ԱԶԳ. ՔԱՐԷՆ ԵՓՓԷ ՃԵՄԱՐԱՆԻ ՄԻՋՆԱԿԱՐԳԻ ՇՐՋԱՆԱՒԱՐՏ ՀՈՒՆՁՔԸ ԼՈՒՍԱՒՈՐԵՑ ՃԵՄԱՐԱՆԻ ԲԵՄԱՀԱՐԹԱԿԸ

0

Ազգ. Քարէն Եփփէ Ճեմարանի միջնակարգի 2017-2018 ուսումնական տարեշրջանի ամավերջի հանդէսը այս տարի եւս տեղի ունեցաւ Ճեմարանի շրջափակին մէջ՝ հոծբազմութեան ներկայութեան, ջերմ եւ ուրախալի մթնոլորտի մը ներքոյ։

 

Տարիներ շարունակ մեր կրթութիւնը ստացանք Ճեմարանէն հեռու՝ Ազգ. Կիւլպէնկեան վարժարանի յարկին տակ: Ճեմարանի ոգին, սակայն, ապրեցաւ մեր մէջ, ու այդ դժուար պայմաններուն իսկ, Ճեմարանը շարունակեց իր առաքելութիւնը՝ դէմ դնելով պատերազմական ծանր պայմաններուն։ Ահաբեկչական անողոք պատերազմին դէմ գոյատեւելու արդար պատերազմ մղեցինք միասնաբար:

 

11 Սեպտեմբեր 2017-ին մեր դպրոցի մէկ շէնքին բոլոր դասարանները վերանորոգուած էին, Ճեմարանը պատրաստ էր ընդունելու իր աշակերտները, նոյնիսկ զանազան երկիրներէ Հալէպ վերադարձած իր հարազատ որդիները, եւ մենք, ճեմարանական նախկին սերունդներուն հետ ամուր շղթայ մը կազմած, ուսումնական մեր կեանքը շարունակեցինք Ճեմարանի հայաբոյր երդիքին տակ։

 

Ճեմարանի միջնակարգի հանդէսը տեղի ունեցաւ Շաբաթ, 16 Յունիս 2018-ին, երեկոյեան ժամը 7։30-ին,հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տ. Շահան Սրբ. Արք. Սարգիսեանի, կազմակերպութեամբ Ճեմարանի Խնամակալութեան եւ Տնօրէնութեան։

Հանդէսին ներկայ գտնուեցան Բերիոյ Թեմի Առաջնորդը, Սուրիոյ խորհրդարանի երեսփոխան Ժիրայր Րէիսեան, Ճեմարանի խնամակալութեան ներկայացուցիչները, տնօրէնութիւնը, շրջանաւարտից միութեան անդամները, ծնողներ եւ ուսուցիչներ։

Հանդէսին, բեմահարթակ բարձրացան 64 աշակերտ-աշակերտուհիներ՝ ամփոփ յայտագրով մը հրաժեշտ տալու միջնակարգի ուսումնական առաջին փուլին։

 

Հանդէսին բացումը կատարուեցաւ Սուրիոյ եւ Հայաստանի Հանրապետութեան զոյգ քայլերգներով։

Հայերէն բացման խօսք արտասանեց շրջանաւարտ Սարին Պօղոսեան: Ան ըսաւ. «2018 թուականը մեզի համար իւրայատուկ թուական մըն է,մեր վերադարձը դէպի Ճեմարան: Կրթական այս օճախը մեր փոքրիկ Հայաստանն է, հակառակ որ այսօր հազար երկուհարիւր խանդալից աշակերտներ չկան,սակայն մեր հզօր կամքով այս փոքր ածուն կրնանք վերածել հզօր բանակի: Այս ամրոցին մէջ կը կերտուի նախաձեռնող եւ մտածող հայ մարդը»։ Իր խօսքի աւարտին ան շնորհակալութիւն յայտնեց մեր ուսուցիչներուն եւ դաստիարակներուն, ինչպէս նաեւ Սուրիոյ վսեմաշուք նախագահ Պաշշար ալ Ասատին, որ մշտապէս քաջալերած է ուսումն ու կրթութիւնը։

 

Արաբերէն բացման խօսքով հանդէս եկաւ շրջանաւարտ Սալբի Մաթոսեան: Ան ըսաւ. «Մեզի համար հպարտութիւն է մասնակից դառնալ Ճեմարանի այս հանդէսին: Ճեմարանը տարիներ շարունակ վառ պահած է գիտութեան եւ լոյսի ջահը: Ուստի իւրաքանչիւր աշակերտ բարձր պիտի պահէ այս դպրոցին անունը ՝ ծառայելով իր հայրենիքին եւ ազգին»: Եզրափակելով ան ըսաւ, որ մեր սրտերուն մէջ յաւերժ պիտի ապրին այն հերոսները, որոնք պատերազմի տարիներուն պահպանեցին մեր վարժարանը կամ զոհուեցան անոր շրջափակին մէջ:

