«ԾԻԱԾԱՆ»Ը՝ ՈՒՐԱԽ ՄԱՆԿՈՒԹԻՒՆ ՆՇԱՆԱԲԱՆՈՎ

0

Բերիոյ Հայոց Թեմի Ուսումնական Խորհուրդի կազմակերպած «Ծիածան»ամառնային դպրոց-ակումբը 29 Մայիսէն 2 Յուլիս, 5 շաբաթներու տեւողութեամբ ծիածանի խօսուն եւ ներդաշնակ գոյներով փայլք ու երանգ տուաւ 225 աշակերտներուն։ «Ծիածան» ամառնային դպրոց-ակումբի առաջին օրուան բացումը կատարուեցաւ սրբազան հօր այցելութեամբ եւ օրհնանքով։ Ինչպէս նախորդ տարիներուն, այս տարի եւս Ուսումնական Խորհուրդի ճշդած նշանաբանն էր՝ «Ուրախ մանկութիւն»։ Խորհուրդի անդամները ոչ մէկ ճիգ խնայեցին յաջողութեամբ պսակելու ձեռնարկը՝ նոր թափով ու նորամշակ ծրագիրով։ «Ծիածան» դպրոց-ակումբի ժրաջան եւ կատարեալին ձգտող ուսուցչական կազմը կը բաղկանար հետեւեալներէն.- Կարմիր խումբի պատասխանատուներ՝ Սեւան Իսրայէլեան-Աստարճեան եւ Սիլվա Քէհէեան, Նարնջագոյն խումբի՝ Ժանէթ Լիպարեան-Թիւթիւնճեան, Դեղին խումբի՝ Մարիանա Մարգարեան, Կանաչ խումբի՝ Ցոլեր Ապաճեան, Կապոյտ խումբի՝ Նաթալի Թաթոսեան-Հապէշեան, Վարդագոյն խումբի՝ Սօսէ Քէօրիւկեան, իսկ Մանիշակագոյն խումբի՝ Մարինա Մերտխանեան-Ագըլեան։ Ընդհանուր պատասխանատուն էր Անի Գալտընեան, որ տարիներու իր ձեռքբերած փորձառութեամբ եւ օգտաշատ գիտելիքներով երանգ տուաւ «Ծիածան»ին։ Այս տարի «Ծիածան»էն ներս ուշագրաւ էին օտար լեզուներով խօսակցական վարժութիւնները։ Աշակերտները ֆրանսերէնով սորվեցան՝ երգեր, մարմնի անդամներուն անունները, գոյները, թիւերը եւ բարեւելը ու ձեւերը, իսկ արաբերէնով ու անգլերէնով՝ իրենց դպրոցի ուսումնական ծրագիրէն եզրեր։ Բացօթեայ դաստիարակչական պտոյտները, դաշտագնացութիւնները, խաղերը, աւազանագնացութիւնը, մարզանքը եւ մեծ պաստառի վրայ շարժապատկերի ցուցադրութիւնը խանդավառեցին փոքրիկները, որոնք յոգնութիւն չճանչցան երբեք։ Տեղին է յիշել, որ այս տարի աւելի հետաքրքրական պտոյտներ ունեցանք քաղաքէս ներս տիրող ապահովութեան հետեւանքով։ Մանուկները ակնդիր եղան տիկնիկային թատրոններու, որոնք պատրաստուած էին ուսուցչուհիներուն կողմէ: Անոնք իւրացուցին նաեւ կենցաղավարական գիտելիքներ՝ տեսերիզի ցուցադրութեամբ։ Իւրաքանչիւր շաբթուան ընթացքին, աշակերտներուն մատուցուեցան զանազան նիւթեր, ապա այդ նիւթերուն մասին անոնք պատրաստեցին գունագեղ ձեռայիններ՝ զարկ տալով իրենց երեւակայութեան։ «Ծիածան» ամառնային դպրոց-ակումբի աւարտը պսակուեցաւ հանդիսութեամբ՝ Երկուշաբթի, 2 Յուլիս 2018-ին, երեկոյեան ժամը 5:00-ին, Ազգ. Կիւլպէնկեան վարժարանի շրջափակէն ներս։ Օրուան բեմավարն էր Անի Գալտընեան։ Ան իր բացման խօսքով կատարուած աշխատանքներուն շուրջ ընդհանուր տեղեկութիւն տուաւ ծնողներուն։ Իւրաքանչիւր խումբ ներկայացուց Թումանեանի հեքիաթներէն քաղուած զաւեշտներ, հայկական պարեր, ասմունք եւ երգեր։ Բեմահարթակը մանուկներուն ուրախութեամբ եւ ցնծութեամբ պայծառացաւ։ Այս հանդիսութեան նպատակն էր սէր դրոշմել հայ երեխային մէջ հայ գրականութեան ու մշակոյթին հանդէպ։

«Ծիածան»ի իւրաքանչիւր օրուան սովորութեան նման, հանդիսութենէն ետք ալ փոքրիկներուն հիւրասիրութիւն կատարուեցաւ… Այս անգամ իրենց սիրած պաղպաղակը հրամցուեցաւ։

 ՑՈԼԵՐ ԱՊԱՃԵԱՆ

Share.

Leave A Reply

This site uses Akismet to reduce spam. Learn how your comment data is processed.