ԱՐԾՈՒԻԿ ՄԻՆԱՍԵԱՆ. «ՄԵՆՔ ՀԱՄՈԶՈՒԱԾ ԵՆՔ, ՈՐ ՊԱՐՏԱԴԻՐ ԿՈՒՏԱԿԱՅԻՆ ՀԱՄԱԿԱՐԳԸ ՆԵՐԿԱՅ ՁԵՒՈՎ ՉԻ ՀԱՄԱՊԱՏԱՍԽԱՆԵՐ ՄԵՐ ՔԱՂԱՔԱՑԻՆԵՐՈՒ ՇԱՀԵՐՈՒՆ»

0

Հայաստանի Հանրապետութեան տնտեսական զարգացումներու եւ ներդրումներու նախարար Արծուիկ Մինասեան 13 Յունիսին լրագրողներու հետ ճեպազրոյցի մը ընթացքին յայտարարեց, որ կառավարութիւնը համախմբուած մարմին է, ուր որոշումները կը գոյացուին բոլորին կողմէ եւ այս պահուն որոշումը այն է, որ 1 Յուլիսէն պէտք է գործէ կուտակային կենսաթոշակային համակարգի պարտադիր բաղադրիչը:

Յիշեցնենք, որ Արծուիկ Մինասեան մշտապէս դէմ եղած է պարտադիր բաղադրիչին։ Աւելին, ան, երբ պատգամաւոր էր, ներկայիս արդարադատութեան նախարար Արտակ Զէյնալեանի հետ, դիմած էր Սահմանադրական դատարան, որ հակասահմանադրական ճանչած էր պարտադիր բաղադրիչը։

Ներկայիս պարտադիր կուտակային կենսաթոշակային համակարգէն կ’օգտուի 270 հազար աշխատող, իսկ 1 Յուլիսէն, երբ համակարգը պարտադիր դառնայ, անոնց կը միանայ եւս 80 հազար աշխատող։ Նոր կառավարութիւնը գտած է ձեւը. պարտադիր կուտակային համակարգին միացող աշխատողներուն կը փոխհատուցէ եօթ տոկոսը, իսկ աշխատողը իր կենսաթոշակային համակարգին կը փոխանցէ 2,5 տոկոս։ Նախապէս ե՛ւ պետութիւնը, ե՛ւ աշխատողը կուտակային համակարգին կը փոխանցէին հինգական տոկոս։

«Պարոն վարչապետը յստակօրէն բացատրեց, որ եթէ այս համակարգը յետաձգուի, այն 270 հազար աշխատողներ օրինաւոր կերպով հարց պիտի բարձրացնեն, թէ ինչո՛ւ համակարգին միացած են, բայց հարցը դարձեալ կը յետաձգուի։ Այս փոփոխութիւններով մենք կը մեղմացնենք համակարգին միացողներուն բեռը՝ օրակարգին մէջ պահելով շատ յստակ հարցում մը՝ արդեօ՞ք պարտադիր կուտակային բաղադրիչը հակասահմանադրական է, թէ՝ ո՛չ», ըսաւ Մինասեան։

Պատասխանելով այն հարցումին, թէ նախարարին համար կասկածելի՞ է, որ պարտադիր բաղադրիչը հակասահմանադրական է, Մինասեան ըսաւ, որ ինք գիտէ անոր հակասահմանադրական ըլլալը։

«Մենք համոզուած ենք, որ պարտադիր կուտակային համակարգը այն ձեւով, ինչպէս մենք ունինք, չի համապատասխաներ մեր քաղաքացիներու շահերուն՝ մեր պետութեան տնտեսական ներկայ պայմաններուն տակ։ Մեր պայքարը Սահմանադրական Դատարանին ու փողոցին մէջ յստակ հիմքեր ունէր։ Այս կառավարութիւնը կարելիութիւն ունի ուսումնասիրել հակասահմանադրականութեան հարցը», յայտարարեց Մինասեան։

Նախարարին կարծիքով, սկզբունքայնութիւնը այդ հարցի լուծումին ուղղութեամբ հետեւողական ըլլալն է։

«Երբ զգանք՝ անկարելի է այլեւս շարունակել, համոզուած եղէք, որ հեռանալու կամք ու վճռականութիւն կայ», աւելցուց դաշնակցական նախարարը։

Share.

Leave A Reply