ՔԵՍԱՊԻ ԱԶԳ. ՈՒՍՈՒՄՆԱՍԻՐԱՑ ՄԻԱՑԵԱԼ ՃԵՄԱՐԱՆԻ 10-ՐԴ ՀՈՒՆՁՔԸ՝ 100-ԱՄԵԱԿԻ ՍԵՐՈՒՆԴԸ

0

Հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տ. Շահան Սրբ. Արք. Սարգիսեանի, կազմակերպութեամբ ճեմարանի Հոգաբարձութեան եւ Տնօրէնութեան, Կիրակի, 2 Յուլիս 2018-ին, երեկոյեան ժամը 6:00-ին, Քեսապ Համալիրի «Սարդարապատ» սրահէն ներս տեղի ունեցաւ միջնակարգի եւ երկրորդականի 2017-2018 ուսումնական տարեշրջանի ամավերջի հանդէսը, խորհրդաւոր ու տօնական մթնոլորտի մը ներքոյ, ուր ներկայ էին հոգեւոր հովիւներ, միութիւններու ներկայացուցիչներ եւ քեսապահայ հոծ բազմութիւն:
Բարի գալուստի խօսքէն ետք,ներկաները հրաւիրուեցան մէկ վայրկեան յոտնկայս լռութեամբ յարգելու Մայիսեան հերոսամարտերուն ինկած քաջարի հայորդիներուն եւ Սուրիոյ նահատակներուն անմար յիշատակը, որմէ ետք հնչեցին Հայաստանի եւ Սուրիոյ քայլերգները:
Հայերէն բացման խօսք արտասանեց ժԲ. Կարգի շրջանաւարտ Անթառամ Թրթռեան: Ան ըսաւ. « Այս հանդիսութեամբ կը փակուի մեր դպրոցական կեանքը, եւ մեր առջեւ կը բացուի նոր հորիզոնը մեր ապագային: Այդպէս կը զգանք մենք այսօր իբրեւ վկայեալներ: Ձեզմէ շատեր հաւանաբար այս դպրոցի աշակերտները եղած են: Ազգ. Ուսումնասիրաց Միացեալ Ճեմարանը ունի հարուստ անցեալ եւ նաեւ իւրայատուկ մթնոլորտ: Այս ճեմարանը բոլոր քեսապցիներուն է»: Ապա ան եզրափակելով ըսաւ. «Այս տարի Հայաստանի անկախութեան 100-ամեակն է, որ ամէն տեղ կը տօնուի մեծ շուքով: Ըլլալով ազգային վարժարան՝ մենք ալ կ’անդրադառնանք այդ մեծ տօնին: Մեր պատրաստած գեղարուեստական յայտագիրը կարճ է, բայց բովանդակալից, տօնական եւ յաղթերգութեան շունչով տիրական»:
Արաբերէն բացման խօսքով հանդէս եկաւ ժԲ. Կարգի շրջանաւարտ Փառէն Իլիաս: Ան շնորհակալութիւն յայտնեց ուսուցիչներուն, դաստիարակներուն եւ ծնողներուն ըսելով. «Ուսուցի’չս եւ առաջնո’րդս, ո˜վ իմաստուն նաւավար, որ կ’առաջնորդես մեզ դէպի խաղաղ նաւահանգիստ: Ուսուցչուհի’ս, ո˜վ անհատնում ճրագ, որ կ’այրիս, որպէսզի լուսաւորես շուրջիններուդ ճամբան: Ծնո’ղքս, ո˜վ անձնազոհութեան եւ նուիրումի անհատնում գանձ, ո’չ բառարաններուն եւ ոչ ալ գիրքերուն մէջ կը գտնեմ ճշգրիտ ու արժանավայել բառ մը որպէս շնորհակալութեան եւ երախտագիտութեան արտայայտութիւն»:
Այնուհետեւ բեմ հրաւիրուեցաւ ճեմարանի տնօրէն Վարուժան Փանոսեան: Ան ներկայացուց 2017-2018 ուսումնական տարեշրջանի ամփոփ տեղեկագիրը, որմէ ետք պարգեւատրեց հայերէն լեզուի առաջնակարգ աշակերտները:
Հոգաբարձութեան ատենապետ Նշան Լնդեան բեմ հրաւիրուելով, իր կարգին պարգեւատրեց երկար տարիներու ծառայութիւն ունեցող, վաստակաւոր ուսուցչուհի տիկ. Էլիզապէթ Լախոյան- Գլնճեանը եւ նախկին հոգաբարձութեան անդամ Ճորճ Պետուրեանը:
