ՄԱՐԶԱԿԱՆ՝ ՕԳՈՍՏՈՍ Բ./2018

0

Տիգրան Մինասեան՝ Եւրոպայի Ախոյեան

Հայաստանի երիտասարդ ըմբիշ Տիգրան Մինասեան նուաճեց Իտալիոյ մայրաքաղաք Հռոմի մէջ տեղի ունեցած յունահռոմէական ըմբշամարտի Եւրոպայի երիտասարդական ախոյեանի կոչումը: 55 քկ. ծանրութեան դասակարգի աւարտական մրցումին, հայ ըմբիշը 8-0 արդիւնքով յաղթեց իտալացի Ճիովանի Ֆրենիին եւ նուաճեց ոսկեայ մետալը: Տիգրան Մինասեան արձանագրեց 2 յաղթանակ (11-1, 9-0) նուաճելէ ետք, հասած էր կիսաւարտականին, ուր միայն 33 երկվայրկեանի մէջ 14-4 արդիւնքով պարտութեան մատնած էր թուրք Ահմէտ Լիմանը:

Փերես. «Մոտրիչ Ռիալի Խաղցող Է Մինչեւ 2020»

Սպանիոյ թագաւորական ակումբի՝ Ռիալ Մատրիտի նախագահ Ֆլորենթինօ Փերես, անցեալ շաբթուան մամլոյ ներկայացուցիչներուն հետ հանդիպում մը ունեցաւ եւ յայտնեց ընթացքին, թէ խումբի խրուաթիացի խաղցող Մոտրիչ պէտք չէ վաճառուի, եւ այն ակումբը, որ կ’ուզէ Մոտրիչը ձեռք ձգել, պարտաւոր է մեզի յատկացնել 750 միլիոն եւրօ: «Լուքա Մոտրիչի ստորագրութիւնը ձեռք ձգելու համար մենք արգելք չենք հանդիսանար ոչ մէկուն: Բայց եթէ Ինթըր Միլան կ՛ուզէ 32 տարեկան միջնապահը տեսնել իր կազմին շապիկով, անոր համար մեր ակումբին պէտք է վճարէ  750 միլիոն եւրօ հրաժարագին: Անոր պայմանագրութիւնը մեզի հետ կ’աւարտի 2020-ին, հետեւաբար այլ տարբերակ գոյութիւն չունի», ըսաւ Փերես:

Յիշենք, որ իտալական Ինթըր Միլանի վարչակազմը վերջին շրջանին փափաք յայտնած էր բանակցիլ խրուաթիացի խաղցողին հետ՝ զինք միացնելու իտալական կազմին:

Վիտալ Պարսելոնայի Խաղցող Դարձաւ

Սպանիոյ ախոյեան՝ Պարսելոնայի ակուբը, իր պաշտօնական կայքէջին վրայ յայտարարութիւն մը տեղադրած էր՝ դիտել տալով, Պարսելոնայի վարչակազմը վերջնական համաձայնութեան հասած է Գերմանիոյ ախոյեան Պայէրն Միունէխի հետ, որուն համաձայն խումբի չիլիցի խաղցող Արթուր Վիտալ պիտի միանայ սպանական կազմին: Յայտարարութեան մէջ նիւթական պայմաններուն մասին անդրադարձ չէ կատարուած: Ըստ «Ռոյթըրզ»ի, Վիտալի հետ պայմանագրութիւնը պիտի ըլլայ երեք տարեշրջանի համար: Յիշենք, թէ չիլիցի մարզիկը Պայէրն Միունէխի խումբին հետ մասնակցած է 100 մրցումի եւ նշանակած՝  24 կոլ:

Փարիզ Սան Ժերման Ֆրանսայի Գերբաժակակիր

Ֆրանսայի ախոյեան մայրաքաղաքի խումբը՝ Փարիզ Սան Ժերմանը յաջողութեամբ աւարտելով խաղարկութեան վերջին տարեշրջանը, տիրացաւ երկիրի «Սուբըր» բաժակին՝ 4 – 0 արդիւնքով, պարտութեան մատնելէ ետք Մոնաքոն: Մայրաքաղաքի խումբը ոչ մէկ դժուարութիւն ունեցաւ տիրանալու այս բաժակին: Մրցումի 33-րդ վարկեանին, Տի Մարիա կատարեց կոլերուն բացումը, որմէ միայն վեց վայրկեան ետք, Նքոնքոն կրկնապատկեց արդիւնքը: Երկրորդ կիսախաղին, սանժերմանցիները շարունակեցին իրենց խիտ յարձակումները եւ տիրեցին խաղին: 67-րդ վայրկեանին, Ուահ նշանակեց երրորդ կոլը. մրցումի հաւելեալ վայրկեաններուն, Տի Մարիա նշանակեց իր երկրորդ, իսկ խումբի չորրորդ կոլը: Աւելցնենք, որ խումբի նոր մարզիչ Թոխիլիի պաշտօնի ստանձնումէն ետք, Փարիզ Սան Ժերման խումբը իր պաշտօնական առաջին մրցումին կը մասնակցէր:

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.