ՆԱԶԱՐՊԱՅԵՒ-ՓԱՇԻՆԵԱՆ ՀԵՌԱՁԱՅՆԱՅԻՆ ՀԱՂՈՐԴԱԿՑՈՒԹԻՒՆ

0

Երեքշաբթի, 7 Օգոստոսին Հայաստանի Հանրապետութեան վարչապետ Նիկոլ Փաշինեան հեռաձայնային հաղորդակցութիւն ունեցած է Ղազախստանի նախագահ Նուրսուլթան Նազարպայեւի հետ: Զրուցակիցները քննարկած են երկկողմանի եւ բազմակողմանի յարաբերութիւններու օրակարգային հարցեր, որոնց կարգին` Հաւաքական անվտանգութեան պայմանագիրի կազմակերպութեան գործունէութեան վերաբերեալ: Այս մասին կը տեղեկացնէ կառավարութեան պաշտօնական կայքը:

Նազարպայեւի պաշտօնական կայքին համաձայն, քննարկուած է նաեւ Եւրասիական Տնտեսական Միութեան շրջագիծին մէջ փոխադարձ գործակցութիւնը, իսկ հեռաձայնային հաղորդակցութիւնը տեղի ունեցած է հայկական կողմին  նախաձեռնութեամբ:

Հայաստանի Ու Ղազախստանի Յարաբերութիւններուն Մէջ Առկայ Է Լաւ Մթնոլորտ

Վարչապետ Նիկոլ Փաշինեան ընդունած է Հայաստանի մէջ Ղազախստանի արտակարգ եւ լիազօր դեսպան Թիմուր Ուրազայեւը:

Վարչապետը կարեւոր նկատած է հայ-ղազախական յարաբերութիւններու հետագայ զարգացումը եւ համոզում յայտնած, որ դեսպանին աշխոյժ գործունէութիւնը կը նպաստէ երկկողմանի կապերու  ընդլայնումին ու խորացումին տարբեր ոլորտներու մէջ: Վարչապետ Նիկոլ Փաշինեան ընդգծած է, որ Հայաստանի ու Ղազախստանի յարաբերութիւններուն մէջ առկայ է լաւ մթնոլորտ եւ աւելցուցած, որ անիկա կը նպաստէ երկու երկիրներուն միջեւ տարբեր ուղղութիւններով համագործակցութեան զարգացումին:

Իր կարգին, Թիմուր Ուրազայեւ ըսած է, որ Ղազախստան շահագրգռուած է Հայաստանի հետ համագործակցութեան ամրապնդումով, արդիւնաւէտ փոխադարձ գործակցութեամբ ինչպէս երկկողմանի, այնպէս ալ բազմակողմանի ձեւաչափերով, որոնց կարգին` Եւրասիական տնտեսական միութեան եւ Հաւաքական անվտանգութեան պայմանագիրի կազմակերպութեան ծիրին մէջ:

Զրուցակիցները կարեւոր նկատած են երկու երկիրներուն միջեւ առեւտրական եւ տնտեսական կապերու ընդլայնումը եւ գոհունակութեամբ յայտնած, որ 2018-ի առաջին կիսամեակին նախորդ տարուան նոյն ժամանակահատուածին համեմատ առեւտրական շրջանառութեան ծաւալները աճած են 2,5 անգամ:

Կողմերը անդրադարձ կատարած են նաեւ ղարաբաղեան տագնապի լուծման ու կարեւոր նկատած շրջանին մէջ խաղաղութեան եւ կայունութեան ամրապնդումը: Վարչապետ Նիկոլ Փաշինեան ընդգծած է, որ Լեռնային Ղարաբաղի տագնապը պէտք է լուծուի բացառապէս ԵԱՀԿ-ի Մինսքի խմբակի համանախագահութեան շրջագիծին մէջ:

 

Share.

Leave A Reply

This site uses Akismet to reduce spam. Learn how your comment data is processed.