«ՔԱՅԼ ԴԷՊԻ ՏՈՒՆ» ԾՐԱԳԻՐԻՆ ԱՆՆԱԽԸՆԹԱՑ ԹԻՒՈՎ ՄԱՍՆԱԿԻՑՆԵՐ ԱՐՁԱՆԱԳՐՈՒԱԾ ԵՆ

0

ԵՐԵՒԱՆ, «Հայերն Այսօր».- Երեքշաբթի, 7 Օգոստոսին, Սփիւռքի Նախարարութեան շէնքին մէջ տեղի ունեցաւ մամլոյ ասուլիս մը, որուն ընթացքին սփիւռքի փոխնախարար Դաւիթ Սարգսեան՝ ներկայացնելով «Քայլ Դէպի Տուն» ծրագիրին կազմակերպչական բաղադրիչը՝ դիտել տուաւ, որ ծրագիրը աննախադէպ է նաեւ մասնակցողներու թիւին առումով:

«Ծրագիրը «Արի տուն» եւ «Սփիւռք» ամառնային դպրոց ծրագիրներու միացման արդիւնք է: Նպատակը այն է, որ մրցոյթին կարենան մասնակցիլ նաեւ այլ կազմակերպութիւններ եւ բացառուի զեղծարարութեան որեւէ դրսեւորում: Մրցոյթին կը մասնակցէր չորս կազմակերպութիւն: Շահած է «Լոռէ հոլթինկ» ՍՊԸն: Շահող կազմակերպութիւնը արդէն սկսած է կազմակերպչական աշխատանքները», յայտնեց փոխնախարարը:

«Քայլ Դէպի Տուն» ծրագիրի պատասխանատու Հայկ Ենգիբարեան մանրամասնութիւններ տուաւ ծրագիրի բովանդակային բաղադրիչին մասին. ան ըսաւ, որ  «Քայլ Դէպի Տուն»ը հայապահպանումի եւ հայրենադարձութեան միտուած ծրագիր է:

Ծրագիրի պատասխանատուն յայտնեց, որ հայոց լեզուի սեղմ դասընթացքներուն համար խումբերը կազմուած են՝ ըստ լեզուի իմացութեան մակարդակի, տարիքի եւ տարածաշրջանի առանձնայատկութիւններու: Հայոց լեզուի դասաժամերը կրկնապատկուած են. աւելցած է հայոց պատմութիւն առարկան: Ծրագիրին մասնակցողները պիտի այցելեն նաեւ հայաստանեան ուսումնական հաստատութիւններ եւ պիտի ծանօթանան ուսումնական ծրագիրներուն:

«Քայլ Դէպի Տուն» ուսումնաճանաչողական ծրագիրը, որ նախատեսուած է 13-էն 21 տարեկան սփիւռքահայ պատանիներու եւ երիտասարդներու համար, պիտի սկսի 10 Օգոստոսին եւ պիտի տեւէ մինչեւ 24 Օգոստոս:

 

Share.

Leave A Reply

This site uses Akismet to reduce spam. Learn how your comment data is processed.