Շրջանաւարտները ներկայացուցին, հպարտանքի եւ յաղթանակի շունչով լեցուն գեղարուեստական կոկիկ յայտագիր մը, որ կ’ընդգրկէր.- արտասանութիւն՝ Յարութիւն Գազանճեանի «Արիւնն ու Արեւը», մեներգ՝ « Իմ Փոքրիկ Հայաստան», երգ՝ «Երազ իմ երկիր»,«Զարթիր որդեակ», երախտիքի խօսք, Թ. կարգի ներկայացում՝ «Անկախութեան ոգին», ուր աշակերտները անդրադարձան Մայիսեան հերոսական յաղթանակներուն եւ Հայաստանի անկախութեան, բանաստեղծական կտորներու մէջբերումով, ժԲ. Կարգի ներկայացում՝ «Տօնական», ուր յիշեցին Քեսապի առաջին հայ դպրոցին 170-ամեակը եւ հիմնադիրները, անդրադառնալով հայ դպրոցի առաքելութեան ՝ ներկայացուցին գրականութեան դասապահը եւ իրենց սորված մաս մը քերթուածներն ու գրականութիւնը ներկայացուցին հանդիսատեսին, իսկ աւարտին տօնական եւ ուրախ մթնոլորտով ժողովուրդին մէջէն անցնելով հեռացան սրահէն, որմէ անմիջապէս վերջ նոյն ուրախ մթնոլորտի մէջ բեմ բարձրացան միջնակարգի շրջանաւարտները:
Ցուցադրուեցաւ ԺԲ. Կարգին կողմէ պատրաստուած տեսերիզ մը, ուր կը ներկայացուէր շրջանաւարտներուն եկեղեցի ժամանելը եւ խունկ ու մոմ վարելը՝ ի յիշատակ Քեսապի առաջին աշակերտներուն, որոնք առաջին անգամ այբուբեն գրեցին, շարական կարդացին, պատմութիւն սերտեցին ծխական դպրոցին յարկին տակ: Շրջանաւարտները իրենց երախտագիտութիւնն ու յարգանքը ցուցաբերեցին հանդէպ իրենց պապերուն, որ վառ պահած են ուսումի ու հայ դպրոցի ջահը եւ որպէս ժառանգութիւն փոխանցած են յաջորդող սերունդներուն: Ապա շրջանաւարտները այդ մոմերուն լոյսէն կանթեղը վարելով ուղղուեցան դպրոց:
Տեսերիզի աւարտին, բեմ բարձրացան ժԲ. Կարգի 11 շրջանաւարտները: Հայերէն ուղերձը արտասանեց Կարօտ Սաղտճեան: Ան ըսաւ .«Այս ճեմարանէն ներս սկսած են մեր առաջին հաւաքական խաղերը, մեր ընկերական կեանքը, մեր երազանքները: Հո’ս է որ զարգացած են մեր մտքերն ու ազնուացած են մեր հոգիները:Մանկապարտէզ մուտք գործելէ 15 տարի ետք, այս բեմին վրայ, մեզմէ իւրաքանչիւրը այլազան գիտելիքներ եւ զանազան փորձառութիւններ ամբարած հրաժեշտ կու տայ դպրոցական տարիներուն: Իբրեւ դասարան շատ ջերմ կապերով կապուած ենք իրարու:Ասկէ ետք մեզմէ իւրաքանչիւրը ուսանողական իր սեփական ճամբան պիտի ընտրէ, տարբեր մասնագիտութեան պիտի հետեւի, անձնական ուզած կեանքը պիտի կերտէ: Ինչ որ մեզ իրարու կապուած պիտի պահէ մեր ճեմարանական ըլլալն է»: Իր խօսքի աւարտին ան ըսաւ. «Դպրոց՝ կը նշանակէ ուղղութիւն: Մենք ստացանք ուղղութիւն, որով ճամբայ կ’ելլենք դէպի կեանքի նոր փուլ անվախ ու համարձակ, որովհետեւ ուղղութիւն ունեցող մարդը չի կորսուիր:
«Ուսումը՝ զէնքն է յաղթութեան. ան կը բանայ ամէն դուռ: Ճեմարանը մեզի տուաւ այդ զէնքը: Բան մը, որուն համար կը մնանք շնորհակալ ու երախտապարտ առաջին հերթին ճեմարանին, ուր վայելեցինք սէր ու գուրգուրանք, շնորհակալութիւն ՝ հոգաբարձութեան, մեր ուսուցիչ ուսուցչուհիներուն, որոնք իրենց ծով համբերութեամբ մեր կողքին կանգնեցան, քաջալերեցին մեզ, լուսաւորեցին մեր մտքերը, թռիչք տուին մեր հոգիներուն, հետեւեցան մեր քայլերուն: Շնորհակալութիւն մեր ծնողներուն, որոնց անսահման սէրը, նուիրումը եւ հոգատարութիւնը եղան մեր յաջողութիւններու հիմնական աղբիւրը»: Ապա տեղի ունեցաւ կանթեղի փոխանցումը ժԱ. կարգի աշակերտներուն:
Ծնողներուն շնորհակալական խօսքը արտասանեց ԺԲ. կարգէն Շաղիկ Լնդեան։ Ծնողները ամփոփ տողերու մէջ արտայայատած էին իրենց երախտագիտութիւնը Ճեմարանի Հոգաբարձութեան, Տնօրէնութեան եւ Ուսուցչական Կազմին, որոնք ջանք չեն խնայեր բարձր պահելու այս կրթօճախը եւ հայեցի դաստիարակութիւն ջամբելու իրերայաջորդ սերունդներուն։
