ՀՅԴ-Ն ՄՇԱԿԱԾ Է ԸՆԿԵՐԱ-ՏՆՏԵՍԱԿԱՆ ՔԱՂԱՔԱԿԱՆՈՒԹԵԱՆ ՀԻՄՆԱԴՐՈՅԹՆԵՐՈՒ ԻՐ ՍԵՓԱԿԱՆ ՆԱԽԱԳԻԾԸ

0
10 Օգոստոսին ՀՅԴ ընկերա-տնտեսական քաղաքականութեան հիմնադրոյթներու նախագիծի շնորհանդէսին, ՀՅԴ ներկայացուցիչները յայտնեցին, որ ՀՅԴ-ն մշակած է ընկերա-տնտեսական քաղաքականութեան հիմնադրոյթներու իր սեփական նախագիծը:
 
«Մինչ այժմ գործող բոլոր իշխանութիւնները ազատական քաղաքականութեան կրողներ եղած են, և դրօշակ դարձած է «Պետութիւնը վատ տնտեսվար է, պետութիւնը պէտք է հեռու մնայ» խօսքը: Մենք այդ մօտեցումին դէմ ենք: Երբ ունինք շուկայի ձախողում, այդ պարագային պետութիւնը պէտք է ի՛նք տնտեսական գործունէութիւն ծաւալէ», ըսաւ գիւղատնտեսութեան նախարար Արթուր Խաչատրեան:
 
Տնտեսական զարգացման և ներդրումներու նախարար Արծուիկ Մինասեանի խօսքով` այս նախագիծը չէր կրնար հակասել Դաշնակցութեան նախորդ ծրագիրներուն: «ՀՅԴ ընկերա-տնտեսական քաղաքականութեան հիմնադրոյթները» նախագիծին նպատակը այս հարցով դաշնակցութեան տեսլականը ներկայացնելն է:
 
«Այն օրէնսդրական փոփոխութիւնները, որոնք յառաջիկային կը սպասուին, վկայութիւնն են այն բանին, որ մեր կողմէ յառաջ մղուած մօտեցումները ճիշդ են: Անոնք կը վերաբերին գիներու գոյացման արդար համակարգէն մինչև եկամուտներու վերաբաշխումի քաղաքականութեան», ըսաւ Արծուիկ Մինասեան:
 
Նախարարներուն խօսքով` իրենք որոշ հարցերու շուրջ համախոհութիւն ունին կառավարութեան մնացեալ անդամներուն հետ, բայց իրենց գաղափարները ամբողջապէս իրականութիւն դարձնելու համար անհրաժեշտ է գործադիրէն ներս ունենալ լիարժէք մեծամասնութիւն:
 
Նախագիծը այսօրուընէ կը ներկայացուի հանրութեան դատին: Շուրջ երկու ամսուան հանրային քննարկումներէն ետք, ան կ՛ամփոփուի, և կը ներկայացուի նախագիծին վերջնական տեսքը:
Share.

Leave A Reply

This site uses Akismet to reduce spam. Learn how your comment data is processed.