ԶՐՈՒՑԵԼ, ՎԻՃԻԼ ԵՒ ՄԱՍԱՄԲ ՆՈՐԻՆ

0

Բոլորս յաճախ կարիք կը զգանք կարծիք փոխանակելու այնպիսի մարդոց հետ, որոնք մեզի ականջ կու տան եւ կը փորձեն ունկնդրել ու հասկնալ՝ զարգացնելով նաեւ մեր միտքը:

Մեր դժուար պահերուն, երբեմն այնքան օգտակար կը դառնայ զրոյցը, մանաւանդ մեզի ժամանակ տրամադրող հարազատներու հետ զրոյցը: Ընդհանրապէս կ’ուզենք խորհրդակցիլ զարգացած միտք ունեցող, հասուն անձնաւորութիւններու հետ՝ լուսաբանուելու, մեր մտքին մէջ անպատասխան մնացած հարցումներուն պատասխան գտնելու համար:

Զրոյցի կարիք կը զգանք նաեւ մեր դասընկերներուն, մեզի տարեկիցներուն հետ, ոմանց հետ միտքեր փոխանակելու, ուրիշներու փորձառութենէն տեղեակ ըլլալու, երբեմն նոյնիսկ հակառակ կարծիքներ լսելու ու հարցերուն խորքը թափանցելու: Միատեսակ մտածելակերպը կը փթացնէ ուղեղը, ուրեմն որքան օգտակար է զրոյցը, նոյնիսկ կարծիքներու բախումը:

Զրուցելով, իւրաքանչիւրին կարծիքը յարգել կը սորվինք, իրարու լսել ու զիրար հասկնալ կը սորվինք: Այս փորձառութիւնը գիրքերէն չենք կրնար քաղել, այլ՝ զրոյցներէն, նոյնիսկ վիճաբանութիւններէն: Այսպիսով կը քանդենք մեր միջեւ կառուցուած պատերը ու աւելի լաւ կը ճանչնանք զիրար:

Այս տարի, հայերէնի դասապահուն, ուսուցչուհիին առաջարկեցինք զրոյցի ժամանակ յատկացնել ու դասէն ետք քիչ մըն ալ ընկերովի զրուցել: Խոստացանք համբերութեամբ զրուցել, որպէսզի մէկս միւսին խօսքը չընդհատէ:

Իսկապէս շատ հետաքրքրական դարձան մեր զրոյցները: Ուսուցիչն ալ խոստացաւ ժամանակ առ ժամանակ զրոյցի նիւթեր առաջարկել: Արձակուրդին կրնանք զրուցել նաեւ համացանցը օգտագործելով, յատկապէս մեր այն ընկերներուն հետ, որոնք կը գտնուին հեռաւոր ափերու վրայ:

Ու կը հաւատամ, որ աստիճանաբար կրնանք գտնել մեզ մտահոգող բոլոր հարցերուն լուծումները:

 

Նայիրի Արապաթլեան

Ազգ. Քարէն Եփփէ Ճեմարան

 

Share.

Leave A Reply

This site uses Akismet to reduce spam. Learn how your comment data is processed.