ԱՐԾՈՒԻԿ ՄԻՆԱՍԵԱՆ ԸՆԴՈՒՆԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՄՕՏ ՊԵԼԱՌՈՒՍԻ ԴԵՍՊԱՆԸ

0

10 Օգոստոսին Հայաստանի Հանրապետութեան տնտեսական զարգացման եւ ներդրումներու նախարար Արծուիկ Մինասեան հանդիպում ունեցած է Հայաստանի մօտ Պելառուսի Հանրապետութեան արտակարգ եւ լիազօր դեսպան Իկոր Նազարուկի հետ։

Հանդիպումին մասնակցած են նախարարի տեղակալներ Ալպէրթ Բաբայեան եւ Յակոբ Աւագեան, ինչպէս նաեւ այլ պաշտօնատար անձեր։

Նախարարը կարեւոր համարած է հայ-պելառուսական առեւտրատնտեսական կապերը, շնորհակալութիւն յայտնած Սեւան ազգային զբօսայգիին մէջ հիմնուած հայ-պելառուսական բարեկամութեան այգիի համար, ուր Պելառուսէն բերուած քանի մը հազար սոճի տնկուած է։

Արծուիկ Մինասեան նաեւ յայտնած է այն մեծ կարելիութիւնը, որ գոյութիւն ունի եւ կրնայ նոր մակարդակի բարձրացնել երկու բարեկամ եւ գործընկեր երկիրներու միջեւ տնտեսական յարաբերութիւնները։

Դեսպանը իր կարգին շնորհակալութիւն յայտնած է հանդիպումին համար, անդրադարձած շարք մը հարցերու, որոնք կրնան աշխուժացնել գործարար յարաբերութիւնները Հայաստանի եւ Պելառուսի միջեւ:

Հանդիպումին խօսուած է առեւտրական շարք մը ծրագիրներու գործարկումի տարբերակներուն մասին, անդրադարձ կատարուած է ներդրումներու խթանման, թեթեւ արդիւնաբերութեան, որակի ենթակառոյցներու, հիմնաչափերու վերածումի ոլորտներուն մէջ փոխգործակցութեան, փորձի փոխանակման առիթներուն մասին։ Խօսուած է հայ-պելառուսական գործարար միութիւններու ստեղծման անհրաժեշտութիւնը, որ երկուստեք կ՛աշխուժացնէ պիզնէս կապերը։

Հանդիպումին անդրադարձ կատարուսծ է նաեւ հայ-պելառուսական միջկառավարական յանձնաժողովի օրակարգային հարցերուն եւ Երեւանի մէջ նախանշուող հերթական նիստի աշխատանքներուն։ Կողմերը պայմանաւորուած են աշխատանքային հանդիպումներու մասին եւ անգամ մը եւս հաւաստեացուցած համագործակցութեան ընդլայնման պատրաստակամութիւնը:

Share.

Leave A Reply

This site uses Akismet to reduce spam. Learn how your comment data is processed.