ԿԵԱՆՔԸ ԵՒ ԲՆՈՒԹԻՒՆԸ

0

Բնութիւնը մեր կեանքի հայելին է:
Մեր կեանքին ընթացքին այլազան դէպքեր կը պատահին: Անոնք կրնան ըլլալ ուրախալի կամ տխրալի: Մեր օրերը կրնան ըլլալ մեղմ կամ փոթորկալի:
Օրերը իրարու չեն նմանիր: Անոնք միատեսակ չեն, այնպէս ինչպէս բնութիւնն ու կլիման: Մեղմ զեփիւռը յանկարծ կրնայ վերածուիլ փոթորիկի, քանի մը ժամ վերջ անձրեւը կը սկսի կաթկթիլ ապա տեղատարափ կը դառնայ:
Կեանքի մէջ ալ յաղթահարելի մանր-մունր դժուարութիւններ կրնան յառաջանալ, յետոյ անոնք կը վերածուին տագնապի ու մենք կը կարծենք, թէ աշխարհին վերջն է սա՝ մոռնալով որ անձրեւը կը դադրի ու ծիածանը կը յայտնուի: Ու թէեւ անձրեւին յաջորդող ժամերուն ամէն կողմ թաց ու ցեխոտ կ’ըլլայ, սակայն ահաւոր այդ  անձրեւը պատճառ կը դառնայ, որ ծառերը իրենց արմատները խորացնեն հողին մէջ ու ամրապնդուին:
Ուրեմն եթէ դժուարութիւններու հանդիպինք, դիտենք բնութիւնը ու յիշենք, որ մութ ամպերը կը փարատին, արեւը կը շողայ ուշ կամ կանուխ, ծառերը կրկին կը ծաղկին ու ծաղկաբոյր զեփիւռը կրկին կը շոյէ մեր դէմքը:

Բնութիւնը մեծագոյն օրինակն է, ուր լոյսը կը յաջորդէ մութին, ծիածանը՝ անձրեւախառն փոթորիկին:

Խորացէք բնութեան մէջ ու դուք պիտի սորվիք ձեր կեանքի կարեւորագոյն դասերը, եթէ, անշուշտ, դիտելու եւ սորվելու պատրաստակամութիւն ունիք:

Մարինա Ասատուրեան

Ազգ. Քարէն Եփփէ Ճեմարան

Share.

Leave A Reply

This site uses Akismet to reduce spam. Learn how your comment data is processed.