ՍՈՂՈՄՈՆ ԹԵՀԼԻՐԵԱՆԻ ՅՈՒՇԱԿՈԹՈՂԻ ԲԱՑՈՒՄԸ՝ ՄԱՐՍԷՅԻ ՄԷՋ

0

Ֆրանսայի հարաւային շրջանի Ֆրանսայի Հայկական Կազմակերպութիւններու Համակարգող Խորհուրդի եւ Մարսէյի 6-րդ եւ 8-րդ շրջաններու քաղաքապետարանին նախաձեռնութեամբ` 23 Յունիսին, Մարսէյի Սողոմոն Թեհլիրեանի անունը կրող հրապարակին վրայ բացումը կատարուեցաւ Թեհլիրեանի յուշակոթողին, որուն հեղինակը Թաւիթ Եուզանն է:

Ձեռնարկին ներկայ էին Մարսէյի մէջ Հայաստանի հիւպատոս Ռուբէն Խարազեան, 4-րդ եւ 5-րդ շրջանի քաղաքապետ Մարին Փուսթոլինօ, Շրջանային խորհուրդի նախագահի ներկայացուցիչը, քաղաքապետական խորհուրդի անդամներ, հայկական համայնքի ներկայացուցիչներ եւ ուրիշներ:

Ըստ «Նոր Յառաջ»ի, բացման եւ ողջոյնի խօսքով հանդէս եկաւ շրջանի քաղաքապետ Իվ Մորէն, որմէ ետք ելոյթ ունեցաւ Ֆրանսայի հայկական կազմակերպութիւններու համակարգող խորհուրդի հարաւային շրջանի երիտասարդ նախագահ Օռելի Փրիւնա: Վերջինս իր խօսքին մէջ անդրադարձաւ Հայոց Ցեղասպանութեան, Պերլինի դատարանի Յունիս 1921-ի Սողոմոն Թեհլիրեանը անմեղ յայտարարող վճիռին: Իր խօսքի աւարտին բանախօսը անդրադարձաւ նաեւ այն երկիրներուն, որոնք ճանչցած են Հայոց Ցեղասպանութիւնը:

Այնուհետեւ ելոյթ ունեցաւ Աշխէն Յարութիւնեան, որ 2017-ին, Քանի յուշահամալիրին կազմակերպած «Մարդու իրաւունքներու պաշտպաններու 28-րդ միջազգային մրցում»-ին յաղթող ճանչցուած էր:

Ապա ելոյթ ունեցաւ քաղաքապետ Իվ Մորէն, որ նոյնպէս խօսեցաւ Պերլինի դատարանի վճիռին մասին` շեշտելով, որ անիկա իրաւական հիմքեր ստեղծեց Լեմքինի կողմէ «ցեղասպանութիւն» եզրի յառաջացման եւ Նիւրնպերկի դատավարութեան համար: Քաղաքապետը անդրադարձաւ նաեւ Թուրքիոյ այսօրուան իրավիճակին` յայտնելով, որ եթէ մարդիկ անցեալը մոռնան, ապա պատմութիւնը, ինքնաբերաբար, պիտի կրկնուի:

Յուշակոթողի բացման արարողութենէն ետք պատանիներու երգչախումբը կատարեց Ֆրանսայի եւ Հայաստանի քայլերգներն ու յեղափոխական երգեր:

 

Share.

Leave A Reply

This site uses Akismet to reduce spam. Learn how your comment data is processed.