ԱՐՄԷՆ ՌՈՒՍՏԱՄԵԱՆԻ ՊԱՏԱՍԽԱՆԸ ՆԻԿՈԼ ՓԱՇԻՆԵԱՆԻՆ. «ԱՍԻԿԱ ՄԵԶԻ ՀԻՆ ՈՒ ԲԱՐԻ ԺԱՄԱՆԱԿՆԵՐԸ ԿԸ ՅԻՇԵՑՆԷ»

0

Հայաստանի Հանրապետութեան Ազգային Ժողովի ՀՅԴ խմբակցութեան ղեկավար Արմէն Ռուստամեան 11 Յունիսին խորհրդարանէն ներս լրագրողներու հետ զրոյցի մը ընթացքին անդրադարձաւ կառավարութեան նիստին մէջ տեղի ունեցած դէպքին:

Յիշեցնենք, որ վարչապետ Նիկոլ Փաշինեան կոշտ բանավէճի մէջ մտած էր Դաշնակցական նախարար Արծուիկ Մինասեանի հետ, երբ վերջինը ըսած էր, որ ՀՅԴ-ն սկզբունքօրէն դէմ է կենսաթոշակային պարտադիր կուտակային բաղադրիչին:

«Կառավարութեան մէջ ամէն մէկը իր տեսակէտը կրնայ հնչեցնել, բայց ասիկա նաեւ քաղաքական եւ համախմբուած մարմին է, կառավարութիւնը միաձայն որոշումներով պէտք չէ առաջ երթայ: Բայց եթէ կան տարակարծութիւններ գլխաւոր սկզբունքային հարցերու շուրջ, ոչ ոք կրնայ ոեւէ մէկը ստիպել, որ ան քուէարկէ, որովհետեւ մեծամասնութիւնը այդպէս կ’ուզէ: Ասիկա մեզի հին ու բարի ժամանակները կը յիշեցնէ, այդ մեթոտները մեզի համար բացարձակապէս անընդունելի են», ըսաւ ան:

Արմէն Ռուստամեան յայտնեց, որ իրենք երբեք կողմ չեն եղած պարտադրանքով համաձայնեցումին ու միաձայնութեան:

Անդրադառնալով Նիկոլ Փաշինեանի այն յայտարարութեան, թէ անոնք որոնք այս պարտականութիւնները չեն ստանձներ, իրենց հետ չեն, Արմէն Ռուստամեան ըսաւ. «Ես այդ գաղափարախօսութիւնը կտրականապէս կը մերժեմ: Ով որ մեր հետ չէ, մեր դէմ է, աս ալ կը յիշեցնէ քիչ մը աւելի սթալինեան ժամանակաշրջանը»:

ՀՅԴ խմբակցութեան քարտուղարը ըսաւ, որ իրենք իրենց սկզբունքներուն ու մօտեցումներուն պաշտպանն են, եթէ որեւէ համագործակցութեան կամ դաշինքի մէջ կը մտնեն, իրենց սկզբունքներէն չեն հրաժարիր:

Արմէն Ռուստամեան Նիկոլ Փաշինեանին նաեւ յիշեցուց, որ տակաւին սուփըրվարչապետութեան համակարգը կը պահպանուի: «Սուփըրվարչապետութեան մասին կը խօսէին, հիմա հարցերուն հարցը ճիշդ այն է, որ վարչապետի լիազօրութիւնները նուազեցնելու ուղղութեամբ պէտք է յստակ քայլեր կատարուին: Տակաւին այդ քայլերը չեն կատարուիր», ընդգծեց ան:

Share.

Leave A Reply