ԱԼԻԵՒ. «ՊԱՔՈՒ ԿԸ ՄԵՐԺԷ ԼԵՌՆԱՅԻՆ ՂԱՐԱԲԱՂԻ ՀԵՏ ԲԱՆԱԿՑԵԼՈՒ ԵՐԵՒԱՆԻ ԱՌԱՋԱՐԿԸ»

0

«Ազատութիւն» կը հաղորդէ, որ Ատրպէյճանի նախագահ Իլհամ Ալիեւ յայտարարած է, որ Պաքու կը մերժէ Լեռնային Ղարաբաղի հետ բանակցելու Երեւանի առաջարկը:
«Ատիկա ընդհանրապէս անընդունելի է, եւ այդպիսի առաջարկ ներկայացնող երկիրը անկասկած գիտէ, որ ատիկա պիտի չընդունուի: Միւս կողմէ, այդ առաջարկը երբեք պիտի չընդունուի միջնորդներուն կողմէ», պնդած է ան:
Ալիեւ աւելցնելով ըսած է, որ Ատրպէյճանի մէջ կը լսեն Հայաստանէն հնչող խաղաղութեան կոչերը եւ Ատրպէյճանի մէջ եւս խաղաղութիւն կ՛ուզեն: «Ի հարկէ, մենք ալ խաղաղութիւն կ՛ուզենք, սակայն մենք մեր հողերը կ՛ուզենք: Մինչեւ որ մեր հողերը չվերադարձուին, խաղաղութիւն պիտի չըլլայ, եւ Հայաստանի նոր ղեկավարութիւնը պէտք է ատիկա լաւ հասկնայ», յայտարարած է ան` աւելցնելով. «Եթէ Հայաստանի ղեկավարութիւնը շարունակէ զբաղիլ բանակցութիւններու ձգձգումով, մենք պիտի շարունակենք մեր մեկուսացնող քաղաքականութիւնը` օգտագործելով բոլոր միջոցները ալ աւելի ցնցելու Հայաստանը»:
Ատրպէյճանական «Թրենտ» լրատու գործակալութիւնը իր կարգին կը հաղորդէ, որ Ալիեւ նաեւ պնդած է, թէ Ատրպէյճան նկատառելի դեր խաղցած է Հայաստանի մէջ իշխանափոխութեան մէջ:
«Առաջին հարուածը, որ առաջնորդեց անոր տապալման եւ քաոսի մատնուելուն, տրուեցաւ երկու տարի առաջ: Ապրիլի ճակատամարտները ամբողջովին ականահարեցին անոր փտած հիմերը, եւ ետքը, ոճրագործ խունթայի վարչակարգը սկսաւ ուղղուիլ դէպի քաոս: Ոչ ոք պէտք է մոռնայ ատիկա»:

Share.

Leave A Reply

This site uses Akismet to reduce spam. Learn how your comment data is processed.