ՄԱՐԶԱԿԱՆ՝ ՅՈՒՆԻՍ Գ./2018

0

2018-Ի ՄՈՆՏԻԱԼԸ ՊԱՇՏՕՆԱՊԷՍ ԲԱՑՈՒԱԾ ՅԱՅՏԱՐԱՐՈՒԵՑԱՒ

Ներկայութեամբ 20 երկիրներու ղեկավարներու, Հինգշաբթի կէսօրէ ետք պաշտօնապէս բացուած յայտարարուեցաւ 2018-ի համաշխարհային ֆութպոլի մրցումները: Պատուոյ նախագահն էր  հիւրընկալող երկրին` Ռուսիոյ նախագահ Վլատիմիր Փութին: Փութին բացման իր խօսքին մէջ ըսաւ. «Ֆութպոլը, իսկապէս, սիրուած է մեր երկրին մէջ: Կ’ակնկալեմ, որ համակիրները եւ մրցաշարքին մասնակցող խումբերը ըմբոշխնեն իրենց կեցութիւնը Ռուսիոյ մէջ:

«Ֆութպոլը բոլորս կը միացնէ իբրեւ մէկ խումբ. բոլորս այս իւրայատուկ առիթով պիտի ապրինք յիշատակելի եւ անմոռանալի պահեր»: Յիշենք, որ բացման արարողութեան պատուոյ հիւրերուն մէջ ներկայ էր նաեւ Հայաստանի վարչապետ Նիկոլ Փաշինեան: Արարողութեան ընթացքին գործադրուեցաւ արդիական  գեղարուեստական յայտագիր մը, որուն ընթացքին ելոյթ ունեցաւ անգլիացի Ռոպի Ուիլիըմզ եւ ռուս սոփրանօ Այտա Կարիֆուլինա:

Ռուսիան Ջախջախեց Սէուտական Արաբիոյ Դարպասը, Իսկ Մեծ Հաւաքականները զիջեցան Մրցակիցներուն

Համաշխարհային ֆութպոլի բացման առաջին մրցումին հիւրընկալ Ռուսիոյ հաւաքականը փայլուն արդիւնքով պարտութեան մատնեց Սէուտական Արաբիոյ հաւաքականը: Ռուսիոյ կազմը չխնայեց մրցակից խաղցողները եւ 5 – 0 արդիւնքով ջախջախեց անոնց դարպասը: Մրցաշարքին երկրորդ օրը Եգիպտոսի հաւաքականը ազդուելով խումբի լաւագոյն խաղցող Մուհամմէտ Սալահի բացակայութենէն, 1 – 0 արդիւնքով անարժան պարտութիւն մը կրեց Ուրուկուէյի կազմին դէմ: Հանդիպումի միակ կոլը նշանակուեցաւ 93-րդ վայրկեանին: Արաբական երրորդ հաւաքականին՝ Մարոքի ճակատագիրը նոյնը եղաւ եւ 90-րդ վայրկեանին ան մրցակից Պարսկաստանէն պարտութեան կոլը ստացաւ: Բ. Խմբակի լաւագոյն մրցումը եղաւ Փորթուկալ – Սպանիա հանդիպումը, որ աւարտեցաւ 3 – 3 հաւասարութեամբ: Հադրիքի կոլերով հանդէս եկաւ Ռիալ Մատրիտի յարձակողական խաղցող Քրիստիանօ Ռոնալտօ, Իսկ Սպանիոյ կոլերը արձանագրեցին Քոսթան՝ երկու կոլ  եւ Նաթչօ: Շաբաթ օր Ֆրանսայի հաւաքականը 2 – 1 արդիւնքով պարտութեան մատնեց Աւստրալիոյ կազմը, իսկ Դանիան 1 – 0 արդիւնքով յաղթեց Փերուին:  Արժանթինի հաւաքականը չյաջողեցաւ դրական արդիւնքով աւարտել Իզլանտայի դէմ իր խաղը, որ աւարտին հասաւ 1 – 1 հաւասար արդիւնքով: Մրցումին ընթացքին Լիոնէլ Մեսին  չյաջողեցաւ արձանագրել տուգանային հարուած մը, որպէսզի կարենար յաղթանակ պարգեւել Արժանթինի կազմին:  Խրուաթիոյ հաւաքականը ոչ մէկ դժուարութիւն ունեցաւ պարտութեան մատնելու իր մրցակիցը՝ Նիճերիան, որուն վերջնական արդիւնքը եղաւ 2 – 0: Կիրակի օրուան մրցումներուն  դարձեալ անակնկալ արդիւնքներ արձանագրուեցան. 2014-ի մոնտիալի ախոյեան Գերմանիոյ հաւաքականը անակնկալ պարտութիւն մը  կրեց մրցակիցէն եւ զիջեցաւ Մեքսիքոյի կազմին 1 – 0 արդիւնքով: Մրցումին, գերմանացիները չյաջողեցան իշխել արդիւնքին եւ տառապեցան մրցակիցին խիստ պաշտպանողական խաղարկութենէն: Նոյն ճակատագրին ենթարկուեցաւ հինգ անգամ աշխարհի ախոյեան դարձած Պրազիլը, որ չկրցաւ պահել Քոթինիոյի արձանագրած յաղթանակի կոլը եւ Զուիցերիոյ դէմ մրցումը աւարտեց 1 – 1 հաւասարութեամբ:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.