Ապա ելոյթ ունեցաւ Ճեմարանի աշակերտական երգչախումբը, խմբավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Լիզէթ Սէրայտարեան-Աւընեանի: Երգչախումբը հրամցուց Մայիսեան հերոսամարտերուն, Հայաստանին եւ Սուրիական Հայրենիքին նուիրուած երգերու փունջ մը։

 

Այնուհետեւ կարգ մը շրջանաւարտներ արաբերէնի ուսուցիչ Արա ՄութաՖեանի հսկողութեամբ արաբերէն քերթուածներու համադրում մը ասմունքեցին՝ նուիրուած Սուրիական Հայրենիքին։Այնուհետեւ խումբ մը շրջանաւարտներ հեզաճկուն շարժումներով հայկական պար մը պարեցին, պարուսոյց Սուրէն Քիրազեանի հսկողութեամբ:

Արաբերէն ուղերձը արտասանեց շրջանաւարտ Աբրահամ Աշճեան: Աշճեան ըսաւ, որ դպրոցը բանալին է կրթութեան եւ գիտութեան, մեր մտքերն ու հոգիները լուսաւորող արեւն է ան: Ապա շնորհակալութիւն յայտնեց բոլոր անոնց, որոնք տէր կանգնեցան աշակերտութեան:

Ապա խումբ մը շրջանաւարտներ, Ճեմարանի հայերէնաւանդ ուսուցչուհի Անի Թոփճեանի հսկողութեամբ, տպաւորիչ առոգանութեամբ ասմունքեցին հայերէն քերթուածներու համադրում մը՝ նուիրուած մայիսեան յաղթանակներուն եւ Հայաստանի անկախութեան։

Հայերէն ուղերձը արտասանեց շրջանաւարտ Արփի Գէորգեան: Ան յուզումնախառն խօսքերով յիշեց, թէ ակնթարթի մը նման անցան Ճեմարանի մեծ ընտանիքէն ներս ուսումնական առաջին երեք տարիները:

Այդ ծանր ժամանակաշրջանին, համատարած անապահովութիւնը անընդհատ կ’ամպոտէր պատանեկան տարիքի մեր ուրախ մթնոլորտը եւ մենք հարց կուտայինք իրարու, թէ արդեօ՞ք Ճեմարանի բակին մէջ պիտի ստանայինք միջնակարգի վկայականները… ու յաճախ անպատասխան կը մնային մեր այդ հարցումները, սակայն այսօր, այս հարթակին վրայ, մենք ոչ թէ կը լսենք,այլ կը հաստատենք այդ պատասխանը: Վերադառնալով Ճեմարան, մենք մեր վարժարանին վրայ կուտակուած տարիներու փոշին թօթափեցինք ու վերագտանք անոր պայծառ դէմքը:

Արփին այնուհետեւ շնորհակալութիւն յայտնեց ծնողներուն, ուսուցիչներուն, դաստիարակներուն,տնօրէններուն, Առաջնորդ Սրբազան Հօր եւ բոլոր անոնց, որոնք օգնեցին մեզի, որ յաջողութեամբ անցնինք այս ճամբան ու ինքնավստահ բեմ բարձրանանք։

Ճեմարանի պետական տնօրէն Աիշա Քապալան շնորհակալութեան խօսք ուղղեց սերունդներ կերտողներուն, անոնց ապագան ուրուագծողներուն, իրենց ժամանակն ու հոգին սերունդներու դաստիարակութեան ի սպաս դնողներուն, Ճեմարանի ուսուցիչ-ուսուցիչներուն՝ Աստուծմէ խնդրելով խաղաղութիւն Սուրիական Հայրենիքին ու բարօրութիւն եւ յարատեւ վերելք Ճեմարանին:

Ապա բեմ հրաւիրուեցաւ Ճեմարանի տնօրէն Յակոբ Քիլէճեան: Տնօրէնը դիտել տուաւ, որ ազգային Քարէն Եփփէ Ճեմարանը հալէպահայութեան եւ աշխարհասփիւռ հայութեան համար այն ամրակուռ հաստատութիւնն է, որ իր զուտ հայկական միջավայրով եւ ջամբած հայեցի դաստիարակութեամբ կը պատրաստէ գիտակից եւ պահանջատէր սերունդներ, որոնք կը ծառայեն աշխարհասփիւռ հայկական կառոյցներէն ներս՝ ազատ, անկախ,միացեալ Հայաստանի տեսլականով: Ապա ներկայացուց 2017-2018 ուսումնական տարեշրջանի ամփոփ տեղեկագիրը, ու իր խօսքը ուղղելով աշակերտութեան ըսաւ. «Ճեմարանէն ներս երեք տարուան ձեր աշխատանքը երաշխաւորեց, որ դուք ստանաք Ճեմարանի հիմնակրթարանի յատուկ վկայականը:

Պետական քննութիւններու արդիւնքները յայտարարուած են արդէն եւ դուք ապահոված էք փայլուն արդիւնքներ, սակայն երկրորդականը պատուաբեր արդիւնքով աւարտելու համար, դուք յառաջիկային լուրջ աշխատանք պէտք է տանիք»:

