ՄԵՆՔ ԱԶԱՏ ԵՆՔ ԿԱՐԾԻՔ ԵՒ ՏԵՍԱԿԷՏ ԱՐՏԱՅԱՅՏԵԼՈՒ ՀԱՐՑՈՎ

0

ՀՅԴ Հայաստանի Գերագոյն Մարմինի ներկայացուցիչ Արսէն Համբարձումեան կը յորդորէ՝ ո՛չ Դաշնակցութեան յայտարարութիւնը, ո՛չ Դաշնակցութեան ներկայացուցիչներուն, ոչ ալ ՀՀ փոխվարչապետ Տիգրան Ավինեանի խօսքը ընդհանուր իրենց պարունակէն անջատել կամ փորձել տարատեսակ մեկնաբանութիւններու առարկայ դարձնել:

Պատասխանելով Aravot.am-ի այն հարցումին, թէ արդեօ՞ք իրեն համար հասկնալի՞ է այն ինչ, որ Տիգրան Աւինեան «Ազատութիւն» ձայնասփիւռի ֆէյսպուքեան ասուլիսի ընթացքին յայտարարեց, թէ իրեն համար անհասկնալի է ՀՅԴ-ի՝ Ռոպէրթ Քոչարեանի նկատմամբ ընտրուած խափանման միջոցը փոխելուն առնչուող յայտարարութիւնը, Արսէն Համբարձումեան ըսաւ. «Այս առումով յստակօրէն արձանագրենք ՝ Դաշնակցութեան յայտարարութեան, դաշնակցականներու կողմէ յայտնուած տեսակէտներու մէջ որևէ տեղ դուք չէք հանդիպիր այնպիսի միտքի կամ արտայայտութեան, որոնցմով Դաշնակցութիւնը որևէ մեղադրանք կը հնչեցնէ օրուան իշխանութիւններուն հասցէին կամ կասկածի տակ կը դնէ գործադիր իշխանութեան ու իրաւապահ մարմիններու յարաբերութիւններուն առնչուող մօտեցումները: Մենք ընդամէնը արտայայտած ենք մեր որոշ մտահոգութիւնները և զանոնք արտայայտելու համար ունեցած ենք որոշակի հիմքեր»:

Մեր այն յիշեցումին, թէ Տիգրան Աւինեան յայտնած է, որ ով՝ ով, բայց Դաշնակցութիւնը, որ հիմա մաս կը կազմէ կառավարութեան, պէտք է շատ յստակ իմանայ, թէ ինչպիսի՛ փոխյարաբերութիւններ կան գործադիր և դատական իշխանութիւններուն միջև, և արդեօք կա՞ն ճնշումներ դատական իշխանութիւններուն վրայ, թէ չկան, Արսէն Համբարձումեան այսպէս պատասխանեց. «Սա աւելի քան հասկնալի է մեզի համար և հասկնալով հանդերձ, եթէ այս կամ այն հարցերու շուրջ չունինք յստակ պայմանաւորուածութիւններ կոալիցիոն (համախոհական-«Գ.») գործընկերներու հետ, մենք մեր գործողութիւններուն և քայլերուն մէջ ազատ ենք: Կը կարծեմ, որ անկախ գործադիր իշխանութեան մէջ ըլլալ-չըլլալէ, մենք ազատ ենք, և կը կարծեմ, որ մեր երկրի ամենակարևոր ձեռքբերումը պիտի ըլլայ այն, որ քաղաքական գործիչները ազատ ըլլան կարծիք ու տեսակէտ արտայայտելու հարցով: Սա պէտք չէ կապել կոալիցիոն գործընկերութեան հետ: Մենք մեր արտայայտութիւններուն և ձևակերպումներուն մէջ շատ յստակ, ուղիղ եղած ենք ու խօսած ենք ընդամէնը մտահոգութիւններու մասին»:

Երբ հարցուցինք, թէ ինչպէ՞ս կ՚արժեւորէք ՀՀ գլխաւոր դատախազութեան մերժումը Ռոպերթ Քոչարեանի կալանքը փոխելու վերաբերեալ միջնորդութեան, Արսէն Համբարձումեան յայտնեց. «Իրենց իրաւասութիւնն է մերժել կամ ընդառաջել: Այս պահուն ձեռնպահ կը մնամ որևէ կարծիք յայտնելէ: Կ՚ուզեմ յատկապէս շեշտել ու կրկնել, որ որևէ քաղաքական գործիչի՝ անկախ իր ունեցած վաստակէն, պատասխանատուութեան ենթարկելու թապու չէ դրուած, այդ կարգին Ռոպէրթ Քոչարեանի ալ պարագային: Մենք որևէ մէկուն պաշտպանը կամ փաստաբանը ըլլալու փափաք և անհրաժեշտութեան հարց չունինք: Ընդամէնը կ՚ըսենք, որ նոր Հայաստանի կէջ արդարադատութիւնը որևէ պարագայի պէտք չէ կրկնէ նախորդ ժամանակահատուածին արձանագրուած սխալները, և վստահութիւնը, որ կը ձևաւորուի ՀՀ-ի մէջ արդարադատութեան հանդէպ, որևէ պարագայի կասկածի տեղիք պիտի չտայ: Այս տրամաբանութեան մէջ ընտրովի արդարադատութեան որևէ դրսևորման կարելիութիւն պիտի բացառուի: Մեր ըսածին իմաստն ու տրամաբանութիւնը սա էր»:

Անդրադառնալով 1 Մարտի դէպքերուն՝ Արսէն Համբարձումեան շեշտեց. «Բոլորս ալ գիտենք՝ 1 Մարտի դէպքերուն առնչուող երկու կողմ կայ, և մեղադրանքը ներկայացուած է մէկ կողմի ներկայացուցիչներուն: Մենք կողմնակից ենք 1-2 Մարտի դէպքերու լիարժէք, ամբողջական բացայայտումին, որպէսզի մէկընդմիշտ այդ իրադարձութեան հետ կապուած բոլոր հարցականները ստանան իրենց պատասխանը և հետագայ շահարկումներու տեղիք չտան և որևէ կերպ 1-2 Մարտի դէպքերը ազդեցութիւն չունենան ՀՀ ներքաղաքական զարգացումներուն վրայ»:

ՏԱԹԵՒ ՅԱՐՈՒԹԻՒՆԵԱՆ

Share.

Leave A Reply

This site uses Akismet to reduce spam. Learn how your comment data is processed.