ՀԱՅԱՍՏԱՆ ԶԳԱԼԻՕՐԷՆ ԲԱՐԵԼԱՒԱԾ Է ԻՐ ԴԻՐՔԸ ԿԱՇԱՌԱԿԵՐՈՒԹԵԱՆ ԴԷՄ ՊԱՅՔԱՐԻՆ ԳԾՈՎ

0

Կաշառակերութեան ոլորտի դէմ միջազգային կազմակերպութիւններու վերջին գնահատումները կը փաստեն, որ Հայաստան զգալիօրէն բարելաւած է իր դիրքը կաշառակերութեան դէմ պայքարին գծով:

2-5 Յուլիսին, Փարիզի մէջ Տնտեսական Համագործակցութեան եւ Զարգացման կազմակերպութեան (ՏՀԶԿ) Արեւելեան Եւրոպայի եւ Կեդրոնական Ասիոյ կաշառակերութեան դէմ ցանցի կաշառակերութեան դէմ գործողութիւններ ծրագրողներուն հանդիպումին ընթացքին գնահատուած է Հայաստանի առնչուող զեկոյցը: Հայաստանի պատուիրակութիւնը՝ կազմուած՝ ՀՀ արդարադատութեան նախարարի տեղակալ Սուրէն Քրմոյեանէ, ՀՀ գլխաւոր դատախազի տեղակալ Դաւիթ Մելքոնեանէ, Բարձրաստիճան պաշտօնատար անձերու բարոյագիտութեան յանձնաժողովի նախագահ Սիրանոյշ Սահակեանէ, ՀՀ կրթութեան եւ գիտութեան նախարարի տեղակալ Արեւիկ Անափիոսեանէ, ՀՀ արդարադատութեան նախարարութեան աշխատակազմի կաշառակերութեան դէմ քաղաքականութեան մշակման բաժինի պետ Մարիամ Գալստեանէ, ներկայացուցած է Հայաստանի արձանագրած արդիւնքները կաշառակերութեան դէմ պայքարին գծով:  Գնահատող խումբին կողմէ յատուկ ուշադրութեան եւ գնահատանքի արժանացած է վերջին ժամանակահատուածին կաշառակերութեան դէպքերուն բացայայտման արդիւնաւէտութիւնը:

Պատուիրակութեան այցին եւ բանակցութիւններուն իբրեւ արդիւնք արձանագրուած է, որ Հայաստանին ներկայացուած եւ այս փուլով գնահատուող 21 յանձնարարականները կատարուած են, 3-ը՝ ամբողջութեամբ, 8-ը՝ զգալիօրէն, 10-ը՝ մասնակի:

Share.

Leave A Reply

This site uses Akismet to reduce spam. Learn how your comment data is processed.