ԱՐԾՈՒԻԿ ՄԻՆԱՍԵԱՆ. «ԴԷՄ ԵՄ ՊԱՐՏԱԴԻՐ ԿՈՒՏԱԿԱՅԻՆԻՆ, ԹԷԵՒ ԿԸ ՀԱՍԿՆԱՄ, ՈՐ ԱՌԱՋԱՐԿՈՒՈՂ ԼՈՒԾՈՒՄԸ ՊԱՐՏԱԴՐՈՒԱԾ ԼՈՒԾՈՒՄ Է»

0

11 Յունիսին կառավարութեան արտահերթ նիստին, ուր ելեւմուտքի նախարար Ատոմ Ջանջուղազեան ներկայացուց «Կուտակային կենսաթոշակներու մասին» Հայաստանի Հանրապետութեան օրէնքին մէջ լրացումներ կատարելու մասին» օրէնքի նախագիծը, կառավարութեան անդամներու միջեւ ծաւալեցաւ բուռն բանավէճ:

Տնտեսական զարգացման եւ ներդրումներու նախարար Արծուիկ Մինասեան յայտնեց, որ այս հարցը կառավարութեան առջեւ դրուած դժուար լուծուող հարցերէն է:

«Պարոն վարչապետ, ձեր բացատրութիւնները ամբողջութեամբ, ներկայ պայմաններուն մէջ, ընկալելի են, բայց համոզմունքը, որ այս համակարգը լաւ է, պէտք է հասարակութեան մէջ ձեւաւորուի: Համակարգի մասնակից 200 հազար անձեր նոյնպէս պէտք է գնահատեն համակարգի առաւելութիւնները: Ես, որպէս մարդ, որ Սահմանադրական Դատարանի մէջ կրցայ ապացուցել կուտակային համակարգի շարք մը բացերը, այս պահուն դժուարութիւն կ՛ունենամ յայտնելու, թէ արդեօ՞ք Սահմանադրական Դատարանի որոշումները կատարուած են, թէ՝ ոչ, վտանգները վերացած են, թէ՝ ոչ: Համաձայն եմ, որ ֆինանսական կայունութեան տեսակէտէն կարեւոր է գործը առաջ տանիլը, որպէս պետութիւն: Բայց ունիմ մտահոգութիւններ տեղաբաշխուած միջոցներուն շուրջ, որովհետեւ ըստ ներկայացուած միջոցներուն, անոնց 70 տոկոսը բաշխուած է ոչ թէ Հայաստանի տնտեսութեան մէջ, այլ Հայաստանի մէջ: Նաեւ մեկնելով այն հանգամանքէն, որ երբեւէ չէ պատահած դէպք մը, որ ես, իբրեւ Դաշնակցութեան ներկայացուցիչ, կողմ քուէարկեմ պարտադիր կուտակային համակարգին, այս անգամ նոյնպէս կը մնամ իմ տեսակէտին վրայ: Դէմ եմ պարտադիր կուտակայինին, թէեւ կը հասկնամ, որ առաջարկուող լուծումը պարտադրուած լուծում է», ըսաւ Մինասեան: Ան աւելցուց, որ չ’ուզեր քննադատել այս որոշումը, ըմբռնումով կը մօտենայ գոյացած որոշումին:

Վարչապետ Փաշինեան առարկեց, ըսելով, որ կառավարութեան անդամները գործ ունին խմբային պատասխանատուութեան հետ:

«Եթէ դուք կ’ըսէք, որ ունիք հարցեր, որոնց պատասխանը չէք գիտեր, ուրեմն այդ հարցերու պատասխանը գտնելը ձեր աշխատանքային պարտականութիւնն է: Կամ այս խմբային պատասխանատուութիւնը կը վերցնենք, կամ չենք վերցներ: Կամ մենք կ’ուղղուինք խմբային այս լուծումին, կամ, կը ներէք, ես համաձայն չեմ անուղիղ գործողութիւններուն: Կամ մենք կը վերցնենք այս պատասխանատուութիւնը` առաջ երթալով, այլ ոչ թէ ետ, կամ չենք վերցներ: Որոնք որ այս պատասխանատուութիւնը կը վերցնեն, մեզի հետ են, որոնք որ չեն վերցներ, մեզի հետ չեն», ըսաւ Փաշինեան:

Արծուիկ Մինասեան աւելցուց, որ որպէս համախմբային որոշում, այն պիտի կատարուի իր կողմէ եւ ինք կը գնահատէ գոյացած որոշումին իրաւական անվտանգութեան կարեւորութիւնը, չի քննադատեր այդ որոշումը, բայց, քանի որ միշտ դէմ եղած է պարտադիր կուտակայինի էութեան, ապա հիմա չի կրնար այլ տեսակէտ յայտնել, ատիկա կը նշանակէ, որ դէմ է իր համոզումներուն:

Փաշինեան ըսաւ, որ ինքն ալ դէմ եղած է պարտադիր կուտակայինին, բայց հիմա որպէս վարչապետ, պէտք է լուծէ խնդիրը: Ատիկա պատասխանատու որոշում է, սակայն թոյլ չի տար, որ իր ղեկավարած կառավարութեան անդամները բաժնուին առաւել կամ նուազ սկզբունքայիններու:

Փոխվարչապետ Գրիգորեան ճշդում կատարեց ըսելով, որ կը փորձեն ընդունիլ այնպիսի որոշում, որ առաւելագոյն չափով ընդունելի եւ արդար ըլլայ կուտակայինի մասնակիցներուն, կողմնակիցներուն եւ ընդդիմացողներուն համար, ուստի օրէնքը յետաձգելը անարդար որոշում է: Փոխվարչապետ Տիգրան Աւինեան եւս յայտնեց, որ առաջարկուող լուծումը միակ հաւանական լուծումն է, եւ կը կարծէ, որ կառավարութեան բոլոր անդամները պէտք է կողմ քուէարկեն այդ որոշումին:

Արդարադատութեան նախարար Արտակ Զէյնալեան աւելցուց, որ պարտադիր կուտակայինը ճանչցուած է Սահմանադրական Դատարանին կողմէ հակասահմանադրական, սակայն ՍԴ-ը որոշումը չէ կատարուած, եւ 200 հազար մարդ արդէն ներգրաւած է այդ համակարգին մէջ: Հիմա կը գտնուին երկընտրանքի առջեւ. իրաւական անվտանգութիւնը պահպանել, կամ չպահպանել: Եւ հիմա ընտրած են նուազ ցաւոտ տարբերակը:

Փաշինեանի համոզումով, եթէ հիմա չընդունին այդ որոշումը, ճգնաժամը եւ իրաւական անհաւասարութիւնը կը խորանայ: Եթէ յետաձգեն օրէնքը, ապա կը յառաջանան ցնցումներ ողջ համակարգին մէջ:

 

Share.

Leave A Reply

This site uses Akismet to reduce spam. Learn how your comment data is processed.