 

Անդրադառնալով Հայաստանի Հանրապետութեան հարիւրամեակին, որուն նուիրուած էր հանդէսին յայտագիրը գլխաւորաբար, տնօրէնը դիտել տուաւ, որ անկախութեան խորհուրդը մեզ կը թելադրէ ըլլալ վճռակամ, իրատես եւ լաւատես, որովհետեւ հայկական պետութիւնը չէր հիմնուած յոռետեսներու ձեռամբ, այլ այն մարդոց, որոնք ազատութեան եւ գերիշխանութեան արժէքները բարձրօրէն կը գնահատէին:

Իր խօսքի աւարտին ան շնորհակալութեան խօսք ուղղեց բոլոր բարերարներուն, ուսուցիչներուն, խնամակալութեան, յայտագիրի պատրաստութեան օժանդակողներուն, «Գանձասար» շաբաթաթերթին եւ վերջապէս Սրբազան Հօր եւ երկրիս վսեմաշուք նախագահին:

Ճեմարանի գործադիր տնօրէն Վահէ Ղազարեան խօսք առնելով շեշտեց, որ Ճեմարանը հոգատար է բոլորին նկատմամբ եւ խտրութիւն չի դներ աշակերտներուն միջեւ: Ան իր դռները լայնօրէն կը բանայ բոլոր հայ պատանիներուն դիմաց՝ ոչ մէկ հայ աշակերտ հայկական դպրոց յաճախելու իրաւունքէն զրկելու տրամաբանութեամբ: Ղազարեան ծնողները հրաւիրեց գործակցութեան ոգիով առաջնորդուելու եւ ձեռք-ձեռքի, առողջ քննադատութեամբ եւ հաւատքով վարժարանը լուսաւոր ուղիի վրայ պահելու, հայեցի կրթութիւնը առաջնահերթ համարելու եւ գնահատելու աշակերտներուն ձեռքբերումներն ու ձիրքերը:

Ան շնորհակալութիւն յայտնեց նաեւ Բերիոյ Հայոց Թեմի Առաջնորդին, «Դպրոց» հիմնադրամին, բոլոր բարերարներուն, յատկապէս Ճեմարանի Շրջանաւարտից Միութեան, Քալիֆորնիոյ Շրջանաւարտից Միութեան եւ բոլոր անոնց, որոնք զօրավիգ կանգնեցան Ճեմարանին:

Ապա Ճեմարանի Շրջանաւարտից Միութեան Վարչութիւնը պարգեւատրեց 7-րդ, 8-րդ եւ 9-րդ կարգերու առաջնակարգ հետեւեալ աշակերտները.-

7-րդ կարգ

Աննա Սաղպազարեան

Արեգ Արոյեան

Ներսէս Գասապեան

8-րդ կարգ

Քարէն Գատէհճեան

Աննա Չալաքեան

Աբրահամ Աւընեան

9-րդ կարգ

Սալբի Մաթոսեան

Մելինա Սագայեան

Արփի Գէորգեան

 

Այնուհետեւ Սրբազան Հօր եւ տնօրէն Յակոբ Քիլէճեանի ձեռամբ տեղի ունեցաւ վկայականաց բաշխումը: Գնահատագիրներ ստացան Հայերէն լեզուի եւ գրականութեան նիւթին բարձրագոյն նիշեր ապահոված աշակերտ աշակերտուհիները:

Օրուան եզրափակիչ պատգամը տուաւ Բերիոյ Հայոց Թեմի Առաջնորդ Գերշ. Տ. Շահան Սրբ. Արք.Սարգիսեանը։ Սրբազան Հայրը շնորհաւորեց բոլոր շրջանաւարտները եւ ըսաւ.« Ճեմարանը, նորոգող եւ նորոգուող իր ներկայութեամբ, մեր ազգային կեանքի կրթական ինքնուրոյն օճախն է: Ան մեր իմացական բանակի բանակավայրն է: Աշխարհի ժողովուրդները կը ջախջախուին, եթէ ապաւինած են միայն զինուորական ուժին: Զինուորական ուժը կարեւոր Է հայրենիքի ու ժողովուրդի պաշտպանութեան համար, սակայն ազգերը կը գոյատեւեն նաեւ իմացական բանակով: Ես այս բեմին վրայ կը տեսնեմ իմացական ուժականութեան գեղեցիկ պատկեր մը»:

Ան երախտագիտութիւն յայտնեց բոլոր բարերարներուն, որոնք հաւատացին Ճեմարանի առաքելութեան, գնահատեց ուսուցչական կազմը՝ մաղթելով համբերութիւն եւ կորով, որովհետեւ այդ համբերութեան պտուղը այս բեմին վրայ կանգնած մեր չքնաղ տղաքն ու աղջիկներն են։

Հանդիսութիւնը փակուեցաւ Ճեմարանի քայլերգով եւ Սրբազան Հօր «Պահպանիչ» աղօթքով։

 

Նայիրի Արապաթլեան

Share.

Leave A Reply

This site uses Akismet to reduce spam. Learn how your comment data is processed.