ՇՆՈՐՀԱՀԱՆԴԷՍ ԵՒ ԳԻՆԵՁՕՆ  «ԱՐԵԳՆԱՏԵՆՉ ՀՈՐԻԶՈՆՆԵՐ» ԳԻՐՔԻՆ

0

Հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տ. Շահան Ս. Արք. Սարգիսեանի, կազմակերպութեամբ Համազգայինի «Համօ Օհանջանեան» Մասնաճիւղի Վարչութեան, Չորեքշաբթի, 4 Յուլիս 2018-ի երեկոյեան ժամը 7:00-ին, Քեսապի «Սահակեան» սրահէն ներս տեղի ունեցաւ շնորհահանդէս եւ գինեձօն «Արեգնատենչ Հորիզոններ» գիրքին, պատուոյ ներկայութեամբ գիրքի հեղինակին՝ երէցկին Սեւան Հանէշեան- Պէտուրեանի եւ Տէր Գարեգին Քհնյ. Պետուրեանին,Ս. Աստուածածին եկեղեցւոյ հոգեւոր հովիւին, միութիւններու ներկայացուցիչներուն եւ քեսապահայ մշակութասէր հանրութեան:

Բացման խօսքով հանդէս եկաւ Համազգայինի Համօ Օհանջանեան» Մասնաճիւղի Վարչութեան ատենադպրուհի Սօսի Կարճիկեան։ Ան բարի գալուստի իր խօսքէն վերջ ըսաւ. «Քեսապը միշտ ունեցած է մշակոյթին եւ գրականութեան հետեւող տասնեակէ մը աւելի հմուտ անձեր, իսկ Համազգայինի «Համօ Օհանջանեան» Մասնաճիւղի Վարչութիւնը, իր կարգին, միշտ քաջալերած է գրասէրներն ու հայ մշակոյթին ներդրում ունեցողները ու սատար հանդիսացած է անոնց»։ Ապա յիշեց, թէ այս գիրքին շնորհահանդէսը նախապէս կատարուած է Երեւանի մէջ Հայաստանի Գրողներու Միութեան նախաձեռնութեամբ, եւ ներկայիս հեղինակը մաս կը կազմէ սոյն միութեան:

Օրուան հանդիսավար Մարալ Կարճիկեան ներկայացուց հեղինակին կենսագրական հետեւեալ տուեալները.
Սեւան Հանէշեան – Պետուրեան ծնած է Քեսապ: Յաճախած է Քեսապի Ազգային Ուսումնասիրաց Միացեալ Ճեմարանը:

Աւարտած է Լաթաքիոյ Համալսարանի Տնտեսագիտութեան ճիւղը: Երկամեայ ծրագիրով հետեւած է հայագիտական ուսման՝ Համազգայինի Հայագիտական Հիմնարկին մէջ, Հալէպ:
Իր բանաստեղծութիւնները լոյս տեսած են Սուրիոյ եւ Լիբանանի մէջ հրատարակուող զանազան թերթերու ու հանդէսներու մէջ ( «Գանձասար», «Ազդակ», «Կամար», «Շաւիղ» եւ «Երթ» ), Հայաստանի մէջ հրատարակուող հանդէսներու մէջ ( «Գարուն» եւ «Նարկիս»), ինչպէս նաեւ Միացեալ Նահանգներու «Հայրենիք» շաբաթաթերթին եւ «Ասպարէզ» օրաթերթին մէջ:

Երէցկինն է Արժ. Տ. Գարեգին Քհնյ. Պետուրեանին: Ունի երկու դուստր՝ Մեղեդի եւ Նարէ: Այժմ կ’ապրի Քալիֆորնիա, ԱՄՆ:

Յայտագիրին մասնակցեցաւ նաեւ Սարին Հանէշեան,որ իւրայատուկ ոճով ասմունքեց հեղինակին գիրքէն ընտրուած փունջ մը բանաստեղծութիւններ։
Այնուհետեւ հրաւիրուեցաւ Տ. Գարեգին Քհնյ. Պետուրեան՝ ներկայացնելու գիրքին բովանդակութիւնը:

Քահանայ հայրը դիտել տուաւ որ. ««Արեգնատենչ Հորիզոններ»
գիրքը նուիրուած է Քեսապին։ Այս երկու բառերուն ընդմէջէն հեղինակը ցոյց կու տայ թէ հորիզոնները , որոնք արեգակին տենչանքը ունին, արեւին տենչը ունին, միշտ այդ արեւի փնտռտուքին մէջ են: Գիրքը 103 բանաստեղծութիւններէ բաղկացած հատոր մըն է եւ ունի 11 գլխաւոր բաժիններ: Հեղինակին համար Քեսապը շատ ցցուն ներկայութիւն մըն է այս գիրքին մէջ։ Ինք ապրելով, մեծնալով եւ սնանելով այս գիւղին մէջ, իր բոլոր գրութիւններուն աղբիւրը եւ խորքը դարձուցած է գիւղին մէջ իր ունեցած փորձառութիւնները, կեանքը, ապրումները, եւ անոր համեմատ ինք կը ներկայացնէ այնպիսի բանաստեղծութիւններ, որոնք իսկապէս մեր նորօրեայ շրջանին մէջ քաջալերելի եւ դիւրաւ ու հաճոյքով ընթեռնելի են»: Ան նախքան գիրքին գլխաւոր բաժիններուն ներկայացումը, յայտնեց թէ այս գիրքը տպագրուած է Հալէպի մէջ, որպէս «Այգ» Մատենաշարի 24-րդ հատոր, հրամանաւ Բերիոյ Թեմի բարեխնամ Առաջնորդ Գերշ. Տ. Շահան Ս. Արք. Սարգիսեանի, որ միշտ քաջալեր հանդիսացած է եւ կը հանդիսանայ մեր երիտասարդ սերունդին, որպէսզի անոնք սնանին ու մեծնան հայ գրականութեան եւ մշակոյթի անդաստանէն ներս։ Քահանայ հայրը նկատել տուաւ, որ սրբազան հայրը յատուկ խնամք եւ հոգատարութիւն կը ցուցաբերէ բոլոր անոնց, որոնք գիրի եւ գրականութեան առաքեալներն են:

Այնուհետեւ տեղի ունեցաւ գինեձօնի արարողութիւնը գլխաւորութեամբ երկու հոգեւոր հովիւներուն եւ հեղինակին , ապա բոլոր ներկաները որպէս նուէր ստացան հեղինակին կողմէ մակագրուած գիրքէն օրինակներ:

Հանդիսութիւնը իր աւարտին հասաւ Տէր Նարեկ Քհնյ. Զերէնցեանի սրտի խօսքով եւ «Պահպանիչ» աղօթքով:
Թղթակից

Share.

Leave A Reply

This site uses Akismet to reduce spam. Learn how your comment data is processed.