ՉԻՆԱՍՏԱՆ ՊԻՏԻ ՊԱՅՔԱՐԻ ԾԱՅՐԱՅԵՂԱԿԱՆՈՒԹԵԱՆ ԴԷՄ` Ի ՇԱՀ ՄԻՋԻՆ ԱՐԵՒԵԼՔԻ ԲՆԱԿՉՈՒԹԵԱՆ

0
Սուրիոյ, Յորդանանի, Եմէնի Եւ Պաղեստինի 100 Միլիոն Տոլար Արժողութեամբ Չինական  Մարդասիրական Օժանդակութիւն

Չինաստանի նախագահ Սի Ցինփին երէկ Փեքինի մէջ Չին-արաբական համագործակցութեան 8-րդ խորհրդաժողովի բացումին ընթացքին յայտարարեց, որ իր երկիրը մտադիր է Սուրիոյ, Յորդանանի, Եմէնի եւ Պաղեստինի 100 միլիոն տոլար արժողութեամբ մարդասիրական օժանդակութիւն տրամադրել:

Չինաստանի նախագահը ըսաւ. «Չինաստան սուրիացի, յորդանանցի եւ եմէնցի ժողովուրդներուն պիտի տրամադրէ մարդասիրական օժանդակութիւններ 600 միլիոն եուանի արժողութեամբ, ինչ որ համարժէք է 90,6 միլիոն տոլարի»:

Ան յայտնեց, որ Չինաստան մտադիր է պաղեստինցիներուն տրամադրել շուրջ 100 միլիոն եուան (15 միլիոն տոլար)` աջակցելու համար տնտեսական աճին նպաստելու պաղեստինեան իշխանութեան ջանքերուն:

Չինաստանի նախագահը նաեւ յայտարարեց, որ աշխատանք պիտի տանի ՄԱԿ-ի մէջ պաղեստինցի ժողովուրդին օգնելու, «որպէսզի կարենայ իր դիւանագիտական շահերը ամրապնդել»:

«Չինաստան Միջին Արեւելքի մէջ կը վարէ խաղաղութեան պահպանման քաղաքականութիւն, որ հաշուի կ՛առնէ այդ շրջանի ժողովուրդներուն շահերը, ներառեալ անոնց զարգացման ձգտումը», ըսաւ ան` աւելցնելով. «Մենք մտադիր ենք հետեւիլ ազգային գերիշխանութեան պաշտպանութեան եւ անջատողականութեան դրսեւորումներու դէմ սկզբունքին: Չինական կողմը հանդէս կու գայ ահաբեկչութեան դէմ պայքարի բոլոր հաւանական միջոցներու կիրարկման օգտին, որոնք կ՛արտօնեն ապահովել արաբական երկիրներու բնակչութեան կեանքի բարելաւումը»:

Չին-արաբական համագործակցութեան 8-րդ խորհրդաժողովին կը մասնակցին 21 արաբական պետութիւններու դիւանագիտական եւ կառավարական շրջանակներու ներկայացուցիչներ, ինչպէս նաեւ Արաբական լիկայի ընդհանուր քարտուղար Ահմետ Ապուլ Ղէյթ:

Խորհրդաժողովի կեդրոնական խնդիրներէն մէկը միջշրջանային առեւտրական-տնտեսական համագործակցութեան ծաւալներու աշխուժացումն ու մեծացումն է Չինաստանի «Մէկ գօտի, մէկ ուղի» կառավարական նախաձեռնութեան ծիրին մէջ:

Share.

Leave A Reply

This site uses Akismet to reduce spam. Learn how your comment data is processed.