ԽՈՐՀՐԴԱԿՑՈՒԹԻՒՆ՝ ԵՐԵՒԱՆԻ ՄԷՋ ԲԱՑՕԹԵԱՅ ԱՊՕՐԻՆԻ ԱՌԵՒՏՈՒՐԸ ԿԱՆԽԵԼՈՒ ՇՈՒՐՋ

0

Երեւանի քաղաքապետի առաջին տեղակալ, քաղաքապետի պաշտօնակատար Կամօ Արէեան քաղաքապետարանէն ներս կազմակերպած է խորհրդակցութեան նիստ մը, որուն նպատակն էր գործողութիւններ ձեռնարկել մայրաքաղաքին մէջ ապօրինի բացօթեայ առեւտուրի կանխարգիլման ուղղութեամբ: Խորհրդակցութեան ներկայ եղած են Երեւանի քաղաքապետի տեղակալ Դաւիթ Օհանեան, ՀՀ ոստիկանութեան Երեւան քաղաքի վարչութեան պետ Արտակ Պօղոսեան, մայրաքաղաքի վարչական շրջաններու ղեկավարներ, քաղաքապետարանի աշխատակազմի վարչութեան պետեր, համապատասխան բաժիններու աշխատակիցներ, ինչպէս նաեւ ոստիկանութեան Երեւան քաղաքի բաժիններու պետերու տեղակալներ:

Խորհրդակցութեան ընթացքին Կամօ Արէեան յայտնած է, որ մայրաքաղաքի տարբեր հատուածներուն մէջ ապօրինի բացօթեայ առեւտուրը վերջին շրջանին հասած է մեծ ծաւալներու, եւ անհրաժեշտ  է կտրուկ գործողութիւններու դիմել՝ ապօրինութիւնները կանխարգիլելու համար: Քաղաքապետի պաշտօնակատարը ընդգծած է, որ կան առեւտուրի համար յատկացուած վայրեր, եւ քաղաքապետարանի ու վարչական շրջաններու ղեկավարներու աշխատակազմերու համապատասխան բաժիններուն հարցն է բացառել առեւտուրը անոր համար չնախատեսուած վայրերուն մէջ: Մանաւանդ որ «Առեւտուրի եւ ծառայութիւններու մասին» օրէնքի պահանջներուն համաձայն, կտրականապէս կ’արգիլուի պտուղի, բանջարեղէնի եւ այլ մթերքներու բացօթեայ վաճառքը:

ՀՀ ոստիկանութեան Երեւան քաղաքի վարչութեան պետ Արտակ Պօղոսեան յայտնած է, որ իրենք պատրաստակամ են օգնութիւն ցուցաբերել քաղաքապետարանի եւ վարչական շրջաններու աշխատակազմերուն: Ոստիկանութեան համապատասխան ստորաբաժանումները քաղաքային իշխանութիւններուն եւ ոլորտի պատասխանատուներուն հետ պատրաստ են վճռական պայքար ծաւալել բացօթեայ ապօրինի առեւտուրի կանխարգիլման համար:

Կամօ Արէեան առաջարկած է ՀՀ Արտակարգ Իրավիճակներու Նախարարութեան կտրուկ միջոցներու դիմել նաեւ Հանրապետութեան հրապարակի եւ այլ վայրերու մէջ անյայտ ծագումով կազի գլաններու օգտագործումը արգիլելու համար, քանի որ անոնց օգտագործումը կրնայ յանգեցնել անկանխատեսելի հետեւանքներու: Այս ուղղութեամբ, քաղաքապետի պաշտօնակատարը ՀՀ Առողջապահութեան Նախարարութեան եւ սննդամթերքի անվտանգութեան պետական ծառայութեան եւս առաջարկած է կտրուկ քայլերու ձեռնարկել ստեղծուած իրավիճակը վերացնելու համար:

Յայտնենք, որ այսուհետեւ Երեւանի քաղաքապետարանի եւ վարչական շրջաններու առեւտուրի պատասխանատուները ոստիկանական խումբերու ուղեկցութեամբ օրուան տարբեր ժամերուն մայրաքաղաքի տարբեր փողոցներու, մարդաշատ վայրերու, հրապարակներու, այգիներու եւ պուրակներու մէջ ամէնօրեայ այցելութիւններ պիտի տան:

Share.

Leave A Reply

This site uses Akismet to reduce spam. Learn how your comment data is processed.