Ի՞ՆՉՈՒ  ԿԱՆՈՆԱՒՈՐ ՔՈՒՆԸ  ԿԱՐԵՒՈՐ ԿԸ ՀԱՄԱՐՈՒԻ

0

Քունին շնորհիւ է, որ մարմինը կը վերագտնէ իր սպառած ուժը եւ կը վանէ օրկանիզմի վտանգաւոր տարրերը։ Քունի ընթացքին ջիղերը հանդարտ եւ երակները ընդլայնուած կ՛ըլլան։ Անհանգիստ քունը ֆիզիքական բեկում կը պատճառէ, այս պարագային, մարմինին կողմէ թոյներու արտաքսումը թերի կ’ըլլայ։

Բուն քունը 3-4 ժամ կը տեւէ, որմէ ետք կը սկսի արթնութեան շրջանը։

Անհատի մը օրական քունի տեւողութիւնը 8 ժամ պէտք է ըլլայ՝ ցորեկը 2 ժամ, իսկ գիշերը՝ 6-7, մինչդեռ պատանիներունը՝ 10 ժամ,մանուկներունը՝ 12-16, իսկ նորածիններունը՝ 18-20 ժամ։ Ծերերուն համար օրական 5-6 ժամ քունը բաւարար է։

Ճաշելէն անմիջապէս ետք պէտք չէ  քնանալ, այլ՝ մասամբ մը մարսելէ վերջ։ Օրկանիզմին համար կարեւոր է գոնէ շաբաթը քանի մը անգամ գիշերուան ժամը 10։00-ին անկողին մտնել, որովհետեւ քունին ամէնէն օգտակար պահը այս ժամը կը համարուի։

Այս ժամու քունը առողջութեան եւ գեղեցկութեան քունն է։ Կորովի, նախաձեռնութեան ոգիի յառաջացման քունն է։

Կէս գիշերէն 2 ժամ առաջ առնուած քունը շատ կարեւոր է կեանքը երկարելու համար։

 

ՄԵՐ ՆՆՋԱՍԵՆԵԱԿԸ

 

Ննջասենեակը պէտք է ըլլայ տան ներսի կողմը՝ փողոցէն հեռու. հեռու աղմուկէ, փոշիէ եւ գարշահոտութենէ։

Ննջասենեակը պէտք չէ որպէս աշխատասենեակ գործածել: Մահճակալը պէտք է այնպէս մը տեղադրուած ըլլայ, որ ենթակային գլուխը հիւսիսային կողմը ուղղուած ըլլայ։

Անկողինին մէջ պէտք է տարածուիլ հորիզոնական դիրքով, իսկ ննջասենեակը պէտք է լեցուած ըլլայ մաքուր օդով, որովհետեւ 8 ժամուան քունին ընթացքին անհատը մաքուր օդի պէտք ունի: Այս պատճառով ալ ննջասենեակին պատուհանը, բոլոր եղանակներուն, պէտք է բաց պահել։

Ննջասենեակին լոյսը վառած պահելը առողջապահական չի համարուիր, այնպէս ինչպէս առողջապահական չեն համարուիր ննջասենեակին մէջ պահուած ծաղկեփունջերը, թաղարները, որոնք օդին թթուածինը կը ներծծեն։ Անհրաժեշտ է, նախքան քնանալը սենեակէն դուրս դնել բոլոր բոյսերը: Անկողին չմտած պէտք է լուալ ձեռքերը, ոտքերը եւ երեսը՝ մաքուր եւ հանգիստ քուն մը առնելու համար։

Ննջասենեակին օդը յաճախ պէտք է թարմացնել, որպէսզի քնացողը առատ թթուածին շնչէ։

Քունին միջոցով, վերջապէս, մեր մարմինին անդորրութիւնը կ’ապահովենք։

Ուստի սխալ է գիշերները լուսցնել առանց քնանալու։ Հանգիստ քունը հացի եւ ջուրի նման անհրաժեշտ է առողջութեան եւ գեղեցկութեան։

 

 

ՔԱՇԱ

Անգլերէնով  քաշա  կախարդական հնդկաձաւար կը նշանակէ: Այս հացահատիկի տեսակը կ’աճի կեդրոնական եւ արեւելեան Եւրոպայի, յատկապէս Պելոռուսիոյ մէջ:

Քաշան կամ կռեչքան ձաւարի նման է, սակայն եռանկիւնաձեւ է եւ մութ սրճագոյն:

Ռուսաստանի մէջ  հացահատիկի ընդհանուր սպառումին մէջ քաշայի սպառումը 20% է:

Քաշան կարելի է օգտագործել մէկէ աւելի ճաշատեսակներու պատրաստութեան համար:

Կարելի է բիլաւի նման եփել զայն, վրան աւելցնել միս, կամ տապկուած սոխ ու սունկ: Այս ճաշը հարուստ կ’ըլլայ կենսանիւթերով, յատկապէս՝ B 9-11-12, եւ սպիտակուց: Մանուկներուն համար քաշան կարելի է եփել նաեւ կաթով ու շաքարով՝ կաթնապուրի նման:

 

ՓՈՔՐԵՐՈՒ ՅԱՏՈՒԿ ԿԵՐԱԿՐԱՏԵՍԱԿՆԵՐ

Բաղադրութիւն

1 ճաշի դգալ քաշա

200 մլկրմ. Կաթ

300 կրմ. կարագ

Այս համեմատութեան համաձայն, ձեր նախընտրած չափով կաթը եւ քաշան եփել ցած կրակի վրայ, մինչեւ որ խառնուրդը թանձրանայ: Աւելցնել կարագը: Փափաքի համաձայն կարելի է այս խառնուրդին աւելցնել նաեւ կէս պանան, կէս կեղուըուած խնձոր կամ փոքրիկին սիրած այլ պտղատեսակը եւ եփել մինչեւ որ խառնուրդը միատարր զանգուած մը ըլլայ:

Ձմրան քաշան կարելի է եփել նաեւ մածունով եւ կարագով՝ մածնապուրի նման:Այս կերակրատեսակը շատ համեղ եւ սննդարար է, օգտակար է եւ բուժիչ յատկութիւն ունի աղիքներու բորբոքումի պարագային եւ ընդհանուր առմամբ լեարդին: Օգտակար է նաեւ սրտին. Կը նուազեցնէ արեան գերճնշումն ու ճարպաիւղերու համեմատութիւնը: Սննդարար ճաշատեսակ է յատկապէս յղի կիներուն համար:

Սոնա Տէր Պօղոսեան-Տարաքճեան

 

 

 

Share.

Leave A Reply

This site uses Akismet to reduce spam. Learn how your comment data is processed.