ԿԱԹՈՂԻԿՈՍԻ ՀՐԱԺԱՐԱԿԱՆԸ ՊԱՀԱՆՋՈՂ ՆԱԽԱՁԵՌՆՈՒԹԵԱՆ ԱՆԴԱՄՆԵՐԸ ԿՐԿԻՆ ԴԻՄԱԾ ԵՆ ՍԱԴՐԻՉ ԳՈՐԾՈՂՈՒԹԻՒՆՆԵՐՈՒ

0

«Արմէնփրէս» կը հաղորդէ, որ Մայր Աթոռի տեղեկատուական համակարգի ղեկավար Տէր Վահրամ Քհնյ. Մելիքեան դիմատետրի իր էջին վրայ գրառում կատարելով յայտնած է, որ Ամենայն Հայոց կաթողիկոսի հրաժարականը պահանջող նախաձեռնութեան անդամները 13 Յուլիսի առաւօտեան կրկին փորձած են խաթարել Մայր Աթոռի անդորրն ու աղօթական միջավայրը` Կաթողիկոսի եւ եկեղեցականներու հասցէին վիրաւորական արտայայտութիւններով եւ սադրիչ գործողութիւններով:
«Այսօր առաւօտեան յայտնի նախաձեռնութեան անդամները կրկին փորձած են խաթարել համայն հայութեան հոգեւոր կեդրոնի անդորրն ու աղօթական միջավայրը` իմաստաւորելով իրենց ներկայութիւնը Ամենայն Հայոց Կաթողիկոսի եւ եկեղեցականներու հասցէին վիրաւորական արտայայտութիւններով եւ սադրիչ գործողութիւններով:

Վերստին կը յիշեցնենք 10 Յուլիսի Գերագոյն հոգեւոր խորհուրդի ժողովի յայտարարութիւն-որոշումը. «Մեկնելով Եկեղեցուոյ կողմէն սէրը եւ ներողամտութիւնը ի սպառ արտայայտելու առաքելութենէն, Գերագոյն հոգեւոր խորհուրդը, անսալով Գարեգին Բ. Ամենայն Հայոց Կաթողիկոսի յորդորին, որոշեց մէկշաբաթեայ վերջնաժամկէտ սահմանել, որպէսզի անդրադարձումի եւս մէկ առիթ ընծայուի նախաձեռնութեան անդամներուն՝ դադրեցնելու հակականոնական իրենց գործողութիւնները եւ զղջման ու ապաշխարութեան ճամբով վերադառնալու Սուրբ Էջմիածինի խնամակալ հովանիին ներքեւ»։
Դատապարտելով հանդերձ նախաձեռնութեան այս ընթացքը յոյսը չենք կորսնցներ եւ կ’աղօթենք, որ Աստուած, Իր ողորմութեան արժանի դարձնելով, լուսաւորէ իմաստութեամբ` բարին խորհելու, խօսելու եւ գործելու», գրած է ան:

Share.

Leave A Reply

This site uses Akismet to reduce spam. Learn how your comment data is processed.