ԱՒՍՏՐԱԼԻՈՅ ԾԵՐԱԿՈՅՏԻ ԱՆԴԱՄԸ ՑԵՂԱՍՊԱՆՈՒԹԻՒՆԸ ՃԱՆՉՆԱԼՈՒ ԿՈՉ Կ՛ՈՒՂՂԷ

0

Աւստրալիոյ Հայ Դատի Յանձնախումբը կը հաղորդէ, որ երկրի Ծերակոյտի անդամներէն Էրիք Ապեց, 16 Օգոստոսին իր ունեցած ելոյթին ընթացքին շեշտած է Հայոց Ցեղասպանութիւնը ճանչնալու կարեւորութիւնը՝ յիշեցնելով, որ իրենց նախահայրերը հարիւր տարի առաջ գործնականապէս մասնակցած էին Ցեղասպանութեան զոհերուն օժանդակութիւն հասցնելու ջանքերուն։
Ցեղասպանութեան արհաւիրքը յիշեցնելէ ետք, ծերակուտականը ցաւ յայտնեց, որ Ցեղասպանութեան ընթացքին տեղի ունեցած եւ լաւապէս վաւերագրուած բռնարարքներն ու ականատեսներուն վկայութիւնները երկար տարիներով անտեսուած են՝ դիտել տալով, որ Համաշխարհային Ա. պատերազմին մասնակցած Աւստրալիոյ բանակի անդամներն ու երկրին լրագրողները եւս ականատես եղած են Ցեղասպանութեան, եւ քննադատելով այն դէպքը, որ Աւստրալիա ցարդ պաշտօնապէս չէ ճանչցած Հայոց Ցեղասպանութիւնը ըսաւ.
«Կը հաւատամ արդարութեան յաղթանակին, եւ այդ պատճառով ալ կը հաւատամ, որ հայութիւնը արդար հատուցում պիտի ստանայ, սակայն պէտք է գիտակցինք, որ ուշացած հատուցումը նաեւ զլացուած հատուցում է»։
Ապեց խստօրէն դատապարտելով պատմական այս իրողութիւնը ուրանալու իւրաքանչիւր ջանք։
Աւստրալիոյ Հայ Դատի Յանձնախումբի գործադիր վարիչ Հայկ Քայսերեան իր կարգին դրուատած է ծերակուտական Ապեցի զգայացունց ելոյթը, միաժամանակ յոյս յայտնելով, որ Աւստրալիոյ Արտաքին Գործոց Նախարարութիւնը եւս նման յանդուգն կեցուածք կ՛որդեգրէ՝ վերջ տալով Հայոց Ցեղասպանութեան ուրացման նպաստող իր կեցուածքին։

Share.

Leave A Reply

This site uses Akismet to reduce spam. Learn how your comment data is processed.