ԹՈՒՐՔԻԱ  ՀԱՅԱՍՏԱՆԻ ՀԵՏ ՍԱՀՄԱՆԸ ՊԻՏԻ ԼՈՒՍԱՒՈՐԷ ԱՐԵԳԱԿՆԱՅԻՆ ՋԵՐՄՈՒԺԻ ՕԳՆՈՒԹԵԱՄԲ

0

Թուրքիոյ Ներքին Գործոց նախարարութիւնը կը շարունակէ երկրի սահմաններուն ապահովութեան համար միջոցներ որոնել։

Վերջին տարիներուն, Թուրքիա  բարձր պատեր կը կառուցէ Սուրիոյ, Իրանի եւ Հայաստանի հետ իր ունեցած սահմանին վրայ։

Սահմանի սուրիական հատուածին վրայ արդէն իսկ կառուցուած է շուրջ 802 քմ. երկայնքով,  4 մեթր բարձրութեամբ պատ, որ կը  կազմէ այդ ուղղութեամբ նախատեսուած պարիսպին 97 առ հարիւրը։ Իրանի հետ սահմանին վրայ (Աղրը, Իգտիր) նախորդ տարի սկսած է 144 քմ. երկայնքով մետաղալարէ ցանկապատով համալրուած պատի մը կառուցումը։ Այդ ուղղութեամբ արդէն աւարտին հասած է շուրջ 90 քմ. Հատուածի մը պարսպապատումը։

Ի յաւելումն այս բոլորին՝ Թուրքիոյ Ներքին Գործոց Նախարարութիւնը նախատեսած  է նաեւ լուսաւորել սահմանը եւ վերահսկել նկարահանող գործիքները։

2017-2018-ին սկսած են լուսաւորման յատուկ աշխատանքները: Կը նախատեսուի արեգակնային  ջերմուժի օգտագործումով ապահովել Թուրքիա –Սուրիա, այնուհետեւ նաեւ՝ Թուրքիա- Հայաստան (Արտահան) սահմանի լուսաւորումը։ Յիշեալ հատուածին մէջ  պիտի տեղադրուին նաեւ նկարահանող սարքեր։

Աղբիւրը կը յիշէ, որ ներկայիս կը լուսաւորուի Թուրքիոյ սահմաններուն 802 քմ.–նոց հատուածը , իսկ նախատեսուած աշխատանքներու աւարտէն ետք՝ 2019-ին, լուսաւորուող հատուածի երկայնքը պիտի կազմէ 1124 քմ. կամ Թուրքիոյ ցամաքային սահմանին շուրջ 40 առ հարիւրը։

 

Share.

Leave A Reply

This site uses Akismet to reduce spam. Learn how your comment data is processed.