ԻՐԱՆԻ ՈՒԺԱՆԻՒԹԻ ՆԱԽԱՐԱՐԸ ՀԱՅԱՍՏԱՆ ԱՅՑԵԼԱԾ Է

0

Հայաստանի Հանրապետութեան նախագահ Արմէն Սարգսեան 9 Յուլիսին ընդունած է Իրանի ուժանիւթի նախարար Ռեզա Արտաքանեանի գլխաւորած պատուիրակութիւնը: Նախագահ Սարգսեան գոհունակութեամբ ընդգծած է դրացի ու բարեկամ Իրանի հետ մեծ թափով զարգացող յարաբերութիւնները, բարձր մակարդակի քաղաքական երկխօսութիւնը եւ համագործակցութեամբ յագեցած օրակարգը:

Զրուցակիցները միտքեր փոխանակած են հայ-իրանական տնտեսական օրակարգին շուրջ` կարեւոր նկատելով ընթացիկ միացեալ ծրագիրներու արդիւնաւէտ իրականացման անհրաժեշտութիւնը: Անոնք համակարծիք եղած են, որ Իրանի Հանրապետութեան եւ Եւրասիական տնտեսական միութեան միջեւ ազատ առեւտուրի ժամանակաւոր համաձայնագիրը բազմաթիւ ծրագիրներ կեանքի կոչելու նոր կարելիութիւններ կը ստեղծէ:

Իրանի ուժանիւթի նախարար Ռեզա Արտաքանեան այցելած է նաեւ Հայաստանի վարչապետ Նիկոլ Փաշինեանին, որ կարեւոր նկատած է հայ-իրանական յարաբերութիւններու հետագայ զարգացումը եւ յոյս յայտնած, որ միացեալ ջանքերով պիտի յաջողին յառաջիկային եւս լիարժէքօրէն օգտագործել երկկողմանի կապերուն մէջ առկայ մեծ ներուժը: Ան համոզում յայտնած է, որ բարեկամական եւ դրացիական առողջ յարաբերութեան շնորհիւ կարելի պիտի ըլլայ զարգացնել հայ-իրանական յարաբերութիւնները` ընդգծելով առեւտրատնտեսական ծաւալներու յաւելման նպատակով քայլերու դիմելու անհրաժեշտութիւնը:

Ռեզա Արտաքանեան վարչապետին փոխանցած է Իրանի նախագահ Հասան Ռուհանիի ուղերձն ու Իրան այցելելու հրաւէրը: Իրանի ուժանիւթի նախարարը գործարար կապերու ամրապնդման մէջ հեռանկարային նկատած է ազատ տնտեսական գօտիներու ծիրին մէջ համագործակցութիւնն ու ներդրումներու ներգրաւումը:

Զրուցակիցները անդրադարձած են ուժանիւթի ոլորտին մէջ Հայաստանի եւ Իրանի միջեւ միասնաբար իրականացուող ծրագիրներուն ընթացքին եւ նոր նախաձեռնութիւններու կեանքի կոչման կարելիութիւններուն: Կողմերը կարեւոր նկատած են տարբեր ոլորտներու մէջ համագործակցութեան հետագայ ընդլայնումը եւ քննարկած միջկառավարական յանձնախումբի յառաջիկայ նիստին վերաբերող հարցեր:

Զրուցակիցները միտքեր փոխանակած են նաեւ շրջանային նշանակութեան եւ երկուստեք հետաքրքրութիւն ներկայացնող շարք մը այլ հարցերու շուրջ:

Share.

Leave A Reply

This site uses Akismet to reduce spam. Learn how your comment data is processed.