ԻՆՉՈ՞Ւ  ՀՅԴ ԽՄԲԱԿՑՈՒԹԵՆԷՆ ՄԻԱՅՆ ԵՐԵՔ ՊԱՏԳԱՄԱՒՈՐ ՄԻԱՑԱԾ Է ՌՈՊԷՐԹ ՔՈՉԱՐԵԱՆԻ ՀԱՄԱՐ ՍՏՈՐԱԳՐԱՀԱՒԱՔԻՆ

0

ՀՅԴ խմբակցութեան քարտուղար Արմենուհի Կիւրէղեան «Առաւօտ»ին հետ զրոյցի մը ընթացքին պատասխանելով այն հարցումին, թէ ի՞նչն է դրդապատճառը, որ ան միացաւ Ռոպէրթ Քոչարեանի նկատմամբ կալանքը, որպէս խափանման միջոց փոխելու ստորագրահաւաքին, մանաւանդ, երբ ակնյայտ էր, որ հասարակութիւնը բացասական կերպով պիտի արձագանգէ այդ նախաձեռնութեան, ըսաւ. «Գերագոյն Մարմինի հաղորդագրութիւնը`ստորագրահաւաքին շուրջ իբրեւ ձեր բոլոր հարցումներուն իմ պատասխանը տեղադրեցէք»:

ՀՅԴ Հայաստանի Գերագոյն Մարմնի յայտարարութեան մէջ յիշուած էր, որ որեւէ անպատեհութիւն չեն տեսներ, որ Դաշնակցութեան խորհրդարանական խմբակցութեան պատգամաւորները միանան Ռոպէրթ Քոչարեանի խափանման միջոցը փոխելու ստորագրահաւաքին. «Մարտի 1-ի, 2-ի գործը պէտք է բացայայտուի ամբողջութեամբ՝ առարկայական, անաչառ եւ համակողմանի քննութեամբ, այդ դէպքերուն առնչուած անխտիր բոլոր կողմերուն, եւ ոչ թէ միայն մէկ կողմին, ներգրաւումով ։ Այս առումով Ռոպէրթ Քոչարեանի եւ օրուան շարք մը բարձրաստիճան պաշտօնեաներուն առաջադրուած մեղադրանքները եւ ընտրուած խափանման միջոցները կու տան ընտրովի արդարադատութեան եւ կողմնակալ քննութեան տպաւորութիւն։ Եւ ասիկա մտահոգիչ է։ Հարցը Ռ. Քոչարեանի եւ միւսներու մեղաւոր կամ անմեղ ըլլալը չէ։ Օրէնքի առջեւ բոլորը հաւասար են։ Եւ մեղաւորութիւնը ապացուցուելու պարագային բոլորը պէտք է պատժուին, բայց նոր Հայաստանի մէջ արդարադատութիւնը որեւէ պարագային պէտք չէ ըլլայ կողմնակալ»։

Յիշեցնենք, որ Ռոպէրթ Քոչարեանի նկատմամբ կալանքը, որպէս խափանման միջոց փոխելու հարցով ստորագրահաւաքին միացած է 46 պատգամաւոր: Անոնցմէ երեքը ՀՅԴ խմբակցութենէն են`Ռոմիկ Մանուկեան, Արմենուհի Կիւրէղեան եւ Ռուզան Առաքելեան։

 

Share.

Leave A Reply

This site uses Akismet to reduce spam. Learn how your comment data is processed.