ՆԻԿՈԼ ՓԱՇԻՆԵԱՆ ԸՆԴՈՒՆԱԾ Է ԵԱՀԿ ՄԻՆՍՔԻ ԽՄԲԱԿԻ ՀԱՄԱՆԱԽԱԳԱՀՆԵՐԸ

0

Հայաստանի Հանրապետութեան վարչապետ Նիկոլ Փաշինեան 13 Յունիսին ընդունած է Երեւան ժամանած ԵԱՀԿ Մինսքի խմբակի համանախագահներ Իկոր Փոփով (Ռուսիա), Սթեֆան Վիսքոնթի (Ֆրանսա), Էնտրու Շոֆըր (Միացեալ Նահանգներ) եւ ԵԱՀԿ գործող նախագահի անձնական ներկայացուցիչ Անճէյ Քասփրչիք:

Վարչապետը կարեւոր նկատած է համանախագահներու դերը ղարաբաղեան հակամարտութեան խաղաղ լուծման բանակցային գործընթացին մէջ եւ համոզմունք յայտնած, որ կը ձեւաւորուի արդիւնաւէտ համագործակցութիւն:

Համանախագահները շնորհաւորած են Նիկոլ Փաշինեանը ՀՀ վարչապետ ընտրուելուն առիթով՝ վստահեցնելով, որ պիտի ներդնեն իրենց կարելի ջանքերը ղարաբաղեան հիմնահարցի խաղաղ լուծումին հասնելու համար:

Հանդիպումի մասնակիցները կարեւոր համարած են կողմերուն հաւատարմութիւնը հակամարտութեան խաղաղ լուծումը ուղղութեամբ իրենց ստանձնած յանձնառութիւններուն, ինչպէս նաեւ Վիեննայի, Սան Փեթերսպուրկի եւ Ժընեւի գագաթնաժողովներուն ձեռք բերուած համաձայնութիւններու կատարման անհրաժեշտութիւնը:

ԵԱՀԿ Մինսքի խմբակի համանախագահները վարչապետին տեղեկացուցած են իրենց յառաջիկայ աշխատանքային ծրագիրներուն մասին։
Հանրապետութեան վարչապետը վերահաստատած է Հայաստանի պատրաստակամութիւնը՝ ԵԱՀԿ Մինսքի խմբակի համանախագահներու հետ շարունակելու բանակցային խաղաղ ճամբով հակամարտութեան լուծման ուղղուած ջանքերը:

Զրուցակիցները քննարկած են բանակցային գործընթացի յառաջմղման համար համապատասխան մթնոլորտի ձեւաւորման ուղղութեամբ ձեռնարկելի քայլերը, անդրադարձած հակամարտութեան գօտիին իրավիճակին:

Share.

Leave A Reply

This site uses Akismet to reduce spam. Learn how your comment data is processed.