Ս. ԹԱԴԷԻ ՎԱՆՔԻ ԵՌՕՐԵԱՅ ՈՒԽՏԱԳՆԱՑՈՒԹԻՒՆԸ ԱՅՍ ՏԱՐԻ ԵՒՍ ՅԱՋՈՂՈՒԹԵԱՄԲ ՊՍԱԿՈՒԵՑԱՒ

0

«alikonline.ir» – Ատրպատականի Ազգային Առաջնորդարանը կը տեղեկացնէ, թէ Հինգշաբթի, 12 Յուլիս 2018-ի առաւօտեան ժամերէն, Հայոց պատմական Արտազ գաւառի Ս. Թադէոս առաքեալի վանքին մէջ սկսած է տարեկան եռօրեայ ուխտագնացութիւն, որ սոյն շղթայի 64-րդն է այս տարի:

Ուխտագնացութիւնը սկսած է յետ ամիսներ առաջ կատարուած նախապատրաստական աշխատանքին, հովանաւորութեամբ Թեմի Առաջնորդ Գերշ. Տ. Գրիգոր Ս. Եպս. Չիֆթճեանի եւ Թեմական Խորհուրդին, կազմակերպութեամբ Վանքերու Ուխտագնացութեան Յանձնախումբին։ Սոյն ուխտագնացութիւնը կատարուած է հոգեւոր ու ազգային բարձր նախանձախնդրութեամբ, առաւելագոյն չափով օգտուելու անոր սրբացնող եւ հոգեպարար մթնոլորտէն:

Իրանի տարբեր քաղաքներէն եւ արտասահմանէն խումբեր եւ ընտանիքներ ժամանած են Ս. Թադէ եւ նախօրօք իրենց համար ապահովուած վրաններուն մէջ տեղակայուած՝ վայելելով վանքի գմբէթներուն հովանին:

Աղբիւրին համաձայն, Ատրպատականի Հայոց Թեմի Առաջնորդին եւ Ազգային Իշխանութեան կողմէ հարկ եղած պետական արտօնութիւնները ձեռք բերուած են՝ ժողովուրդին կեցութիւնը եւ կենցաղային բարւօք պայմանները ապահովելու համար:

Ուխտագնացութեան երեք օրերու ընթացքին տեղի ունեցած են շարք մը ձեռնարկներ, որոնք առաւել եւս խանդավառած են ուխտաւոր ժողովուրդը եւ գօտեպնդած զինք իր քրիստոնէական հաւատքին եւ ազգային պատկանելիութեան մէջ:

Առաջնորդ Սրբազանը վանք ժամանած է Հինգշաբթի, 12 Յուլիս 2018-ի երեկոյեան ժամը 5։00-ին եւ հանդիսապետած է երեկոյեան ժամերգութեան:

բ) Իրանի եկեղեցիներու պահպանման պետական հիմնարկութեան կողմէ եւ անոր ժրաջան տնօրէն Շերլի Աւետեանի հսկողութեամբ կառուցուած վանքի սեղանատան (պիւֆէ) բացումը կատարուած է Առաջնորդ Սրբազանին ձեռամբ:

գ) Դարձեալ, միեւնոյն հիմնարկութեան կողմէ, Վանքի մուտքի սենեակներէն երկուքին հիմնական վերանորոգումը կատարուած ըլլալով, անոնք յուշանուէրներու ցուցասրահի վերածուած են. նոյն օրերուն կատարուած է նաեւ յուշանուէրներու սոյն վաճառատան բացումը:

դ) Վանքի մուտքի բակին մէջ կառուցուած նկարչական նոր ցուցասրահին մէջ բացումը կատարուած է Ս. Թադէոս Առաքեալի վանքի տարբեր տարիներու լուսանկարներու ցուցահանդէսին: Բացման հանդիսութեան ներկայ գտնուած է Արեւմտեան Ատրպատականի նահանգապետը, պետական հիւրերու ընկերակցութեամբ:

ե) Հինգշաբթի 12 եւ Ուրբաթ 13 Յուլիս 2018-ի երեկոներուն, Թեհրանի «Զարթօնք» պարախումբը ելոյթ ունեցած է վանքի տարածքին մէջ, իր հիմնադրման 30-ամեակին առիթով, ղեկավարութեամբ պարուսոյց Լոռէթա Աւետիսեանի:

զ) Շաբաթ, 14 Յուլիս 2018-ին, Ս. Թադէի տաճարին մէջ մատուցուած է Սուրբ եւ Անմահ Պատարագ, գլխաւորութեամբ Ատրպատականի Հայոց Թեմակալ Առաջնորդին, սպասարկութեամբ թեմի հոգեւորականաց դասուն: Երգեցողութիւնը կատարած է «Կոմիտաս» երգչախումբը, գեղ. ղեկավարութեամբ երաժիշտ Վարդան Վահրամեանի:

է) Նոյն օր, պատարագէն ետք տեղի ունեցած է Առաջնորդ Սրբազանին եւ նահանգապետին պաշտօնական հանդիպումը՝ պետական ներկայացուցիչներու եւ Թեմական Խորհուրդի ներկայութեան:

Ուխտագնացութեան երեք օրերուն ընթացքին, աղօթքով, տօնակատարութիւններով եւ ժողովրդական խանդավառ խրախճանքներով, մեր ազգային, ընտանեկան եւ հասարակական կեանքը վերաշխուժացած է:

Սոյն ուխտագնացութեան բացառիկ երեւոյթը, որ եռօրեայ դրութեամբ հազուադէպ դարձած է մեր ազգային-եկեղեցական կեանքին մէջ, ինքնին պատգամ մըն է ուղղուած համայն Հայ ժողովրդին. «Հա՛յ ուխտաւոր, Ս. Թադէի սրբաբոյր գմբէթներու հովանիին ներքեւ ուխտէ՛ ըլլալ միասնական եւ հաւատարիմ՝ քու ազգին, եկեղեցիին եւ հայրենիքին»:

Share.

Leave A Reply

This site uses Akismet to reduce spam. Learn how your comment data is processed.