ԴԱՇՆԱԿՑՈՒԹԵԱՆ ՆՊԱՏԱԿՆ Է ՊԱՇՏՊԱՆԵԼ ՀԱՅԱՍՏԱՆԸ, ԱՐՑԱԽԸ ԵՒ ՀԱՅ ԺՈՂՈՎՈՒՐԴԻՆ ՇԱՀԵՐԸ

0

ՀՀ վարչապետ Նիկոլ Փաշինեանի տիկինը՝ Աննա Յակոբեանը Ֆրանսայի մէջ հանդիպում ունեցած է ՀՅԴ ներկայացուցիչներու հետ։

ՀՅԴ կեդրոնին մէջ տեղի ունեցած հանդիպումին ընթացքին Աննա Յակոբեանին ուղղուած ողջոյնի խօսք արտասանած է հայկական կազմակերպութիւններու համակարգող խորհուրդի համանախագահ, ՀՅԴ բիւրոյի անդամ Մուրատ Փափազեան։

«Դաշնակցութեան նպատակը միշտ եղած է պաշտպանել Հայաստանը, Արցախը, հայ ժողովուրդին շահերը։ Կ՚ուզեմ մեր ընկեր-ընկերուհիներուն ներկայութեան կրկնել, որ յեղափոխութիւնը պէտք է յաջողի, որովհետև յեղափոխութեան յաջողութիւնը հայ ժողովուրդի ապագան է։ Եւ Դաշնակցութիւնը`ըլլայ Հայաստան, Արցախ, թէ Սփիւռք, իր ուժերը պիտի ներդնէ յեղափոխութեան յաջողութեան տրամադրութեան տակ», յայտնած է Փափազեան։

Ողջոյնի խօսքով հանդէս եկած է նաեւ ՀՅԴ Արևմտեան Եւրոպայի Կեդրոնական Կոմիտէի անդամ Հրաչ Վարժապետեան, որ խոստացած է տրամադրել թէ՛ մարդուժի, թէ՛ նիւթական հնարաւոր բոլոր կարելիութիւնները՝ յաջողցնելու յեղափոխութեան նպատակը, որուն վրայ ժողովուրդը յոյս դրած է։

«Դաշնակցութեան համար Հայաստանն ու Հայաստանի պետականութիւնը վեր են ամէն բանէ։ Այդպէս եղած է նոյնիսկ նախագահ Լևոն Տէր-Պետրոսեանի ատեն…», իր խօսքին մէջ յայտնած է Վարժապետեան՝ չփափաքելով յիշեցնել «այդ էջերն ու անոնց հետևանքները»։

Առաջին Տիկինը շնորհակալութիւն յայտնած է Դաշնակցութեան՝ տարիներու ընթացքին կատարած իր աշխատանքներուն համար՝ ընդգծելով, որ դաշնակցութեան կատարած գործը պետութեան համար անգնահատելի է ։

«Այսօր մենք, մեր պետութիւնը, նոր փուլ կը թեւակոխենք և այդ նոր փուլը կը պահանջէ նոր աշխատանք, նոր մօտեցում։ Ես չեմ կասկածիր, որ դուք այդ նոր աշխատանքին մէջ կը գտնէք այն ընելիքը, որ անփոխարինելի է, որ միայն դուք կրնաք ընել», յայտնած է Աննա Յակոբեան:

 

Share.

Leave A Reply

This site uses Akismet to reduce spam. Learn how your comment data is processed.