ՍՊԱՐՏԱԿ ՍԷՅՐԱՆԵԱՆ. «ԵԹԷ ՔԱՂԱՔԱԿԱՆ ՈՒԺԵՐԸ ԸՆՏՐՈՒԹԻՒՆՆԵՐՈՒ ՈՒՂՂՈՒԻՆ ՄԻԱՍՆԱԿԱՆ ՄԷԿ  ՑՈՒՑԱԿՈՎ,  ՈՒՐԵՄՆ ՄԵՆՔ ԿԸ ԽՕՍԻՆՔ ՈՉ ԹԷ ԸՆՏՐՈՒԹԻՒՆՆԵՐՈՒ, ԱՅԼ՝ ՑՈՒՑԱԿ ԿԱԶՄԵԼՈՒ ՄԱՍԻՆ»

0

 Հայաստանի Հանրապետութեան Ազգային Ժողովի ՀՅԴ խմբակցութեան պատգամաւոր Սպարտակ Սէյրանեան «Առաջին լրատուական»ին հետ զրոյցի մը ընթացքին անդրադառնալով «Ժառանգութիւն» Կուսակցութեան նախկին առաջնորդ Ռաֆֆի Յովհաննիսեանի յայտարարութեան ընդգծեց, որ քաղաքական այս իրավիճակին մէջ ով կ՛ուզէք, ի՛նչ «փայլուն» գաղափար ու առաջարկ կ՛ուզէք կրնայ ներկայացնել․ երբ որ առաջարկներու ընդհանուր մուտքագրում ըլլայ, այդ պարագային է, որ միայն ընտրութիւնները կազմակերպող քաղաքական մարմինները որոշում կը գոյացնեն, թէ ինչպէս պիտի մասնակցին ընտրութիւններուն:

Յիշեցնենք, որ Ռաֆֆի Յովհաննիսեան վերջերս լրագրողներու հետ զրոյցի մը ընթացքին ըսած էր, որ ժողովրդային շարժումը յառաջիկայ խորհրդարանական արտահերթ ընտրութիւններուն պէտք է մասնակցի միասնական մէկ ցուցակով, որպէսզի ընտրութիւնները չդառնան կռուան այս կամ  այն քաղաքական ուժի միջեւ։

Այս շրջագիծին մէջ Սպարտակ Սէյրանեան աւելցուցած է․ «Եթէ բոլոր քաղաքական ընտրութեան ուղղուին միասնական մէկ ցուցակով, ուրեմն մենք կը խօսինք ոչ թէ ընտրութիւններու մասին, այլ՝ ցուցակ կազմելու մասին. եկէք ուրեմն Հայաստանի բոլոր քաղաքական ուժերով խորհրդարանի մէկ հատ մեծ, ընդհանուր, համամասնական  ցուցակ պատրաստենք  ու ընտրութիւններ չընենք, էլի: Ժողովուրդին ցոյց տանք այդ ցուցակը եւ ըսենք՝ ժողովուրդ ջան, երջանիկ եղիր, մենք բոլորս մէկ հատ ցուցակ ունինք ու այդ ցուցակով կ’ուղղուինք ձեզ  ղեկավարելու»։

Պատգամաւորին հետ զրոյցի ընթացքին անդրադարձ կատարուած է նաեւ Երեւանի քաղաքապետ Տարօն Մարգարեանի ներկայացուցած հրաժարականին, որուն առնչութեամբ Սէյրանեան յայտնած է, որ հրաժարական ներկայացնելու դրդապատճառներու մասին ինքը չի կրնար տեսակէտ յայտնել՝ նկատի առնելով այն հանգամանքը, որ նոյնիսկ Տարօն Մարգարեան իր այդ որոշումին պատճառը չի ներկայացներ, հետեւաբար այս առումով որեւէ կարծիք յայտնելը  գուշակութեան արդիւնք կ’ըլլայ պարզապէս։

Պատասխանելով այն հարցումին, թէ եթէ լուծարուի Երեւանի ներկայ աւագանին եւ յառաջիկային աւագանիի նոր ընտրութիւններ կազմակերպուին, ի տարբերութիւն նախորդ տարուան՝ այս անգամ Դաշնակցութիւնը կ’առաջադրէ՞ իր թեկնածուն  Երեւանի քաղաքապետի պաշտօնին, ՀՅԴ ներկայացուցիչը ըսած է․

«Եթէ այնպիսի իրավիճակ յառաջանայ, որ Երեւանի աւագանին յայտնուի ոչ գործունեայ կացութեան մէջ եւ որոշուի աւագանիի նոր ընտրութիւններ կատարել, կը կարծեմ, որ այն ատեն ՀՅԴ Գերագոյն Մարմինը կը գնահատէ քաղաքական իրավիճակը եւ համապատասխան որոշում կը գոյացնէ՝ մասնակցիլ, կամ ոչ»։

 

 Տիանա Դաւթեան

 

 

 

Share.

Leave A Reply

This site uses Akismet to reduce spam. Learn how your comment data is processed.