ՈՂՈՄՊԻԱԿԱՆ ԽԱՂԵՐՈՒՆ ԸՆԴՀԱՆՈՒՐ ԿԱՆՈՆՆԵՐԸ

0

Սարգիս Խուպեսէրեան

 

Ողոմպիական կանոններուն համաձայն, սիրողական խաղցողը այն անձն է, որ նուիրուած է մարզանքին իր հաճոյքին համար, առանց անկէ նիւթական որեւէ օգուտ ակնկալելու, ուղղակի կամ անուղղակի: Ան նաեւ կը հնազանդի իր մարզանքի ճիւղին առնչուող միջազգային ֆետերասիոնի (դաշնակցութեան-«Գ.») կանոններուն։

Մարզիկ մը, որ անգամ մը ողոմպիական խաղերուն մասնակցած է ազգի մը գոյնին տակ, յաջորդ ողոմպիական խաղերուն չի կրնար մրցիլ ուրիշ երկրի մը կողմէ։ Ողոմպիական խաղերու մրցակիցներուն համար գոյութիւն չունի տարիքի սահմանում։ Կիները կրնան մրցիլ միայն աթլեթիզմի, սուսերամարտի, լողի, մարմնամարզի, արուեստական չմշկումի, դահուկի, քանօէի եւ նաւարշաւի ճիւղերուն մէջ։

Ստիպողական մարզախաղերէն բացի կրնան ներմուծել խաղերու յայտագիրին մէջ, ըստ կազմակերպիչ կոմիտէին փափաքին, մարզախաղերը.- ֆութպոլ կամ ռուկպի, փոլօ, ուոթըրփոլօ, մարգագետնի վրայ հոքէյ, հենտպոլ, պասքեթպոլ, քանոէ եւ առագաստանաւ։

1948-էն ի վեր մարզախաղերու հետեւեալ ճիւղերը կը ներառնուին ամառնային ողիմպիական խաղերու յայտագիրին մէջ.- Աթլեթիզմ, թիավարութիւն, պասքեթպոլ, կռփամարտ, քանօէ-քայք, հեծելանիւ սուսերամարտ, ֆութպոլ, մարմնամարզ, ծանրաբարձութիւն, մարգագետնի վրայ հոքէյ, ըմբշամարտ, լող եւ ուոթըրփոլօ, ձիավարութիւն, արդիական հնգամրցում, նշանառութիւն եւ առագաստանաւ։

Ողոմպիական խաղերու յայտագիրին մէջ տեղ առնելու համար մարզախաղի ճիւղ մը պէտք է կիրարուած ըլլայ բովանդակ աշխարհի վրայ՝ առնուազն տասը երկիրներու մէջ, որոնց առնուազն վեցը պէտք է արձանագրուած ըլլան խաղերուն։ Կազմակերպիչ կոմիտէն կրնայ աւելցնել յայտագիրին ցուցադրութեան երկու մարզախաղեր՝ մէկը ազգային մարզախաղի ճիւղ մը եւ միւսը կազմակերպիչ երկիրին համար օտար ճիւղ մը։

Մարզախաղերու հետեւեալ ճիւղերը կրնան տեղ առնել ձմեռնային խաղերուն յայտագիրին մէջ.- Դահուկ, չմշկում, սառի վրայ հոքէյ, պոպսլայհ, սքէլըթըն եւ քիւրլինկ։

Միայն ազգային ողոմպիականի կոմիտէները կրնան ընտրել եւ ղրկել մրցակիցները։ Խաղերուն բացման հանդէսէն վեց շաբաթ առաջ կը գոցուին ազգային ողոմպիականի կոմիտէներուն կողմէ յայտարարուած մասնակցութեան արձանագրութիւնները, իսկ մրցակիցներուն անունները պէտք է ծանօթ ըլլան իւրաքանչիւր մարզախաղի առաջին մրցումին թուականէն առնուազն 14 օր առաջ։ Ամառնային խաղերուն անհատական մրցումներուն մէջ մասնակից մարզիկներուն թիւը չի կրնար երեքէն աւելի ըլլալ.- առանց փոխանորդ խաղցողը նկատի առնելու.- իւրաքանչիւր ազգի համար, իսկ ձմեռնային խաղերուն կրնայ մասնակցիլ առաւելագոյնը չորս մրցակից։ Հաւաքական մրցումներուն համար իւրաքանչիւր ազգէ միայն մէկ խումբ։

Վարիչները եւ դատական կազմը կ’ընտրուին իւրաքանչիւր մարզախաղի միջազգային ֆետերասիոնին կողմէ։ Ողոմպիական խաղերուն բոլոր մասնակիցները կը ստանան յիշատակի մէյմէկ մետալ։ Անհատական մրցումներուն համար առաջին մրցանակն է ոսկեզօծ մետալ մը եւ վկայական մը, երկրորդը՝ արծաթէ մետալ մը եւ վկայական մը, երրորդը՝ պրոնզէ մետալ մը եւ վկայական մը, չորրորդը, հինգերորդը եւ վեցերորդը վկայական մը։ Խմբային մրցումներուն համար յաղթական թիմի իւրաքանչիւր անդամ կը ստանայ ոսկեզօծ մետալ մը եւ վկայական մը, երկրորդինները՝ արծաթէ մետալ եւ վկայական, երրորդինները՝ պրոնզէ մետալ եւ վկայական։

Ախոյեաններուն անունները կը փորագրուէին այն վայրին պատերուն վրայ, ուր կատարուած կ’ըլլային ողոմպիական խաղերուն բացման եւ փակման հանդիսութիւնները։ Ողոմպիական ախոյեանի տիտղոսը կրնան ստանալ միայն անհատական մրցումներուն մասնակից եւ ֆինալին առաջին հանդիսացած մարզիկները։ Յաղթական թիմի մը անդամները կրնան ստանալ միայն «Ողոմպիական ախոյեան թիմի անդամ»ի տիտղոս։ Գոյութիւն չունի եւ բացարձակապէս չի կրնար ունենալ երկիրներու միջեւ որեւէ կարգադրութիւն մրցակիցներու իջեւան ընտրելու համար։ Կազմակերպիչ կոմիտէն պէտք է պատրաստէ «Ողոմպիական գիւղ» մը, որպէսզի բոլոր մրցակիցները միեւնոյն տեղը իջեւանէն խաղերուն ընթացքին։

Share.

Leave A Reply

This site uses Akismet to reduce spam. Learn how your comment data is processed.