Ապա երկու փոքրեր Սարդարապատի ցուլին վրայ յատուկ ձեւով տեղադրուած շրջանաւարտներուն վկայականները ներս բերին: Այսպիսով շրջանաւարտներուն կը փոխանցուէր Սարդարապատի հզօր պատգամն ու անոր խորհուրդը մշտարծարծ պահելու յորդորը:
Այնուհետեւ քահանայ հօր, հոգաբարձութեան ատենապետին եւ տնօրէնին ձեռամբ տեղի ունեցաւ վկայականաց բաշխումը: Իւրաքանչիւր շրջանաւարտ վկայականին կողքին Բերիոյ Հայոց Թեմի Առաջնորդին կողմէ ստացաւ յատուկ նուէր մը՝ Խաչատուր Աբովեանի «Վէրք Հայաստանի» գիրքը:
Թ. Կարգի շրջանաւարտներն են.- Արմէն Դանիէլեան,Աստղիկ Դանիէլեան, Նարեկ Լնդեան, Նարեկ Մանճիկեան,Ալիք Քորթմոսեան,Մինաս Դանիէլեան,Մէյրի Սեդա Դանիէլեան, Հրակ Լնդեան եւ Նշան Պետրճիքեան:
ԺԲ. Կարգի աշակերտներն են.- Սողոմոն Լնդեան,Սարօ Պետուրեան, Վերժին Բէնդէզեան,Փարէն Իլիաս, Շաղիկ Լնդեան, Նժդեհ Մելքոնեան, Արփի Ինճէճիքեան, Յարութիւն Քիւրքճեան, Անթառամ Թրթռեան, Կարօտ Սաղտճեան եւ Պետօ Գարայեան:
Օրուան եզրափակիչ պատգամը տուաւ հոգաբարձութեան ատենապետ Նշան Լնդեանը: Ան շնորհաւորեց ներկաները եւ ըսաւ. «Տարի մը եւս բոլորեցինք հասնելով ճեմարանիս 10-րդ հունձքին: Նախորդ տարիներուն նման, այս տարի եւս արձանագրեցինք շոշափելի յառաջախաղացք մեզի վստահուած կրթական այս գործին մէջ, շնորհիւ ձեր բոլորին աջակցութեան, աշակերտութեան աշխատանքին եւ գիտակցութեան, ուսուցիչներուն անսահման համբերութեան եւ զոհողութեան, ինչպէս նաեւ ազգային մարմիններուն եւ Սրբազան հօր յատուկ հովանաւորութեան»: Խօսքը ուղղելով շրջանաւարտներուն ան ըսաւ. «Սիրելի՛ շրջանաւարտներ, դուք այսօր պիտի բաժնուիք ձեր ուսումնական միջավայրէն,
անցնելով աւելի բարձր եւ դժուար փուլ: Բաժանումը յուզիչ է, սակայն ձեր պարագային նոր տեսիլքի դուռ կը բացուի ձեր դիմաց, նոր երազներով, նոր շրջանակով: Մենք մտահոգ չենք ձեզմով, Ճեմարանը ձեզի սորվեցուց կեանքը ապրիլ արժէքի եւ սկզբունքի գիտակցութեամբ, դառնալ ստեղծագործ: Սորվեցաք կեանքին նայիլ պատասխանատուութեան զգացումով, եւ ոչ թէ հանդիսատեսի դերով, ցանելով եւ ոչ թէ միայն ամբարելով, ճառագայթելով եւ ոչ թէ ստուերներու տակ ապրելով:
«Խնդրանքս է բոլորէդ, որ հպարտ ըլլաք ձեր Ճեմարանով, հայ աշակերտ կոչուելու զգացումով, ինքնութեան ճանաչումով եւ հաստատումով»:
Այնուհետեւ ան շնորհակալութիւն յայտնեց երկրիս վսեմաշուք նախագահ տոքթ. Պաշար ալ Ասատին, խոհեմ եւ քաջարի ղեկավարութեան, քաջ զինուորին՝ իր անսահման զոհողութեան, նահատակներուն՝ իրենց թափած արեան համար: Շնորհիւ ասոնց դժուար ճանապարհը արդէն իսկ յաղթահարուած համարելով, մաղթեց Սուրիական Հայրենիքին ամբողջական ազատագրում եւ խաղաղութեան հաստատում: Եզրափակելով Լնդեան ըսաւ. «Կեցցե’ն մեր շրջանաւարտները, կեցցէ’ Ուսուցչական Կազմը, կեցցէ’ Ճեմարանը եւ իր աշակերտութիւնը, կեցցէ’ մեր ազգը եւ ժողովուրդը, կեցցէ’ մեր սիրելի գիւղը՝ Քեսապը»:
Հանդիսութիւնը փակուեցաւ Ճեմարանի քայլերգով, Սարդարապատի յաղթերգով եւ քահանայ հօր «Պահպանիչ» աղօթքով:

Թղթակից

 

Share.

Leave A Reply

This site uses Akismet to reduce spam. Learn how your comment data is processed.