ՄԱՐԶԱԿԱՆ՝ ՅՈՒԼԻՍ Ա./2018

0

ՀԱՄԱՇԽԱՐՀԱՅԻՆ ՄԵԾ ԽՈՒՄԲԵՐԸ ՀԵՌԱՑԱՆ 2018-Ի ՄՈՆՏԻԱԼԷՆ

Ֆութպոլի աշխարհի գործուն ախոյեանը՝ Գերմանիոյ հաւաքականը 2018-ի աշխարհի առաջնութեան Ա. փուլի իր վերջին խաղը աւարտեց  պարտութեամբ, զիջելով Հարաւային Քորիայի կազմին: Անոր դուրս մնալը այս տարուան մրցաշարքէն անսպասելի էր: Կազանի մէջ տեղի ունեցած խաղին, հակառակ անոր որ գերմանացիները բացայայտ առաւելութիւն ունէին, չկրցան կոլ նշանակել, իսկ մրցակից  քորիացի ֆութպոլիստները մրցումի յաւելեալ ժամուն երկու կոլ նշանակեցին եւ անակնկալ յաղթանակով մը աւարտեցին հանդիպումը՝  2 – 0 արդիւնքով: Այսպիսով, Գերմանիոյ հաւաքականը 3 կէտով գրաւեց խմբակին վերջին՝ 4-րդ տեղը։ Այս խմբակեն յաջորդ փուլ անցան Շուէտի եւ Մեքսիքոյի հաւաքականները, որոնց միջեւ տեղի ունեցած վերջին մրցումին, Շուէտի խաղցողները 3 – 0 արդիւնքով պարտութեան մատնեցին մեքսիքացիները:

Ֆրանսայի հաւաքականը աշխարհի առաջնութեան 1 – 8  փուլի  մրցումներու ծիրին մէջ, պարտութեան մատնելով Արժանթինի կազմը, առաջինն էր, որ մտաւ քառորդ եզրափակիչ: Կազանի մէջ տեղի ունեցած հանդիպումը ընթացաւ բաւական բարձր որակով եւ յատկանշուեցաւ կոլերու մեծ թիւով: Խաղի 13-րդ վայրկեանին, Ֆրանսայի հաւաքականը 11 մեթր  հարուածի իրաւունք ստացաւ, որ վարպետօրէն կատարեց Անթուան Քրիզմանը: Առաջին խաղակէսի վերջին վայրկեաններուն,  Անխել տի Մարիա հեռաւոր հարուածով հաւասարեցուց արդիւնքը, իսկ ընդմիջումէն ետք, Գաբրիէլ Մերկաթօ արդէն առաջ մղեց Արժանթինի հաւաքականը: Երկրորդ կէսի վերջին վայրկեաններուն, ֆրանսացիները տասը վայրկեանուան ընթացքին յաջողեցան տիրապետել խաղին՝ յաջորդաբար նշանակելով երկու կոլ՝  Կիլիան Մփապէի եւ Բենիամին Փաւարտի միջոցով: Մրցումի յաւելեալ ժամուն, Սերխիօ Աքուերոն կրցաւ նուազեցնել արդիւնքին տարբերութիւնը:Այսպիսով, Ֆրանսայի հաւաքականը 4-3 արդիւնքով դժուարին յաղթանակ մը տարաւ եւ մտաւ քառորդ եզրափակիչ, ուր ան պիտի հանդիպի Ուրկուէին, որ իր կարգին 1 – 8  փուլի ամէնէն ուժեղ մրցումներէն մէկը կատարեց Փորթուկալի դէմ՝ 2 – 1 արդիւնքով պարտութեան մատնելով մրցակիցը: Հանդիպումի լաւագոյն խաղցողը դարձաւ  ուրկուէյցի յարձակողական խաղցող  Էթինսըն Քաւանի, որ իւրաքանչիւր խաղակէսին մէկական կոլ նշանակեց եւ դարձաւ կոլերու կրկնակի հեղինակ: Փորթուկալի հաւաքականի պատասխան միակ գնդակը նշանակեց Փեփէն, Իսկ աշխարհի լաւագոյն ֆութպոլիստ Քրիստիանօ Ռոնալտոն չկրցաւ պարտութենէ փրկել իր հաւաքականը:                                                                                                 Այս տարեշրջանի անակնկալներէն մէկը դարձաւ նաեւ Սպանիոյ դուրս մնալը, որ 11 մեթրի հարուածներուն միջոցաւ 3 – 2 արդիւնքով պարտութեան մատնուեցաւ հիւրընկալ Ռուսիոյ հաւաքականէն: Մրցումին հիմնական ժամուն խումբերը մէկական կոլ նշանակեցին: Նախ 12-րդ վայրկեանին սեփական դարպասը գրաւեց Ռուսաստանի հաւաքականի պաշտպան Իքնաշեւիչը, Իսկ մրցումի 40-րդ վայրկեանին Ռուսիոյ  ընտրանին տուգանային  հարուածի իրաւունք ստացաւ եւ նշանակեց հաւասարութեան կոլը: Խաղի յաւելեալ ժամը դարձեալ հաւասար աւարտելէ ետք, զոյգ խումբերը անցան 11 մեթր հարուածներու փուլ, ուր բախտը ժպտաց հիւրընկալ ռուսերուն: Դանիա-Խրուաթիա մրցումը դարձեալ աւարտեցաւ հեռաւոր հարուածներով: Մրցումը սկսաւ  բաւական ուժեղ: Առաջին վայրկեանին Դանիոյ կազմը նշանակեց յաղթանակի կոլը, որմէ միայն երկու վայրկեան ետք, խրուաթիոյ  խումբէն Մարիօ Մանջուկիչ նշանակեց հաւասարութեան կոլը:  Կազմերը մրցումի 90 վայրկեանը հաւասար արդիւնքով աւարտելով, անցան յաւելեալ ժամու խաղարկութեան, որ դարձեալ հաւասարութեամբ ընթացաւ: 116-րդ վայրկեանին Լուքա Մոթրիչ կրնար յաղթանակ պարգեւել Խրուաթիոյ հաւաքականին , սակայն անոր ուղղած տուգանային հարուածի գնդակը յայտնուեցաւ Դանիոյ դարպասապահ Շումայքըլի ձեռքերուն մէջ: Ամէն ինչ որոշուեցաւ 11 մեթրի  հարուածներով: Երկու դարպասապահներն ալ հրաշալի կերպով գործեցին: Սակայն Խրուաթիոյ հաւաքականի ֆութպոլիստները աւելի դիպուկ հարուածներ ուղղեցին եւ յաղթեցին 3-2 արդիւնքով:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.