ՓԱՇԻՆԵԱՆ ՈՉ ՊԱՇՏՕՆԱԿԱՆ, ԱՇԽԱՏԱՆՔԱՅԻՆ ՀԱՆԴԻՊՈՒՄՆԵՐ ՈՒՆԵՑԱԾ Է ՇԱՐՔ ՄԸ ԵՐԿԻՐՆԵՐՈՒ ԱՌԱՋՆՈՐԴՆԵՐՈՒՆ ՀԵՏ

0

Հայաստանի Հանրապետութեան վարչապետ Նիկոլ Փաշինեան ՆԱԹՕ-ի վեհաժողովի շրջանակին մէջ 12 Յուլիսին ոչ պաշտօնական, աշխատանքային հանդիպումներ ունեցած է շարք մը երկիրներու առաջնորդներուն հետ: Վարչապետը յատկապէս հանդիպած է Աֆղանստանի նախագահ Աշրաֆ Ղանիի, Պելճիքայի Թագաւորութեան վարչապետ Շառլ Միշէլի, Գերմանիոյ վարչապետ Անկելա Մերքէլի, Ֆրանսայի նախագահ Էմանուէլ Մաքրոնի, Իտալիոյ վարչապետ Ճուզեփփէ Քոնթէի, Քանատայի վարչապետ Ճասթին Թրիւտոյի, Լիթվայի նախագահ Տալիա Կրիպաուսքայթէի, Յունաստանի վարչապետ Ալեքսիս Ցիփրասի, Ուքրանիոյ նախագահ Փետրօ Փորոշենքոյի, Սպանիոյ վարչապետ Պետրօ Սանչէս-Փերեզ Քասթեխոնի, Մակեդոնիոյ վարչապետ Զորան Զաեւի, Սլովաքիոյ նախագահ Անտրէյ Քիսքայի եւ ՆԱԹՕ-ի գլխաւոր քարտուղար Ժենս Սթոլթենպըրկի հետ:

Վարչապետը վերոյիշեալ պետութիւններու ղեկավարներուն եւ ՆԱԹՕ-ի գլխաւոր քարտուղարին հետ քննարկած է երկկողմանի եւ բազմակողմանի յարաբերութիւններու զարգացման հեռանկարներն ու երկուստեք հետաքրքրութիւն ներկայացնող տարբեր հարցեր:
Քանատայի վարչապետ Ճասթին Թրիւթոն վերահաստատած է իր մասնակցութիւնը աշնան Երեւանի մէջ տեղի ունենալիք Ֆրանսախօս Երկիրներու 17-րդ վեհաժողովին եւ յայտնած, որ Հայաստան այցելած է 1988-ին՝ հօր հետ ու մեր երկրին մասին լաւ եւ դրական տպաւորութիւն ունի:

Ֆրանսայի նախագահ Էմանուէլ Մաքրոն, Ուքրանիոյ նախագահ Պոյթըր Փորոշենքօն եւ Յունաստանի վարչապետ Ալեքսիս Ցիպրաս վարչապետ Փաշինեանը հրաւիրած են իրենց երկիրներ: Անոնք կարեւոր համարած են Հայաստանի հետ երկկողմանի համագործակցութեան ընդլայնումը շարք մը ոլորտներու մէջ եւ համոզմունք յայտնած, որ ՀՀ նոր կառավարութեան հետ կը ծաւալի արդիւնաւէտ գործակցութիւն: Իտալիոյ վարչապետը ընդգծած է Հայաստանի հետ պատմականօրէն ամուր բարեկամական կապերու առկայութիւնը եւ կարեւոր համարած է անոնց հետագայ ամրապնդումն ու զարգացումը:

Վարչապետը եւ ՆԱԹՕ-ի գլխաւոր քարտուղարը քննարկած են Հայաստան-ՆԱԹՕ համագործակցութեան ընթացքին առնչուող հարցեր:

Share.

Leave A Reply

This site uses Akismet to reduce spam. Learn how your comment data is processed.