ԱԶԳԱՅԻՆ ՍՐԲՈՑ ՆԱՀԱՏԱԿԱՑ ՄԱՆԿԱՊԱՐՏԷԶԻ ԱՄԱՎԵՐՋԻ ՀԱՆԴԷՍ

0

Հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տ. Շահան Ս. Արք. Սարգիսեանի, Ուրբաթ, 20 Մայիս 2018-ին «Արարատ» սրահէն ներս տեղի ունեցաւ Լաթաքիոյ Ազգ. Ս. Նահատակաց Մանկապարտէզի ամավերջի հանդէսը:

Հանդիսութիւնը սկսաւ Սուրիոյ եւ Հայաստանի Հանրապետութեան զոյգ քայլերգներով, ապա մանկապարտիզպանուհի Ցոլին Պալեան ողջունելէ ետք ներկաները, ամփոփ ձեւով ներկայացուց մանկապարտէզի գործունէութիւնը եւ գնահատեց ուսուցչական կազմին նուիրական աշխատանքը:

Ապա աւելցուց. «Հրաժեշտ պիտի տանք մեր փափուկ եւ քաղցր փոքրիկներուն, որոնց հետ միասին երեք տարի աշխատեցանք սրտով եւ հոգուով: Մեզի վստահուած առաքելութիւնը կþամբողջանայ փոքրերուն ուսուցանելով գիտելիքներ, դաստիարակելով զիրենք եւ թրծելով իրենց հոգին ի խնդիր ապագայի լիարժէք հայ մարդու կերտումին, որովհետեւ մեր նպատակն է զօրացնել իրենց մէջ հայ մնալու գիտակցութիւնը՝ հայերէն երգելով, պարելով, գրելով եւ խօսելով, ինչպէս նաեւ ամրապնդել իրենց մէջ հայրենիքի հանդէպ սէրն ու պատկանելութիւնը»:

Արաբերէն բացման խօսք արտասանեց Շաքէ Մանճեան:

Այնուհետեւ բեմահարթակ բարձրացան փոքրիկները՝ մէյ-մէկ նաշխուն վարդեր, որոնց բուրմունքը հրապուրեց բոլորին սիրտն ու հոգին:

Անոնք նախ բարի գալուստ մաղթեցին ներկաներուն, ապա աղօթքով սկսան իրենց յայտագիրը ներկայացնել՝ մանկապարտէզի եռամեայ ուսումնական տարեշրջաններուն իրենց փոխանցուած գիտելիքները վերյիշելով, մայրենի լեզուի ու հայրենիքի նկատմամբ իրենց անսահման սէրը արտայայտելով, շեշտը դնելով Հայաստանի Հանրապետութեան անկախութեան 100-ամեակի սրբազան տօնին ու սուրբ դրօշին արժէքին վրայ:

Հայկական, արաբական, օտար երգերն ու պարերը, փոքրիկներուն համաչափ ու ճկուն շարժուձեւերը հմայեցին հանդիսականները. Անոնք արժանացան ջերմ ծափողջոյններու:

Ապա բեմ հրաւիրուեցաւ վարժարանիս վաստակաշատ տնօրէնուհի Հուրի Գարամարտեան՝ փոխանցելու տնօրէնութեան խօսքը:

Ան ներկայացուց 2017-2018 տարեշրջանի կատարուած հսկայ աշխատանքին տեղեկագիրը եւ շնորհակալութիւն յայտնեց բոլոր անոնց, որոնք իրենց նուիրատուութեամբ եւ ծառայութեամբ սատար հանդիսացան յաջողութեամբ աւարտելու այս տարեշրջանը:

Հանդէսի աւարտին տեղի ունեցաւ վկայականաց բաշխում:

Հանդէսը փակուեցաւ Արժ. Տէր Զարեհ Քհնյ. Շաքարեանի պատգամով եւ «Պահպանիչ» աղօթքով:

 

Ցոլին Պալեան

 

Share.

Leave A Reply

This site uses Akismet to reduce spam. Learn how your comment data is processed.