ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԱՇԽԱՏԱՆՔԻ ԵՒ ԸՆԿԵՐԱՅԻՆ ՀԱՐՑԵՐՈՒ ՆԱԽԱՐԱՐ ՄԱՆԷ ԹԱՆԴԻԼԵԱՆ ՀՐԱԺԱՐԵՑԱՒ

0

Հայաստանի Հանրապետութեան Աշխատանքի եւ ընկերային հարցերու նախարար Մանէ Թանդիլեան հրաժարեցաւ կառավարութենէն: Ան դիմատետրի իր էջի վրայ գրած էր.

«Կառավարութեան երէկուան նիստին կը քննարկուէր պարտադիր կուտակային համակարգի ամբողջական ներդրումի հարցը: Դուք տեղեակ էք իմ դիրքորոշումին մասին, որ յայտնած եմ տարիներ առաջ` համակարգի պարտադիր բաղադրիչի վերաբերեալ: Նշանակուելով աշխատանքի եւ ընկերային հարցերու նախարար, իմ դիրքորոշումը յայտնած եմ պարտադիր բաղադրիչի ամբողջական ներդրումը 1 տարիով յետաձգելու եւ հանրային քննարկումներու միջոցով համակարգը փոխելու տեսքով` շահառուներու համար գրաւիչ տարբեր լուծումներ տալու, առանցքը ունենալով ազատ կամքի արտայայտութեան սկզբունքը: Այս ընթացքը եւս ունէր որոշակի բարդութիւններ, բայց ես յայտնած եմ իմ պատրաստակամութիւնը այդ աշխատանքները նախաձեռնելու, հանրութեան լայն շերտերու հետ լայնամասշտապ աշխատանքներ իրականացնելու` լաւագոյն եւ հանրութեան համար ընդունելի լուծումը գտնելու համար:

Երկար քննարկումներէ ետք պարզ դարձաւ, որ իմ առաջարկը չունի կառավարութեան աջակցութիւնը: Փոխարէնը առաջարկուեցաւ այլ տարբերակ, որ ներկայացուեցաւ եւ հաստատուեցաւ կառավարութեան նիստին ընթացքին:

Այս հարցը սկզբունքային նշանակութիւն ունի ինծի համար: Պարտադիր բաղադրիչը չունէր եւ չունի հանրութեան աջակցութիւնը, եւ անոր պատճառները բազմաթիւ են եւ բազմաշերտ: Այն ունի թէ՛ ընկերային, թէ՛ իրաւական, թէ՛ քաղաքական, թէ՛ համակարգային հարցեր, եւ առանց հանրութեան հետ քննարկելու, հարցերը բացայայտելու եւ միասնական եւ ընդունելի լուծումներ գտնելու, ես ճամբայ չեմ տեսներ պարտադիր բաղադրիչի ամբողջ ծաւալով ներդրումի համար: Ես լիայոյս էի, որ նոր կառավարութիւնը այս հարցի լուծումին նոր ճամբով կ’երթայ: Նախորդ իշխանութիւններու կողմէն հարցերու լուծումի կտրական մեթոտները ընդունելի չեն ինծի համար:

Սիրելի՛ հայրենակիցներ, ես դէմ եղած եմ պարտադիր կուտակային համակարգին, իմ համախոհներու հետ միասին այդ համակարգի դէմ կազմակերպած եմ ցոյցեր, եւ հիմա ալ կը կարծեմ, որ կուտակային համակարգը պէտք է առանցքը ունենայ ազատ կամայայտնութեան եւ ընտրութեան կարելիութեան սկզբունքը` նկատի առնելով համակարգի ռիսքայնութիւնը եւ երկարաժամկէտութիւնը:

Այս գրառումով ես կը դադրեցնեմ աշխատանքի եւ ընկերային հարցերու նախարարի իմ լիազօրութիւնները, որոնք եղած են բացառապէս Հայաստանի քաղաքացիներուն ծառայելու գործիքներ:

Գործող կառավարութեան կը մաղթեմ բազում յաջողութիւններ եւ հեռատեսութիւն` ի շահ ժողովրդավարական Հայաստանի:

Նկատի առնելով այն հանգամանքը, որ ես կառավարութեան անդամ դարձած եմ որպէս Լուսաւոր Հայաստան կուսակցութեան անդամ, ես կը դադրեցնեմ նաեւ կուսակցութեան անդամակցութիւնը` հաստատակամ աջակցելու իմ ընկերներուն լուսաւոր Հայաստան կերտելու գործին մէջ:

Այսօրուընէ, արդէն որպէս քաղաքացի, պիտի շարունակեմ ուշի-ուշով հետեւիլ քաղաքական բոլոր զարգացումներուն, ջանք չխնայելով հայոց պետականութեան գոյացման համար»:

Share.

Leave A Reply