ԹՈՒՐՔԻԱ ԱՐՑԱԽԻ ՀԱՐՑՈՎ ՄԻՇՏ Կ՛ԱՋԱԿՑԻ ԱՏՐՊԷՅՃԱՆԻՆ. ԱԼԻԵՒ՝ ԷՐՏՈՂԱՆԻ ՀԵՏ ՀԱՆԴԻՊՈՒՄԷՆ ԵՏՔ

0

Թուրքիոյ նախագահի պաշտօնին վերընտրուելէն եւ նախագահական երդման արարղութենէն միայն մէկ օր ետք, Ռեճէպ Թայիպ Էրտողան Երեքշաբթի, 10 Յուլիսին Ատրպէյճան այցելած է։

Ատրպէյճանէն ետք Էրտողան պաշտօնական այցելութեամբ պիտի մեկնի բռնագրաւեալ հիւսիսային Կիպրոսի թրքական ինքնահռչակ հանրապետութիւն:

APA ատրպէյճանական լրատուականին համաձայն, Էրտողանի հետ հանդիպումէն ետք տրուած մամլոյ ասուլիսին ընթացքին` Ալիեւ ըսած է, թէ Թուրքիա Արցախի հարցով միշտ կ՛աջակցի Ատրպէյճանին՝ աւելցնելով, որ Հայաստան պէտք է հետեւի ՄԱԿ-ի բանաձեւերուն եւ վերադարձնէ Ատրպէյճանի բռնագրաւեալ հողերը։

Ալիեւ նաեւ յայտնած է, թէ Պաքու Թուրքիայէն կը գնէ ժամանակակից զէնքեր, որոնց մէկ մասը վերջերս ցուցադրուած էին Պաքուի մէջ տեղի ունեցած ռազմական շքերթին ընթացքին եւ ուրախութիւն յայտնած է, որ այս տարի երկու երկիրներուն բանակները ծրագրած են եօթը համատեղ զօրավարժութիւն, որոնցմէ երեքը արդէն իրականացած է։

Իր կարգին, Էրտողան յայտնած է, թէ այն համոզումը ունի, որ Ատրպէյճանի եւ Թուրքիոյ եղբայրութիւնը պիտի շարունակուի եւ ամրապնդուի:

«Ինչպէս յայտնի է, մենք մինչեւ այսօր այդ եղբայրութիւնը պահպանած ենք՝ «մէկ ազգ, երկու ժողովուրդ» բառերով: Մենք առաջին այցելութիւնը կը կատարենք Ատրպէյճան այնպէս, ինչպէս իմ եղբայր Իլհամ Ալիեւը նախագահական ընտրութիւններէն ետք այցելած էր մեր երկիրը», աւելցուցած է ան:

Share.

Leave A Reply

This site uses Akismet to reduce spam. Learn how your comment data is processed.