ԼԻԲԱՆԱՆՑԻՆԵՐԸ ՀԵՏԱՔՐՔՐՈՒԱԾ ԵՆ ՀԱՅԱՍՏԱՆԻ ԳԻՒՂԱՏՆՏԵՍՈՒԹԵԱՄԲ

0

Հայաստանի Հանրապետութեան գիւղատնտեսութեան նախարար Արթուր Խաչատրեան 10 Օգոստոսին ընդունած է Հայաստանի մօտ Լիբանանի Հանրապետութեան արտակարգ եւ լիազօր դեսպան Մայա Տըղերը եւ անոր ընկերակցող պատուիրակութիւնը:

Ողջունելով հիւրերը՝ Արթուր Խաչատրեան յայտնած է, որ Հայաստանի եւ Լիբանանի միջեւ պատմականօրէն ձեւաւորուած է սերտ համագործակցութիւն: Յիշատակելով, որ երկու երկիրներու գիւղատնտեսութեան նախարարութիւններու միջեւ պատրաստուած է հողագործային բնագաւառին մէջ համագործակցութեան մասին համաձայնագիրի նախագիծ, որ արդէն ներկայացուած է լիբանանեան կողմին` նախարարը վստահութիւն յայտնած է, որ այդ փաստաթուղթի ստորագրումը կարելիութիւն կ՛ընձեռնէ ընդլայնել գիւղային ոլորտի մէջ երկկողմանի համագործակցութեան շրջանակը:

Այնուհետեւ Արթուր Խաչատրեան համառօտ կերպով ներկայացուցած է Հայաստանի մէջ գիւղատնտեսութեան քաղաքականութեան ներկայ առաջնահերթութիւնները, անոնց շարքին` աջակցութիւն երկրին մէջ գիւղատնտեսական համախառն արտադրանքի զգալի մասը ապահովող փոքր գիւղացիական տնտեսութիւններուն, բարձրարժէք գիւղատնտեսութեան զարգացում, այգիներու հիմնում, ոռոգման նորագոյն համակարգերու եւ կարկտապաշտպան ցանցերու ներդրում, տեղական սերմնարտադրութեան խթանում, ինչպէս նաեւ արտահանման շուկաներու զանազանութիւն: Լիբանանեան կողմին հետ գործուն համագործակցութիւն ծաւալելու համար, առաւել հեռանկարային ուղղութիւններու կարգին, նախարար Արթուր Խաչատրեան յատկապէս մատնանշած է սերմնաբուծութիւնը, օրկանական գիւղատնտեսութիւնը, գիւղատնտեսական հումքի վերամշակումը: Միաժամանակ ՀՀ գիւղատնտեսութեան նախարարը յոյս յայտնած է, որ հայկական գիւղամթերքը կրնայ մեծ պահանջարկ ունենալ լիբանանեան շուկային մէջ:

Լիբանանի արտակարգ եւ լիազօր դեսպան Մայա Տըղեր իր հերթին ընդգծած է լիբանանցի գործարար շրջանակներու պատրաստակամութիւնը Հայաստանի մէջ իրականացնելու ներդրումային նոր ծրագիրներ: Դեսպանը շեշտած է, որ պատմականօրէն ձեւաւորուած տնտեսական յարաբերութիւնները կը հանդիսանան հիմնաքար, որոնք կը քաջալերեն ներդրողները։ Եւ մինչ այժմ յաջողութեամբ պսակուած ներդրումներներն ալ իրենց կարգին վստահութիւն կը փոխանցեն նոր ներդրում փափաքողներուն համար։

Հանդիպումի ընթացքին դեսպան Մայա Տըեր տեղեկացուցած է, որ յառաջիկային Լիբանանէն Հայաստան պիտի ժամանէ պատուիրակութիւն մը, որուն կազմին մէջ ընդգրկուած են պետական եւ մասնաւոր հատուածի ներկայացուցիչներ, որոնք հետաքրքրուած են շարք մը ոլորտներու մէջ, ինչպէս նաեւ գիւղատնտեսութեան բնագաւառին մէջ ներդրումային միջավայրի ուսումնասիրութեամբ եւ ծրագիրներու իրականացումով:

Share.

Leave A Reply

This site uses Akismet to reduce spam. Learn how your comment data is processed.