ, որ կը նշանակէ՝ բոլոր երեւոյթները պէտք է նկատի առնենք տնտեսական աճը գնահատելու ընթացքին:

– Դուք աշխատած էք շատ մը վարչապետներու հետ, նախապէս եղած էք տնտեսութեան, այնուհետեւ բնապահպանութեան նախարար, որո՞ւ հետ աւելի հեշտ է աշխատիլը:

-Կը կարծեմ՝ աւելի համահունչ աշխատանքը Նիկոլ Փաշինեանի հետ է, որովհետեւ քաղաքական անցած ճամբան եւ խորհրդարանական փորձը շատ աւելի դիւրին կը դարձնէ աշխատանքը: Բնականաբար Յովիկ Աբրահամեանի խորհրդարանական փորձառութիւնն ալ կար, բայց քիչ մը այլ վիճակ էր: Կարէն Կարապետեանը առհասարակ խորհրդարանական փորձ չունէր:

-Որուն պատճառով յաճախակի բախումներ կ’ունենաիք՝ տարբեր առիթներով:

-Մնամ առանց մեկնաբանութեան: Իսկ Նիկոլ Փաշինեանի հետ աշխատանքը շատ աւելի արդիւնաւէտ է:

 

Share.

Leave A Reply